Footer

Ti Konsumerismo

Panagtaray ti komersio ken indikasion iti aktibo a panaggiginnatang iti merkado ti konsumerismo.  Agpayagpag dagiti tagilako ken serbisio iti selebraran a naisangsangayan nga okasion. Nakapokus ti selebrasion iti narangya a sagana, ragragsak ken dadduma pay a materialistiko a banag. Napaliiw daytoy aglalo iti  piestat’ natay, iti paskua ken panagpasangbay ti baro a tawen.

Maysa daytoy a social ken economic order a manggutugot ken mangallukoy iti asinoman a gumatang kadagiti tagilako wenno serbisio a gagangay nga ad-adu ngem iti kasapulan, nga aggastos iti okasion ket kapilitan a gaw-aten ti nakaibatogan a langit tapno mapaadda ti maidaya, umutang no adda agpautang wenno iti diktar ti gimong dagiti natiwed ket panangpaadda babaen ti maikanniwas nga aramid.

Iti pumarasapas a gunay ti gimong, nakatuon ti imatang amin no kasano a selebraran ti okasion—ket dayta a ‘kasano’ a panangselebrar ti sungbatan dagiti agtagilako babaen ti panangidiayada kadagiti nagduduma ken adu a klase ti tagilako ken serbisio; ket tapno makaawisda iti ad-adu a gumatang, mangpanunotda kadagiti nagdumaduma a gimik ken pangawis kadagiti posible nga aggatang kadagiti produkto wenno serbisio. Dagita a produkto ken serbisio ti lumtaw ta dagitan ti nakaituonan ti imatang ti kaaduan.

Ngem ania ti ibunga daytoy iti taray ti panagbiag ken gunay ti gimong? Ania ti implikasionna kadagiti pudpudno a kaipapanan dagiti holidays?

Ti implikasion nga itden daytoy ket ti pannakalipat ti pudpudno a kaipapanan ti okasion ken no apay a selebraran. Saanen a daydiay panangselebrar ti naisangsangayan nga aldaw ti ad-adda iti importansia ken kaimudingan no di ti pannakipartisipar iti kusikuti ti gimong. Maipasulin ti tradisional a tuodan ti amin no apay nga adda dagitoy a holidays.

Ti pudpudno a kaipapanan dagitoy a holidays ket narigat itan a maistablisar kadagiti sungbat wenno iti gunay ti gimong, ta limmaksiden iti eksistensia dagitoy a namunganayda tapno patibkeren dagiti tagipatgen (values) a nabayagen a naikawes iti kinaasino ti puli. Dagiti tagipatgen a nangmuli iti kinasayaat a sursuro ken ugali.

Napukaw dagitoy a tagipatgen iti pannakibalubalna iti taray ken gunay ti gimong a konsumerismo. Ad-addan a lumtaw daydiay panaggatang kadagiti tagilako ken serbisio imbes a panangselebrar koma iti okasion tapno mataginayon dagiti tagipatgen ken panangamiris iti pudpudno a kaipapanan ti naisangsangayan nga aldaw.

Ania ti pudpudno a kaipapanan ti piestat’ natay? Tapno ited ti respeto kadagiti agin-inanan ken panangpasingked ti relasion a naibasar iti panagririnnanud. Ti paskua? Panangselebrar ti aldaw ti pannakaipasngay ti Mesias. Ti baro a tawen?  Panangisagana ti bagi para iti sabali manen nga agpang ti panagdaliasat ti biag. Imbes a selebraran ti kaipapanan dagitoy naisangsangayan nga aldaw, ginaburan ti konsumerismo ti importansiada.#