Ti kontrobersial a Cyber Crime Law

Ni Danny B. Antalan

(Tuloyna)

 

Gapu iti makarengreng a panawagan ti umili, sumagmamano kadagiti bimmotos a senador ti nangisanud ti balikasda.  Nagpalawagda kadagiti umili a dida kano nabasa unay isut gapuna a naaprobaranda.  Anian, kasta kadi ti panagaprobar dagiti senador kadagiti gakat a linteg?

Nupay kasta, inarisit kano met daytoy ni Presidente Noynoy Aquino sakbay a pinirmaanna.  Hmmm, ania ngata no sibibiag pay ni tatangna a ni Ninoy… amangan no binautna toy anakna a presidente gapu ta isuna metten ti mangkonkontra kadagiti ilablabanna idi a wayawaya ken karbengan dagiti tunggal Filipino.  Ania ket ngatan a panagungetna.

Ngem adda ditan, naipasan ti lehislatibo babaen ti kongreso ken senado, inaprobaranen ti ehekutibo babaen ti pirma ti presidente, ken naratipikaranen babaen ti korte suprema, ket mayimplementaren ti linteg.

Isu nga ita, adun dagiti ar-aramiden idi a masapul a pagbutnganen nga aramiden.  A kasla natapkalan dayta matam kadagiti madi a makitkitam ta madi mo met mabalin nga ipost wenno itweet dagita.  Agbalinka nga umel kadagiti makitkitam iti madi nga aramid dagiti opisiales.  Ken wen, naposasanen dagiti imam ken nabarotan dagiti ramaymo ta maibaludka metten.  Ta madi kayat ti gobierno nga ibagam ti pudno a dakes nga ibagbaga dagiti mangiturturay kadakayo.

Wen, madikan mabalin nga ag-tweet wenno ag-post kadagiti dakes nga ar-aramiden dagiti opisiales ti barangay, munisipio, probinsia ken pagilian.  Ania ngarud no kurakot, babaero, mammapatay wenno sugador dayta, buyaem lattan ah.  Libel no isuratmo, libel no i-share mo.

Dagiti laeng napintas a galad dagiti pimmusayen a pulitiko ti mabalinmo nga isurat uray pay naimpeklan a managdakdakes wenno sairo ti bangkag dayta a kaarrubam.  No babaero, dimo mabalin ibaga a tsikboy, ibagam lattan a managtulong kadagiti babai nga agkasapulan.  No mammapatay, ibagam lattan a tumultulong a mangpaksiat kadagiti dakes a ruot iti rabaw ti daga.  Kasla koman addaka iti pumpon nga uray pay kasano kinadakesna ti ar-aramidenna, dagiti laeng napipintas a galad ti mabalinmo nga ibaga.

Ngamin no adda nangi-post iti wallna ti panangtubngarna iti dayta a kuriro a tao, ta pudno met koma a managdakdakes ket gapu ta pudno, nairayoka a nang-”Like” ken nangi-”share”,  dakeskan, sikan ti maysa a kamaten ita dagiti imbestigador nga innala ti DOJ a manganup kadagiti blogger a naglabsing kano iti Cybercrime Prevention Act.

Iti Section 1 ti Article III ti Bill of Rights ti 1987 Constitution, kastoy ti kunana: “no person shall be deprived of life, liberty or property without due process of law, nor shall any person be denied the equal protection of the laws.” Nupay kasta, iti section Section 19 ti Cybercrime Prevention Act, kastoy met ti kunana, “when a computer data is prima facie found to be in violation of the provisions of this Act, the Department of Justice (DOJ) shall issue an order to restrict or block access to such computer.’” Awanen ti adu a sao ken proseso, DOJ ti mangpasardeng kenka.  Wen, saanen a kasapulan pay ti mandar manipud iti korte.

Ken ita, gapu iti di naaluadan a nalabsingmo dagitoy ipariten iti internet, daytoyen ti maysa a karigatan a partena.  Ti panangbirokmo iti  P1,000,000 a kas piansa ta no saan, anusamon ti 12 a tawen nga agpetptet iti rehas iti pannakaibaludmo.

Ania ngaruden, nailaw-anmo a nai-poste iti facebook ti kapitan ti barangayyo nga ad-adda a pallot ti pakakumikomanna imbes ti panagserbina iti barangay, ket indarumnaka gapu iti panaglabsingmo iti Cybercrime Prevention Act.  Pangalaan ngata ti 1M/

Kasla Martial Law, kunam ngata.  Saan, isu daytoy ti aw-awaganda iti cyber martial law.  Pannakapukaw iti wayawaya kadagiti kayatmo nga aramiden iti internet.  Sakbay a naaramid daytoy a linteg, addatayo iti maika-6 a kawayaan iti panagaramat ti internet.  Ngem ita a binutbutengdatayon, linipitda dagiti ramaytayo, ken nakawaran dagiti imatayo, ayannan ti panagwaywayastayo?