Footer

Ti krus a baklay ni Zubiri

URAY kalpasan ti pannakaiproklama ni Juan Miguel Zubiri a nangabak iti mai-12 a senador, baklayna ti panagduadua nga isu ti pudpudno a nangabak para iti nasao a puesto.

Ita pay, mabirbirngasanen ni Zubiri iti “ti Senador manipud iti Maguindanao”.

Mapagduaduaan ti resulta ti eleksion iti Maguindanao no maibasar kadagiti pasamak sakbay ken kalpasan ti eleksion.

Abante ni Pimentel iti 110,000 a butos ngem iti pannakakanbas dagiti butos iti Maguindanao, ginaburan ni Zubiri iti 195,000 a butos ni Pimentel a nangsukdalanna iti maika-12 a puesto.

Idi naipatulod ti provincial certificate of canvass ti Maguindanao iti Manila, 12-0 ti resulta ti eleksion a nanggun-odan amin dagiti kandidato ti Team Unity iti umuna a 12 a puesto.

Nairakurak a ni Gov. Luis “Chavit” Singson, saan a Muslim, ti kangatuan iti butos. Ngem iti pannakakanbas ti MCOCs, ni Zubiri ti nagbalin a numero uno.

Sangapulo ket siam a kandidato a para senador ti ibbong ti butosda a nagkunaan pay ni Comelec Chair Benjamin Abalos nga “statistically improbable”.

Kalintegan dagiti agtuturay ditoy a kasta ti nagbanaganna agsipud ta awan ti kandidato ti oposision para iti lokal a puesto ken gapu iti command votes, wenno no ania ti kayat dagiti agtuturay, isu ti tungpalen dagiti iturayanda.

Ngem sumagmamano a mangisursuro ti limtuad nga inummong ida dagiti armado a lallaki sada napagsurat iti balota a nangikur-itanda iti nagan dagiti kandidato ti Team Unity.

Kasta met nga awan ti naipakita dagiti municipal election officers nga MCOC agsipud ta inukkon amin ni Lintang Bedol, ti provincial election officer.

Sumangkautro, natakaw kano dagiti MCOCs iti opisinana bayat ti kaawanna. Nagpukaw a kasla asuk dagiti MCOCs ken awan ti maitudo a nagisayangkat iti panagtakaw.

Napapatay ti maysa a district supervisor kalpasan nga imbulgarna ti panagsuitik iti eleksion iti probinsia.

Iti sanguanan dagitoy, baklayen la ketdi ni Zubiri dagiti panagduadua no pudpudno a kasta kadakkel ti nabutosna iti Maguindanao.

Kunana pay nga awan iti bokabulariona nga agsuitik iti eleksion ken saan nga agaramid iti saan a nasayaat tapno magun-odna dagitoy a butos.

Ngem kayat man wenno saan ni Zubiri, isu ti kadakkelan a benepisario iti resulta ti eleksion iti Maguindanao.

Iti panangipila ni Pimentel iti protestana iti Senate Electoral Tribunal, saan koma ngarud a mangipakat ni Zubiri kadagiti bangen ken lapped iti nadaras a pannakabilang dagiti butos manipud kadagiti presinto iti sapasap a Maguindanao tapno maammuan no awan ti naaramid a sinisuitik iti eleksion.

Iti daytoy laeng a wagas a maipakita ni Zubiri no isu ti pudpudno a nangabak iti maudi a puesto ti kinasenador iti eleksion idi Mayo 14, 2007.#