Ti leksion a maadal iti panagiposte iti pribado a ladawan iti Facebook (Maudi iti dua a paset)

Komentario ni Salvador A. Espejo

 Iti biang ti Student Council Alliance of the Philippines (SCAP), linabsing ti Saint Theresa’s College ti kalintegan ti estudiante kas intuding ti Bill of Rights a nailanad iti 1987 Constitution, partikular ti Artikulo 3, Seksion 4 a manggarantia iti tunggal tao ti wayawaya iti panagbalikas ken ekspresion.

No patien ti SCAP, masaklaw daytoy a wayawaya ti internet ken dagiti social networking sites a kas iti Facebook. Saan la a dayta, sinalungasing pay ti pagadalan ti probision ti RA 9262 wenno ti Anti-Violence against Women and their Children Act gapu iti mapapati a panangipalayna iti sikolohikal a kinasabrak iti estudiante, a nagsagrapanna iti pannakaibabain ken trauma.

Segun iti SCAP, linabsing pay ti Student Handbook ti Saint Teresa’s College ti kalintegan ti estudiante ken ti konstitusion, kas ti paglintegan a saan a panagparetrato ken panag-upload kadagiti ladawan iti internet a naan-anay a maipakita dagiti paset ti bagi agsipud ta pawilan daytoy ti pribado ken personal a garaw dagiti estudiante ti pagadalan.

Saan a mabalin a masuspenso ti sibil ken politikal a wayawaya ti maysa a tao gapu ta  agbasbasa iti pagadalan katolika wenno saklawen dagiti pagannurotan ti Student Handbook, kinuna pay ti SCAP.

Dimmanon payen daytoy iti imatang dagiti agtuturay ti Department of Education. Iti kaudian a report, impasingked ni DepED Assistant Secretary for Legal Affairs Tonisito Umali a kitaenda daytoy a kaso agsipud ta addan naidatag a kaso maikontra iti STC High School Department.

Kangrunaan a pangituonan ti imatang ti DepEd no maikanatad ti pannusa iti  nagbasolan ti balasitang a panagparetratona a nakaaruat iti two-piece a pagdigos a nakaiggem iti nakasindi a sigarilio ken botelia ti arak.

Kinuna ni Umali nga adda iti ikub ti kalintegan ti pagadalan a mangipakat iti pannusa iti estudiante nga iti paniriganna ket nakabasol wenno naglabsing kadagiti pagannurotan ken paglintegan ti pagadalan agsipud ta addaanda iti bukod a manual a mangsaklaw iti operasionda kasta met dagiti annuroten a suroten dagiti estudiante ken iti maipakat a pannusa no salungasingda dagitoy.

Kinuna pay ti opisial a kitaenda no agpayso a saan a napalugodan nga agmartsa laeng ti estudiante.

Inyunay-unay ti nasao nga opisial a sabali a banagen no saan a mapalubosan nga agturpos ti estudiante maigapu iti panagparetratona a nakaaruat laeng iti pagdigos ken adda pay iggemna a sigarilio ken botelia ti arak.

Sabali met nga opisial ti nagkuna a kas sagudayen ti paglintegan, saan a mapalubosan ti estudiante nga aggraduar no maigapu iti rason nga academic wenno adda dina nairuar nga asignaturana. Ket no salungasingen ti pannusa ti paglintegan wenno pagan-nurotan ti pagilian, mabalin ti DepEd ti sumngat, segun iti maysa met nga opisial.

Mapadpadaanan ngarud no ania ti pagbanagan daytoy a kaso.

Ketdi, adda dakkel a leksion a maullom iti daytoy a pasamak, nangruna dagiti amin a mahilig nga agiposte iti uray ania ditan a retrato ken  impormasion maipapan kadakuada iti Facebook.

Iti daytoy a moderno a panawen, nagdarasen ti ag-upload iti uray ania a banag iti internet. Ngarud, no nagiposteka iti maipapan kenka iti Facebook nangruna kadagiti personal a bambanag nga iti laeng pribado a lugar ti pakabuyaanna, saanka nga agkammatalek nga adda posibilidadna nga iti laksid ti pannakaammom, mabalin a ‚Äúnaibinglayen‚ÄĚ dagitoy ket pagpipiestaanen ti sangalubongan.

Madakamatmi ditoy ti maysa a balasang a nangretrato iti bagina a lamolamo sana nagay-ayaman nga imposte iti Facebookna. Naglak-am daytoy a balasang iti nakaro a pannakaibabain agsipud ta adda nakastrek iti accountna ken nakasungkit iti retratona ket impatulodna metten kadagiti nadumaduma a tattao agingga  a nagtungpal iti panagramaram ti retrato iti internet.#