sinursuran-banner-sqSinursuranNi Jobert M. Pacnis

Ti Kayaw ti Aplaya ti Ballesteros

Kolum: Sinursuran

 Ni Jobert M. Pacnis

(Umuna a paset)

 

TUNGGAL maysa kadatayo, ka-Sinursuran,  adda kaay-ayona a lugar a naimatangan wenno napasiarnan. Ket dayta a lugar, kanayonnan a tagtagaimpen. Maulit koma ti isasarungkarna kadayta a disso ta iti maminsan pay nanamenna ti duayya, kayaw ken talingenngen nga ipaay daytoy.

Mabalin a dayta a lugar ket igid ti baybay, dan-aw  wenno karayan, tuktok ti bantay, uneg ti kabakiran, kadagiti agdindinamag a water falls, kueba wenno kadagiti disso a napateg iti pakasaritaan ti pagilian. Mabalin pay a dagiti sikat a mall wenno parke. Wenno, kadagiti inarakup ti napintas a gasat, kadagiti napasiarda a nadumaduma a pagilian.

Agduduma ti pakaay-aywan iti napasiaren a disso, saan kadi, ka-Sinursuran? Mabalin a ti pisikal a langa daytoy; kadagiti makan nga adda ditoy; kadagiti material a buya; iti ulimek, talinaay a yarakupna. Wenno iti buya a pagsidsiddaawan ta di man namnamaen nga adda kastoy wenno kasta a daeg a maimatangan. Mabalin met a may-ayo gapu iti kinalaing dagiti lumugar a mangsangaili. Wenno iti adventure a mayopresar ti lugar.

Nupay saanak a managpasiar, adda met kaay-ayok unay a lugar a mabalinko nga ipagpannakkel. Saanakon nga umadayo: ti mismo nga aplaya ti ilimi a Ballesteros. Saan a gapu ta ditoy ti dimmakkelak isu nga imbagak a kaay-ayok la unay. A kanayon nga adda ditoy ti rikna ken isipko aglalo no kasta nga agsuratak— aglalo iti daniw ken sarita.

Ta agpayso man met a ditoy aplayami ti nakabukelan (ken nagbiagan dagiti karakter) ti umuna unay a saritak iti Bannawag a rimmuar idi Nobiembre 24, 1997—  ti Daklis.

Saan laeng a dayta, adu pay a daniw ti naipasngay a ti mismo aplaya ti temana, kangrunaan iti peggad nga agdama a sangsanguenna. Ditoy met a nagubbog ti adu nga inspirasion iti panagsuratko ken nakariknaak iti talinaay a nangyasideg kaniak iti nakaparsuaan.

Ania pay dagiti rason a kaay-ayok la unay ti baybaymi?

Adayo unay ti aplayami no idilig kadagiti aplaya ti Pagudpud (a napasiarko metten) ken Boracay a puraw ti kadaratanda. Ditoy aplayami, ngumisit dagiti daratna ta namnamsek iti mineral a magnetite a kangrunaan a ramen iti panagaramid ti landok.           Iti idadap-awmo iti kadaratan, sarabuen ti lamuyot dagiti magnetite dagiti dapanmo kabayatan ti panangmingmingmingmo iti baybay ken ap-apungolennaka ti apagdillaw a pul-oy manipud iti barukong ti taaw. Mailili man ti riknam itoy a senario iti biag. Nagimnas a padas!

No iti Manila Bay, kaay-ayoda la unay a buyaen ti panagtabon ni Apo Init, ditoy aplayami, saan a magatadan ti bang-ar nga itden ti panangmingming iti ileleggak ti init a kas man la nagdakkelan nga apuy a bumangbangon/agpangpangato iti nagsabtan ti taaw ken langit. Anian a nagpintas a buya a sagut ti Dios! Maisurotka nga agarapaap iti panagpangatona. Adda dayta kayawna a mangparegta kenka nga agarapaap pay. Makaadawka iti naidumduma a ganaygay. Mautobmo a kaska la kankanayon a nasanikar ta italtalukatik ti ileleggak ti init ti agtultuloy latta a rikus ti biag.

Gapu ta adayo iti kangrunaan a kalsada, saan pay a naasuk ti aplayami. Adayo iti polusion a makadangran iti salun-at. Naimbag a pagpallailangan dagiti adda sagubanitna nga asthma wenno angkit. Ken kasta metten kadagiti sineknan la unay iti stress. Ditoy, makapagpanunotka a naimbag ta adayo iti riribuk a yeg dagiti adu a tao. Mabalinmo ti ag-meditate; agpanunot a naimbag nga awan mangsingsinga kenka.

No kayatmo met ti agsida iti presko nga ikan, mapan laeng kadagiti pondo ti barangay. Siento porsiento a makaramanka kadagiti pagaayatmo: kilawen, maituno wenno masigang nga ikan. Siento porsiento pay a di naala iti maiparit a wagas ti panagkalap a kas iti panagbungbong wenno panagdinamita. Ta maiparit dayta ditoy ilimi.

(Adda tuloyna)