Ti Krismas Tri

Salaysay ni Danilo S. de Guzman

 

 

Kadagiti balbalay, opisina, establisimiento, negosio, parke ken dadduma pay ket adda a makita daytoy a makaay-ayo ken makaparagsak a buya. Apaman a simrek ti Disiembre, addan dagiti krismas tri. Dagiti dadduma, Nobiembre pay laeng, nadekorarandan. Nagduduma ti katayag dagiti krismas tri,  nagduduma met iti nagtaudan dagiti materiales, adda iti manipud iti sibibiag a kayo, naaramid manipud iti plastic, iti barut ken lanlandok, dagiti indigenous materials ken dadduma pay. Kaaduanna ti naarkosan iti nagduduma a maris ti silaw ken addaan iti dakkel a bituen iti tuktokna.

Nagduduma met dagiti kansion a mangiparangarang iti kaipapanan ti krismas tri.

Ta ania aya ti kaipapanan ti krismas tri?

Kasano met a timmaud daytoy?

Ania ti isimbolona kadatayo a Kristiano?

Ti krismas tri ket simbolo ti Kristianismo, lalo dagiti Katoliko ken aminen a sekta pammati a mamati a ti Dios ket buklen ti Tallo a Persona: Dios Ama, Dios-Anak ken Dios-Espiritu Santo.

No ibisualtayo ti uha ti krismas tri, nagsinantrianggulo. Nga isu dayta ti simbolo ti Holy Trinity wenno ti Dios a buklen ti Tallo a Persona. Ti Dios Ama  iti kuntirad (tuktok, kangatuan), ti Dios-Anak ti makannawan ken Dios Espiritu Santo ti makannigid.

Idi maika-7 a siglo, maysa a mongha manipud iti Crediton, Devonshire (United Kingdom) ti napan sadiay Germany tapno isaknapna ti Kristianismo. Inaramatna ti kayo a  Fig Tree a kas simbolo ti Holy Trinity nga inna iyad-adal ken insaknap. Naawagan ngarud a Kayo ti Dios ti Fig Tree. Dayta ti nanipudan ti krismas tri. No dumteng ti Paskua,  makita daytoy a kayo a kas panangipaneknek dagiti bumalay iti panangarakupda iti Kristianismo.

Nagnanaed ti mongha iti Thuringia, Germany nga iti di nagbayag, ket napanaganan dayta a lugar iti Cradle of Christmas Decoration Industry.

Nakanonisaran a santo daydi a mongha, ket isu ni San Bonifacio.

Nupay kasta, idi maika-15 a siglo, saan laengen a simbolo ti Nasantuan a Trinidad ti krismas tree, naikkan pay iti kandela ken bitbituen  a mangiparangarang ti panangrimat dagiti bituen iti kasipngetan. Dayta a panagrimat dagiti bituen ket isu met laeng ti panagrimat ti Holy Trinity iti biag ti tao. Lalo no adda iti “kasipngetan” ti maysa a tao, nakarimrimat ti Holy Trinity a mangipasimudaag a sidadaan a mangappupo ken makidanggay kenkuana.#