Ti Nalimed a Lalaki iti Biag ni Misis Artates

Sarita ni Salvador A. Espejo
Maikasiam a paset

Agsasaruno ti panagsusop ni Rick. Sangkakitana ti sungaban. Iti nagkurusan, kutkutingtingen ni Jojo ti kotsena. Tallo a kotse iti labesna, agur-uray metten ni Bert. Tallodan a mangsurot ken ni Mrs. Artates.

Agpadpadaan metten ni Derek iti sango ti opisina ti detektib a tangtangdanan ni Misis Artates. Addan pammilin ni Rick a no rummuar ti detektib, suroten ni Derek sadino man a papananna. Siguraduen ni Rick nga agsarak ti detektib ken ni Misis Artates iti prearranged a lugar ket ti detektib ti mangited iti go-signal ken ni Misis Artates nga agturong iti papananna apaman a madispatsana ti sumursurot iti klientena. Ngem ita, siguraduenna nga awan mintis ti planoda. Maysa a blackbelter ni Derek ket lukmo ti pagtungpalan ti detektib no agir-irrado.

Nagkiriring ti selpon ni Rick. Naggapu ken ni Derek. Rimmuaren ti detektib.

“Natawagan siguron ni Misis Artates. Dimo ipadlaw a sursurotem. Siguraduek nga agsasaraktayonto iti maymaysa a disso,” kinuna ni Rick.

Kalpasan ti sumagmamano a minuto, naluktan ti ridaw ti balay ni Davis Artates ket nailua ti kotse ni Misis Artates.

Idi makaadayo bassit ti kotse, simmurot ni Jojo. Sinurot ni Rick ti kotse ni Andy. Sumarsaruno met kenkuana ni Bert.

Kalpasan ti sumagmamano a nagkurusan, addan iti sango ni Misis Artates ti lugan ni Bert; iti likudanna ni Jojo idinto a sarsarunuen ni Rick ni Jojo.

Kalpasan ti nakurang tallupulo a minutos, insardeng ni Misis Artates ti luganna iti sanguanan ti Naty’s Clothier. Imbilin ni Rick babaen ti cell phone ti panangsurot ni Bert ken ni Misis Artates iti uneg. Impaigidna ti kotsena ket naguray.

Madamdama, nasaripatpatan ni Rick ti detektib a bimmaba iti asideg ti Naty’s Clothier. Simrek iti uneg. Di mabayag, limmabas met ni Derek. Intag-ay ni Derek ti tanganna sa nagsardeng iti asideg ti nagpikuran. Dimsaag sa simrek iti pagtagilakuan.

Limmabas ti kagudua ti oras. Tinawagan ni Rick ni Bert ket dinamagna no ania ti ar-aramiden ni Misis Artates. Insungbat ni Bert nga agpilpili ni Misis Artates iti pagan-anay ket simbrek iti ladies’ room tapno ipadasna dagitoy.

Tinawaganna ni Derek no ania ti ar-aramiden ti detektib. Adda kano kapatpatangna iti selpon iti abay ti ridaw.

Kellaat, lininteg ni Rick ti panagtugawna idi masaripatpatanna ti nakaanteohos ken atiddog ti buokna a babai a rimmuar iti pagtagilakuan. Nupay sabali ti blusa ti babai ken atiddog ti buokna, siguraduenna a ni Misis Artates. Mabalin a nagsukat iti pagan-anay iti ladies room ken nagsuot iti wig.

Tinawagan a dagus ni Rick ni Jojo ket imbilinna a surotenna ti babai nga atiddog ti buokna ken nakaanteohos.

“No problem, bossing,” kinuna ni Jojo. Naggunay ti luganna iti direksion a nagturongan ti babai.

Timmaliaw ni Rick iti ruangan ti pagtagilakuan idinto a pinagandarna ti luganna tapno surotenna ni Jojo. Makarkarattot ni Bert a rimmuar, tumanalangkiaw.

Iti dayta a darikmat, inlua met ti ridaw ti detektib ket dinalapusna ni Bert. Naiparusisi ni Bert iti bangketa.

Agrukob koma ti detektib a mangbatak ken ni Bert idi kellaat met a rimmuar ni Derek sana dinungpar daytoy. Naidaramudom ti detektib ket naipalladaw ti iggemna a selpon.

Kasla di nakita ni Derek ti selpon ket binaddekanna.

Umis-isem ni Rick a nangpanaw iti eksena. Nupay dina mangeg ni Rick ti pagpapatanganda, ammona lattan nga agrirriri ti detektib gapu iti pannakarim-it iti selponna idinto a rirririen met ni Bert ti detektib gapu iti pannakaidaramudomna.

Nagbalinen nga inutil ti detektib. Awanen ti pangkontakna ken ni Misis Artates!

Nalabsanna iti asideg ti nagkurusan ni Jojo. Iti bangketa, agur-uray iti taksi ti atiddog ti buokna a babai a nakaanteohos. Linabsanna ni Jojo sana pinaginayad ti luganna.

Nagkiriring ti selponna. Ni Jojo. Limmugan kano ni Misis Artates iti puraw a taksi.

Babaen ti side mirror, nakitana ti sumungad a taksi. Binay-anna a linabsan daytoy sa simmaruno. Dua a kotse iti likudanna, sumursurot ni Jojo.

Nagkiriring ti selponna. Ni Derek. Awan kanon ti reklamo pay ti detektib iti narim-it a selponna kalpasan a dinusagna naminsan ti bakrang daytoy.

Agkatkatawa ni Rick a nangibaga nga agsublin da Derek ken Bert iti opisinana.

Saan a napataray ti taksi ni Misis Artates ket saan a narigatan ni Rick a nangsurot. Adda latta met ni Jojo iti likudan nga umip-ipus.

Naginayad ti taksi iti sanguanan ti Benjo’s Store. Maysa a lalaki ti dagdagus nga immasideg iti taksi sa limmugan. Naggunay ti taksi nga agturong iti Pasig.

Nakitem ti sangi ni Rick bayat ti panangsurotna iti lugan. Anianto ti rikna ni David Artates a makangngeg iti reportna?

(Maigibusto)