Ti Nalimed a Lalaki iti Biag ni Misis Lilibeth Artates

Sarita ni Salvador A. Espejo
Maikanem a paset

Nagkiriring manen ti selponna. Ni Jojo. Dimsaag kano ni Romeo Alabastro iti nagsulian ti kalsada Rivero ken Crisologo. Simrek iti ababa nga eskinita sa immuneg iti dua kadsaaran a balay.

Iti panagpalutpot ni Jojo, naammuanna nga agkaskasera ni Alabastro iti entresuelo.

Insurat ni Rick ti numero ti balay ken kalye. Addanto tiempo a sarungkaranna ni Alabastro.

“Ok, mabalinmon ti agretiro,” kinunana. “Agkitatanto laengen no bigat.”

Impaigid ni Rick ti kotse iti asideg ti nagpikuran. Manipud iti yanna, nalawag a makitana ti pumanaw ken sumangpet iti pagtaengan ni David Artates.

Dandani alas sais idi pumanaw. Aggawid metten. Kapkapnekanna a saanen a pumanaw ni Misis Artates.

Nakamurareg ni Rick bayat ti nabannayat a panagmanehona. Anianto ti rikna ni Artates no maammuanna nga adda sabali a lalaki iti biag ni misisna?

NAGTUGTOG ni Rick iti agkuskusapo a ridaw. Nakangeg iti kayaskas ti sinelas. Madamdama, nagbingngi ti ridaw ket naitangkarang ti rupa ti maysa a lalaki. Babaen ti panangiladawan ni Jojo, ammonan a ni Romeo Alabastro daytoy.

“Adda masapulmo?” sinaludsod ni Romeo.

“Adda laeng sumagmamano a saludsodek, Mr. Alabastro,” insungbat ni Rick. “Maipapan ken ni Lilibeth Artates.”

Kellaat, naiyurit ti aligagaw iti mata ni Alabastro. Pinanggepna nga itangep ti ridaw ngem induron ni Rick sa immuneg.

“Pari, pumanawka laengen no dimo kayat nga umawagak iti polis,” imballaag ni Alabastro.

“Adda met pagtawagam ditoy,” intudo ni Rick ti telepono iti suli ti nakipet a salas, “dika lapdan a mangayab iti polis.”

Nagtugaw ni Rick sa nanindi. Nagtalinaed ni Romeo a nakatakder, nakadalikepkep.

“Idi kalman, nagsarakkayo ken ni Misis Artates iti maysa a restaurant,” kinuna ni Rick idinto a pinerrengna ni Romeo.

“Ania koma ti dakesna?”

“Mabalin nga iti panirigam, awan ti dakesna. Ngem no agsarak iti nalimed ti maysa a baro ken babai nga addaan asawa, sabali ti kaipapananna iti asawa ti babai, saan kadi?”

“Sinoka, poliska?” nagtigerger ti timek ni Romeo.
“Bistadokan, pare,” saan a sinungbatan ni Rick ti saludsod. “Ammomi ti gandatmo ken ni Misis Artates. Kayatmo laeng a gatasan!”

“Nagbiddutka!” insungbat ni Romeo. “Awan gandatko a kasta ken ni Lilibeth… ni Misis Artates!”

“No awan, apay a rukirokem ti natalna a biagna iti sidong ni David Artates? Saludsodem ta bagim: Kasano a naduktalanmi ti kinasiasinom? Dakkel ti suspetsa ni Mr. Artates a sika ti lalaki ni baketna ket pinaimbestiganaka!”

Nabayag a di nakatimek ni Alabastro. Ngem saan a nailaksid iti mata ni Rick ti pannakaiyurit ti buteng iti rupa ni Alabastro.

(Adda tuloyna)