Footer

Ti mantsa a pinarnuay ti kontrobersial a Licensure Exam

Sabali manen a nasaem a bukol iti lulonan ken dakkel a siit iti karabukob ni Pinoy ti deklarasion ti Estados Unidos a makatawen a ban iti licensure examination para kadagiti amin a physical therapist  iti Philippines, Egypt, Pakistan ken India kalpasan a natakuatanda a saan a naragpat dagitoy dagiti allagaden ti Federation of State Boards of Physical Therapy (FSBPT). Ti FSBPT ket buklen ti 53 a physical therapy licensing authorities a mangannong iti licensure exam para kadagiti physical therapist iti Estados Unidos ken iti sabali a pagilian a mangayat nga agtrabaho sadiay. Ti makatawen a ban ket nagapekto ken nangrugi ita a tawen ken posible nga aggibus inton umay a tawen 2011, no la ket suroten ti pagilian amin nga allagaden ken rekomendasion ti  FSBPT.

Napasamak ti pannakabalusingsing dagiti allagaden ti FSBPT idi 2007 kalpasan a natakuatanda a ti St. Louis Review Center (SLRC) iti pagilian ket kinopiada dagiti dadduma a parte ti National Physical Exam (NPTE) idi 2005 ken 2006 a kas review questions kadagiti reviewersda. Ti National Bureau of Investigation ti nangaramid iti nainget a panagusisa iti alegasion.

Ngem inrason ti SLRC a saan a nainkalintegan ti deklarasion ti Estados Unidos ta bukodda a research dagitoy a saan ket a kas iti alegasion a leakage kadagiti kallabes nga exam. Ken maysa, inwaragawag ni Dr. Roger Tong-an, presidente ti SLRC, nawaya met a magatang kadagiti bookstores sadiay Estados Unidos dagitoy a questionnaires nga isu ti impaaramatda kadagiti reviewersda.  Inkalintegan ti SLRC ti biang ken sasaadenna iti maysa a remote conference a nakairamanan dagiti pannakabagi ti Philippine Overseas Employment Administration (POEA), Department of Labor and Employment (DOLE) ken dagiti opisial ti Review Center of the Philippines (RCP). Ngem trinato latta ti Estados Unidos ti kastoy a kaso a kas exam leakage.

Awan ti naaramidan ti SLRC ken RCP itoy a pangngeddeng. Nupay kasta, panggep ketdi dagiti naapektaran ken mangkitkita iti pagsayaatan dagiti amin a physical therapist ken dadduma pay a maseknan ti agapela iti Estado Unidos nga itedna koma ti konsiderasion ti pannakaibabawi ti pangngeddengda, kas maibasar iti agdadata a kinapudno.

Adu dagiti nageksamen iti nangdillaw ken nangbabalaw iti review center ta simmipnget la ket ngarud ti namnamada a makapagtrabaho sadiay Estados Unidos. Namnaminsan a pinunas daytoy nga enkandalo ti American Dream a nabayag a tinagtagibida.

Kaanonto aya nga agpatingga dagiti kontrobersia ken isyo a mangirareb kadagiti licensure examination?

Maipalagip nga idi 2006, nagbalin a sentro ti kontrobersia ti pagilian iti sangalubongan gapu iti mapapati a leakage ti eksamen iti nursing. Mapapati a naipaima kadagiti nageksamen ti sungbat dagiti saludsod iti Test III wenno ti Medical Surgical Nursing ken ti Test V wenno Psychiatric Nursing, sumagmamano nga aldaw sakbay ti eksaminasion. Immuna a napasamak ti leakage iti Baguio sa nagwaras iti sibubukel a pagilian. Gapu itoy, nagriri ti kaaduan a nageksamen, ti Philippine Nurses Association ken ti asosasion dagiti dean ti nursing dagiti nadumaduma a kolehio ken unibersidad. Gapu itoy, inkapilitan a naisayangkat manen ti eksamen iti Test III ken Test V ngem gastosen ti gobierno. Ket idi Enero 21 iti daytoy a tawen, inayonan ti Court of Appeals (CA) ti pangngeddeng ti Professional Regulation Commission (PRC) a pannakakansela ti lisensia dagiti examiners a naimbolbar itoy a kaso.

Inrason ti CA a minansaan ti test leakage scandal ti integridad ken nangipaay iti panagduadua iti “fitness and competency of the entire Philippine nursing industry, which for years has sought to prove to the world that our country can produce competent, reliable and trustworthy health care professionals.”

Iti daytoy a pangngeddeng ti Court of Appeals, mabalin a naalay-ayan bassit ti kontrobersia a pinarnuay ti eskadalo ti leakage ti eksamen dagiti nars.

Ngem maallangon pay ngata ti CA babaen dayta a desision ti narabngis a dayaw dagiti nakaruar iti eksamen nga awan a pulos ti nakainbolbaranda iti nasao a kontrobersia?

(Adda tuloyna)