sinursuran-banner-sqSinursuranNi Jobert M. Pacnis

Ti Maika-48 a Kombension Dagiti Mannurat nga Ilokano

Sinursuran:  Kolum ni Jobert M. Pacnis

(Maudi a paset)

 

Dua nga on-the-spot poetry writing contest ti naituyang. Maragsakanak la unay ta napagasatan dagiti entry-k. Nupay Maikalima ken Maikapat a Gunggona, saan a mailadawan ti ragsak nga immapay kaniak. Ag-pitopulo ken aguppat a pulo dagiti entry itoy agduma a pasalip. Ket saanen a dakes dayta a nagun-od.

Naitampok pay ti pannakapili ken pannakabalangat ti Mrs. GUMIL iti nasao a kombension a nakaipabuyaan metten kadagiti bukodtayo a kultura nga Ilokano kas iti sala ken kankanta. Permi a ray-aw dagiti nagbuya aglalo ta adda gayam balasang a principal a naglaing nga agkanta iti Ilokano!

Ngem ti di malipatan dagiti amin a dimmar-ay, isu ti ipapasiarda kadagiti nadadaeg a buya nga ipaspasindayaw ti probinsia ti Apayao aglalo la unay ti ili ti Luna.

Immuli ti grupo iti Marag Valley a malagip nga idi katibok ti insurhensia,  naawagan daytoy a No Man’s Land. Mapagbutbutngan idi ditoy a lugar ta adu dagiti “kakabsat” a simmina iti gobierno. Ngem itan, nakadadaegen a disso.

Ditoy, pinasiar dagiti delegado ti agdindinamag a Marag Rock Formation. Permi a siddaaw ti tunggal maysa ta adda gayam ti kastoy nga iduldulin ti Marag. Nupay makabannog ti umuli, kumalipkip kadagiti batbato, mapukaw amin dagitoy no addakan iti tuktok a pakaimatangam ti immuleg a karayan ken dagiti bangkag.

Napanan met ti dadduma (aglalo dagiti di makabael nga umuli iti Rock formation) ti hanging bridge (a kayo) a namagkonektar kadagiti barangay iti Marag Valley. Ken ti shrine a nairuknoy kadagiti maibilang a bannuar iti dangadang a napasamak kadayta a lugar. Saan laeng a dayta. Nagpasiar pay ti grupo iti Manacota cave and underground river.

“Napimpintas ken nalitlitnaw pay ngem idiay Palawan underground river,” nakuna la ket ngarud dagiti dadduma.

Dagiti saan a nabaelan dagiti luganda ti immuli iti Marag Valley (a madama a masemsemento, saan a kas idi tawen 2014 a damo a yuulitayo, a rough road pay laeng), saanda latta met a naikapis lattan. Pinasiarda ti Lussok Cave iti barangay ti Dagupan (iti Luna met laeng). Adda met laeng underground river daytoy. Kuna dagiti tour guide, no talaga a suroten dagiti sanga ti kueba, mabalin a malemton a makaruar ti asino man. Ngem kaaduanna nga agingga laeng iti pannakalussok/pannakabuttaw ti pagruaran dagiti turista.

Idi agkikitan dagiti delegado iti pakaang-angayan ti seminar, mailadawan ti ragsak ti tunggal maysa. Ken pannakapnek.

Ngem saan laeng a dagitoy a nadadaeg a buya ti maipagpannakkel  dagiti taga-Marag. Maipangruna ditoy ti kinamanagtulongda.

Maysa a lugan dagiti immuli iti Marag Valley ti nabitin iti isasang-atna iti dalan. Kapilitan nga immulog dagiti kargana ket induronda daytoy. Nalabsan ida dagiti pasahero (adayo pay ti Tanap a yan ti purok) nga agindeg a nakalugan laeng iti habal-habal (kas kadagiti mabuybuya iti telebision). Pinasardengda ti luganda ket impaigidda pay laeng ti habalhabal iti bakras ti bantay. Timmulongda a nakipagduron (nupay babai ti dadduma kadakuada).

“Bilibak,” kinuna ti maysa a babai a nobelista. “Ditoy pay laeng ti pakakitaam dagiti pudpudno a tao. Agasem, uppatda iti habalhabal agraman drayber ket marigatan ti luganda ta agsang-at ken nabato idiay a paset, ngem naalada pay laeng ti nagsardeng tapno tulongandakami laeng?”

Wen, no agtultuloy daytoy a tampok a kababalin dagiti i-Marag, saan nga adayo a maam-ammodanto iti pagilian, no di man iti Sangalubongan, kas managayat nga indibidual. Ket ad-adunto manen ti mangbisita kadagiti ipagpannakkelda a buya a mangpandag iti nasaem a napalabasda.

Tunggal kombension, adda ket adda latta mapidut nga adal. Ket saanakto a maum-uma a tumabuno agingga’t kabaelan ti salun-at.

Sika, kabsat, kaanokanto met a makadinnakulap iti kombension?