Ti Naisab-it a Sangguniang Kabataan

Salaysay ni Rilo Bido

(Maikadua a paset)

 

ITI panangimutektek ti nailian a bannuar, ni Dr. Jose Rizal, dagiti agtutubo ti namnama ti pagilian. Pudno la unay dayta. Ngem ania koma pay ti namnamaen kadakuada no sabali metten a dana ti inda taltaluntonen?

Iti pakasaritaan ti politika iti pagilian ket tumpuar latta dayta kinaadda ti tendensia ti panagsisina imbes a panagkaykaysa gapu dayta iti panagiinnagaw iti takem. Ti bileg ti magemgeman a poder iti kagimongan ti lumtaw a kangrunaan a makagapu.

Nupay kasta, addaanda ketdi iti mandatos a pagibatayan ti eksistensiada.

Nabuangay ti SK idi 1975 babaen ti naganna a Kabataang Barangay. Iti pannakapadisi ni Presidente Marcos, nairaman metten a naginana. Ngem napagungar idi 1985, nasukatan laeng ti naganna, napagbalin a Sangguniang Kabataan.

Adda ketdi mandatos a naipaay iti pannakabuangayda. Kas sagudayen ken ibasar iti 1987 Constitution, iti Section 13, Article II, … the state recognizes the vital role of the youth in nation-building and shall promote and protect their physical, moral, spiritual, intellectual and social well-being. It shall inculcate in the youth patriotism and nationalism and encourage their involvement in public and civic affairs.

Saan ngarud a masasaan iti kinaadda ti karbenganda a maaddaan iti maymaysa a timek iti sosiedad, iti gobierno.

Ngem ti rigatna, kas kadagiti naagapad iti ngato, limmaksid iti mulinaw a panggep ti pannakabuangayna iti sabali a pakausaran.

Adda pay ketdin ti panagadal ti Department of Interior and Local Government babaen ti panangidaulo ni Secretary Mar Roxas, iti pannakawaran daytoy. Ni kano mismo presidente iti nangiddaw kadayta a banag kadakuada.

Kastoy ti panagsarita ni presidential spokesman Edwin Lacierda iti maysa a press briefing maipapan itoy a banag: “As I have mentioned, the President has asked [the] DILG to study the SK. There were calls, I understand, remember a few weeks back or even months back to abolish the SK. The President has asked Secretary Mar Roxas and the DILG to study that matter…”

Uray dagiti senador ket adda saan a mangayon iti pannakaituloy pay daytoy.

Kastoy ti palawag ni Senador Edgardo Angara, kunana: “The SK election is an experiment conducted by the government in the 80s to gauge the participation of the youth in the governance of the country. However, after almost 30 years, I believe that the SK has already outlived its usefulness,”

Atiddog kanon dayta agtallopulo a tawen wenno duapulo ket walo a tawen tapno eksakto, a panawen iti eksperimento. Nalawag a maidasigen ti pagsayaatan ken pagdaksanna, ti imbunga daytoy nga eksperimento.

“We have to consider the fact that we’re exposing the youth to politics – Philippine style, which we all know is a no-holds-barred avenue. I am concerned because we are accelerating the entrance of such malleable, impressionable minds into Philippine politics and all its less-than honorable practices,” innayon ti senador.

Nupay kasta, isiksikkir met ti Kabataan party-list a reporma saan ket a pannakawara ti nasken koma a mapasamak; iti reporma dumteng pay laeng ti panagbalbaliw, ngem iti pannakawara, nagpinalen ti pakasaritaanna. Impettengda ketdi a maisina koma ti SK iti poder ti barangay tapno maaddaanda iti independensia a mamagtignay iti bagbagida.

Ad-adu manen ti saan a nangayon iti daytoy. No saanda la ngaruden a matengngel ken maurnos ti bagbagida, itedmo pay la kadakuada ti panagwaywayas? Di mas lalon ti pannakaiyaw-awanda, kunada met.

Kastoy ti panangipalawag ni Kabataan Party-list Representative Terry Ridon, “Minsan, ang barangay officials ang nag-uudyok na mangurakot at maging instrumento ng korupsyon ang SK…” palawagna iti panagsaritana GMA News Online.

Ti pannakipasetda iti nation building ti positibo a rason no apay a nabuangay ti SK, ngem nabatekan iti negatibo ti resulta.

Rumbeng kadi pay a maituloy wenno nasken a mawaran ti SK?#