Ti Mayo ken Disiembre a relasion

Salaysay ni Christine Marie Verzosa

(Maudi a paset)

 

Inyam-ammo ngarud ni Lilian ni Hubert iti inana, a nabayagen a balo, ken ti adingna a babai. Duduada nga agkabsat. Nasutil ti ekstraordinario a pasamak. Iti siddaw ti inada, ni Hubert ti sigud a kaayan-ayat ti ina – ti insinana a di man la nagpakada!

Ti twist iti labistori: Ti balo nga ina, kasla rimmaniag manen ti lubongna ta tunggal bumisita ni Hubert ket isu iti mangenterten. Nadekdekket payen ti balo nga ina ngem ti anak a kaayan-ayat. Lalo no ipalagipna dagiti sweet momentsda a dua. Agingga dimteng ti panawen a nasken a mangeddeng dagiti agayan-ayat – agkallaysadan. Nagsangit pay ti ina. Ne, apayen? Kuna ni Hubert, ti relasionda idi iti ina, ket paset ti napalabas; isuda ken Lilian iti agdama ken iti masakbayan. Agpadada ken Lilian iti marikrikna – mutual feeling ti adda kadakuada.

Nagasawa ngarud da Lilian ken Hubert ken nagnaedda iti bukodda a balay ket naaddaanda iti uppat nga annak. Pagwadan nga asawa ni Hubert, kasta met ni Lilian.  Ti balo nga ina? Well, “the greatest grandma” a kuna dagiti appokona.

Nupay mapaspasamak daytoy iti gimong, sumagmamano laeng dagiti naballigian a relasion ti Mayo ken Disiembre.

Makuna a sineknanda iti manakem nga ayat wenno mature love. No daytoy ti nangsallukob wenno nagserbi a kas mangiwanwan iti rikna tunggal maysa, ibalam man ida iti kanion wenno ipasakaymo ida iti agsinsin a kabalio nga agsina iti pagturongan iti ungtona agtugmok latta ti riknada, a dida ikaskaso uray asino ti agdepdeppa iti nagbaetanda.

Iti termino dagiti Anggalog, “kapalaran” wenno “iginuhit ng tadhana” a kunada. Kadatayo nga Ilokano, “inkur-it ni gasat” iti panagtugmokda – panagsabat ti riknada a dua. Soul mate kunada iti English, ta addaanda iti maymaysa a rikna, maymaysa a nakem ken pagduyosan. Saan a lapped iti relasionda ti adayo a baet ti edadda.

Iti dayta a relasion, awanan kaipapanan wenno arkos laeng iti bibig ti madagdagus a pananghusga. Ta maysa a burburtia ni ayat a saan a maawatan wenno saan a maadal no di ket datayo a tattao iti aglawlawda ti adalanda iti umno a kaipapanan ti biag.

Isuda laeng ti makaited wenno mangibuksil iti umno a depinision wenno pudno a kaipapanan ti relasion ta nabukel ti riknada nga is-isuda laeng ti maseknan nga awan ti naisengngat wenno simmapit. No kasano nga inapresiarda wenno inawatda dayta nga ayan-ayat base iti bukodda a pagalagadan ken ingpen nga ikut ti agbalin a katakunaynay iti biag.

Iti ababa a pannao, agkalebelda iti amin nga aspeto – nga awan ti nangatngato wenno nababbaba, nga iti panaga-sawada ket naaramiden ti panagmaymaysa saan laeng a ti bagi, rikna ken kapanunotanda no di pay dagiti material a banag a napateg kadakuada. Ti istabilidad ti relasionda ket napukaw iti anniniwan ti kinaderrep ken managinkukuna.

Kangrunaan a sanguen ti Mayo ken Disiembre a relasion dagiti agsasamusam a lapped iti inda panagbaniaga iti biag. Ngem iti biag, saan laeng nga isuda ti sumangsango itoy no di ket ti asinoman a mangtaltalunton iti biag a napnuan kaipapanan.

Dagitoy dagiti isyo a linaktawda a sibaballigi: problema iti kinadekketda – dagiti isyo itoy ket masolbar babaen ti kinaawan panaginkukuna ken kinaadda iti pannaakawat ken agnanayon a silulukat a komunikasion; saan a balanse a bileg nga agnanayon a mangtingtingiting iti kaipapanan ti relasion – ti nakalawlawa a pannakaawat ti solusion itoy; panagtalek – lumtaw latta daytoy lalo iti biang ti natataengan gapu iti insekiuridad; kinaawan ti panagtalek ken kinapudno wenno kinaawan ti komunikasion nga agserbi a kas rangtay a pagsasabatan ti riknada; addiction wenno iti biang ni ub-ubing, agdepende lattan ken ni nataengan lalo iti piskalia a saritaan – kinaawan ti bukod a disposision ken saan a nalawa ti mugingna iti pannakaawat ti biag ti kayat a sawen daytoy – ket ti  naimpusuan a panagsarita ken panangipaawat iti situasion ti solusion; pannakarikna iti stress gapu iti panagbaliw ti lubongda a naisalumina iti ikub ti ekspektasion – ti silulukat a komunikasion ken nalawlawa a pannakaawat ti kasapulan tapno malaktaw daytoy a lapped; ti lapped a gubuayen ti pamilia – siempre, saan a maawan daytoy, lalo iti pamilia ti mas nabakbaknang ken nataengan ta lumtaw latta ti panagipapan a ti kuarta ken seguridad ti inalman ni katakunaynay – masolbar laeng daytoy babaen ti panangipa-neknek a nagbiddutda laeng – kitaen ti labistori da madam ken ti naubing nga asawana a kas ehemplo; parikut iti salun-at, no adda maseknan  ken karaman iti saritaan – no napudno ti panagayat saanna met a bigbigen daytoy nga isyo, ken; inayonen dagiti saan  a nasolbar nga isyo iti napalabas a pakaibilangan ti napalabas a relasion ken dadduma pay – ngem ti napudno nga ayat saanna a bigbigen ti napalabas ta ti kaskenan ket ti agdama ken ti masakbayan – ti napalabas ket napalabasen.

No malaktaw dagiti maseknan dagitoy a lapped, well, awan ngarud iti sabali pay nga ited kadakuada no di awan panaginkukuna a panagtung-ed ken nakalawlawa nga isem ta karbenganda a takderan ti minulida a panagbiag.

Ti Mayo ken Disiembre a relasion ket maysa nga ekstra ordinario nga ayan-ayat a para laeng met kadagiti addaan iti ektra ordinario a talugading ken kinatao.#