Footer

Ti kontrobersial a Cyber Crime Law

Ni Danny B. Antalan

 

Idi Oktubre  2, kaadduan tunggal maiposte iti facebook  ti mangkonkondenar iti gobierno.  Sinuktanda ti profile picture iti nangisit a silhouette.  Nagkomentoda ngem blangko wenno adda lingedna ti naisurat.  Mangkritkritikar iti gobierno dagiti ladawan a maiposte.  Mangbabbabalaw dagiti balikas.

Idi kuan, saanen a mapengdan ti agsasaruno a ‘likes’ kadagiti mensahe iti wall.  Di mapengdan ti pannakai-share kadagiti mangkritkitikar a ladawan.  Tunggal maysa ket adda makunana iti wallna.

Saan laeng iti facebook.  Uray iti Twitter ket kastoy ti kabaraan a trending.

Ti topiko… ti RA 10175 wenno ti mas sikat nga awagna: Cybercrime Prevention Act.

Ngamin tamingen ti Korte Suprema ti linteg tapno naan-anay a maaprobaran daytoy para iti implementasionna.  Adda siam 9 a petision manipud iti nadumaduma a grupo ken indibidual a mangsupsupiat iti linteg.

Adda pagsayaatanna no maaprobaran, pakairamananen ti nadagsen a dusa kas koma ti child pornography, identity theft, online fraud, illegally accessing computer networks ken dadduma pay a madi nga aramid iti internet..

Ngem makarengreng dagiti mangkonkontra.  Saan la maymaysa.  Nagad-adu.  Tunggal segundo bambanatan ti social media ti gobierno ni Pnoy.

Iti maysa nga online survey, rimmuar a ti Pilipinas ti kangrunaan nga agar-aramat iti Facebook iti sangalubongan, sinaruno laeng ti Israel ken Turkey.  Iti sabali pay a survey, 45 porsiento ti ad-adda a mapan iti internet, 36 porisento iti radio, 12 a porsiento ti agbasa iti pagiwarnak ken 4 porsiento iti magasin.  Telebision ti kangrunaan a paglinglingayan ti 89 a porsiento a Pinoy .

Dinakamatda ti Wikipedia nga adda iti maika-18 a puesto ti Pilipinas a kaadduan nga agar-aramat iti internet wenno agarup 30 a milion a tattao ti agin-internet.

Sakbayna, nakaad-adu a web sites ti gobierno ti sinerrek dagiti hackers.  Isuda dagiti nangiserrek iti virus kadagiti ahensia ti gobierno a pakairamanan ti website ni Presidente Pnoy, ti Senado ken Kongreso, ken dagiti adu nga ahensia kas panangipariknada iti dismayada iti nasao a  linteg

Di agpapabatubat ti protesta ken demonstrasion iti kalsada ken sanguanan ti pasdek ti ahensia.

Maymaysa ti panawagan… maibasura ti cybercrime law.

Ti rason— maikontra daytoy iti karbengan pantao ti maysa nga umili.  Mangpukaw iti nawaya a panangipaduyakyak iti karirikna.  Mabalin a mabalud ti siasino man a di masurot ti proseso ken matiliw ti maysa a tao uray awan ti natibker nga ebidensia ken awanan ti warrant.

Iti nasao a linteg, mabalin a mabalud ti siasinoman uray daytoy ti nangi-share laeng iti maysa a poste iti facebook wenno twitter.  Nakarkaro manen no nangisurat iti mensahe iti wall a mangkritkritikar iti gobierno ken dagiti opisialna. Ibagada a libelous ti insuratda wenno in-shareda.

Ti kayatna sawen, adda kawarnan ti imam iti isuratmo iti facebook wenno twitter wenno blog.  No libelous, mabaludka.

Gapu itoy, inawaganda iti cyber martial law ti nasao a linteg.  Mangipalagip iti martial law a nayetnag idi panawen ni Presidente Ferdinand Marcos.

(Adda tuloyna)