Sarita: Ti kuadrado a lansa (Maikadua a paset) | Tawid News Magazine - Weekly Ilocos News 📰

Ti kuadrado a lansa (Maikadua a paset)

“Asino met ti nakadiskubre dayta a banag, kap?” intingngaag latta ni Kiko ti saludsodna, idinto a dagiti uppat pay a kaduana ket sidadaanda met a dumngeg iti palawag ti kapitan.

“Maysa kano a padi a taga-Belgium iti nangirugi dayta a pammati. Napaliiwda nga epektibo dayta a banag, nagangayanna, inar-aramiden dagiti naglabas a henerasion iti Kailokoan. Saan laeng a dagiti di katatawan, uray dagiti al-allia: a kas iti padi nga awan iti ulo, babai a nakapuraw nga agparparang, ken dadduma pay. Palukan laeng ti kuadrado a lansa iti pagparparanganda, saandanton nga agparang.”

“Kasta met siguro ti aramidda idiay lugarda, a!” insengngat ni Nana Ceding, nga agur-urnos ti tagilakona iti uneg ti kantina. Ti padi a taga-Belgium ti kayatna sawen.

“Sadiay ngamin Europa, patienda la unay a nabirtud ti kuadrado a lansa. Ta dayta ngamin iti nausar iti pannakaparmek ni Dracula, pinalukanda iti kuadrado a lansa iti barukong daytoy idi matmaturog iti iddana a lungon. Sipud idin, saanen nga agiwara iti alliaw ni Dracula nga agsepsep iti dara, ta pinarmek ti birtud ti kuadrado a lansa.”

“Nabirtud gayam ti kuadrado a lansa, kap!” kinuna ni Kiko a masmasdaaw.

“Misterioso ngamin a panday ti nangaramid iti kaunaan a kuadrado a lansa a naipalok iti barukong ni Dracula, ta inggamerna kano ti positibo nga enerhiya iti uppat a suli ti lubong, isu a kuadrado,” inayon ti kapitan.

“Dayta iti panawen ti kuadrado a lansa. Ngem iti agdama a panawen ti wifi, pangalaam pay ti kuadrado a lansa? Ket kakasla tammudonsa iti kadadakkelda.” Binagi met ni Metring.

Kellaat a limmawag ti rupa ni Kiko a manglanglangit. Iti dayta nga idiarna, adda la ketdi lutlutoen ti nalapad a mugingna. Naessem daytoy kadagiti adbentura ken panagtakuat.

“Awanto la ketdin iti makaitured a mangsurot daydiay a lalaki,” insakuntip ti kapitan, “di met ngarud maranaan ta siak la koman. Ngem kasla agpilpili met iti pagparanganna!”

“Amangan no agbuteng met kenka, kap!” indumog ni Mencio ti ellekna.

“Ania koma ti pagbutnganna? Al-alliaak, aya? Lokolokoka met, Mencio!”

Ket mas lalon iti gagarakgakan ti ummong.

“NAGGAPUAM kadi, Kiko, lakay? Birbiroken ‘diay inaunaam dayta bisikletana. Innalam met gayam!”

“Napanak laeng idiay ili. Adda ginatangko sadiay hardware ni Tan Po. Paneknekak man no pudno met laeng ti birtud ti kuadrado a lansa, he-he…!”

Naglibbi ken nagarko dagiti kiday ni Nelly a mangmatmatmat ken ni Kiko.

“Kuna ni kapitan, a ti kuadrado a lansa kano iti impalokda iti barukong ni Dracula, isu a naparmek. Dayta ti pasintawi ni Dracula.”

“Pasintawi…? Kayatmo a sawen, legend?”

“Korek! Legend a sarsarita, saan a ni nalatak a singer, John Legend, he-he!”

Naglibbi ken nagarko manen dagiti kiday ni Nelly a mangperperreng ken ni Kiko. Nagsabat dagiti matada.

“Apay a kaska met la nakangngeg a tulengen?”

“P-paneknekam ti birtud ti kuadrado a lansa?”

“Ken saan nga al-allia wenno di katatawan ti lalaki a lumablabas dita bit-ang! Daydiay tagtaguoban ni Ambrosia.”

Nagmulagat a nakanganga ni Nelly.

“Sumrek ta dingrawen, baket! Ania ket a ngangan, dayta! Kasla nganga ti sumikbab a buaya!”

Tiningigan ketdi ni Nelly nga inlibbi ti mulmulmolan ti mugingna.

“Uray ni kapitan ken dagiti tanodna, ammoda met a tagtaguoban ni Ambrosia ti lumablabas a lalaki a nakalabbaga.”

“Ni kapitan a mismo koman a, iti agdamag!”

“No ni kapitan, wen, pagdamaganna kano ti kinaasino daydiay a lalaki. Ngem dina met maranaan no lumabas. No dagiti tanod, agbutengda ta amangan kano no al-allia.”

“Ket sika, dika agbuteng, lakay?”

“Saan. Ta kayatko laeng a paneknekan ti birtud ti kuadrado a lansa.”

“No pasintawi dayta, awan ti kinapudnona! Sarsarita laeng ngarud, nga iti panaglabas ti panawen, nagbalindan nga arkos ti bibig, ngem awan iti makapaneknek iti kinaotentikadona. Isu a naawagan iti pasintawi.”

“Ket apay a napalokan iti kuadrado a lansa dagiti duogan a kayo a pagparparangan kano idi dagiti di katatawan wenno al-allia idi un-unana? Ken apay a kuadrado a lansa iti inusarda kadagiti kadaanan a balbalay ditoy Ilocos? Tapno anib, saan kadi?”

Nagmulagat ken nakanganga manen ni Nelly.

“Tapno pumanaw kano dagiti aggigian. Wenno saan nga aggian dagiti di makitkita.”

“Wen, nga agpaysu, lakay!”

“Dayta ti birtud ti kuadrado a lansa. Isu dayta ti kayatko a paneknekan.”

Kellaat a nagmisuot ni Nelly.

“Apay? Ania ti mulmulmulan ti panunotmo?”

“Adda pay, aya, kuadrado a lansa ita a panawen ti wifi? Ket no idi saanak pay laeng a naiyanak iti kinaadda dayta a banag!”

“Puonayka met, baket, saan met a napukaw dagiti kuadrado a lansa. Adda pay laeng. Agpukawpukaw man ti signal ti prepaid wifi, saan nga agpukaw dagiti kuadrado a lansa!”

“Ania ti kayatmo a sawen? Isu ti napanmo ginatang idiay hardware?”

“Wen, met!”

“Kitaenta man ngarud!”

Kinaut ni Kiko ti kanawan a bulsa ti pantalonna a maong. Kinammet ken inruarna dagiti lansa, sana inukrad ti dakulapna.

“Pakong bakya met!”

“Ket kuadrado a lansa met dagitoy, saan, aya?” Inrungiit ni Kiko ti panagkalinteganna.

Nagellek ni Nelly. Sinipatna pay ti kanawan nga abaga ni Kiko. Sana intallikod ken inrukob ti garikgikna. “Naangawka la unay, lakay…!”

“Kuadrado a lansa, kunada met, dida met imbaga a dagiti kakasla tammudo ti kadakkel laeng ti mabalin nga usaren. Panagkunak, mabalin daytoy, ta kuadrado met. Mabalin!”

“Agar-aramidka iti pakaisagmakan ti karadkadmo, lakay…!”

“Kayatko laeng a paneknekan no adda kinapudno wenno awan ti birtud ti kuadrado a lansa. Dayta laeng, period!”

“Dika mabuteng?”

“Saan a mabuteng ti tao nga addaan iti mulinaw a panggep. Ti panggepko ket paneknekak ti kinapudno ti birtud ti kuadrado a lansa.”

“Ania koma ti aramidem, ala, man?”

“Napanak nagdamag itay ken ni Apong Iddo a mannurat. Nagpabalakad. Adu ti ammona ket no maipanggep kadagiti duogan a pagsiriban ken sarsarita. Kunana, a no madlawmon ti butengmo, no agpasgarkan, no tumakder dagiti buokmon, mangitugkelka iti kuadrado a lansa iti daga ket mapukaw a dagus ti bubutngam. Epektibo kano a pagsumang ti bubutngan ti kuadrado a lansa.”

Saan a makatimek ni Nelly ta manglanglangit, a kasla ut-utobenna ti insawang ni Kiko. Ta ugali ngamin daytoy iti mangutob nga umuna dagiti naisawang sakbay a sumungbat.

“No idi un-unana ket ibaddekda kano ti kasla tammudo a kuadrado a lansa tapno maipalok. Ngem no usaren ti pakong bakya, di tangan laengen mabalinen, instant, saan? Total, ita a panawen ti wifi, nagrairan dagiti instant. Instant mami, instant coffee, instant noodles, etcetera!”

“Isu a dayta ti napanunotmo nga instant solusion?”

Nagrungiit ni Kiko a mangay-ayam kadagiti pakong bakya iti dakulapna.

Ken ni Nelly, pattapattaen met daytoy nga adda la ketdi manen mulmulmolan ti muging ti lakayna, lalo no kasta nga agrungrungiit ken nakadumog.

AGGIBUSTO