Ti Nalimed a Lalaki iti Biag ni Misis Lilibeth Artates

Sarita ni Salvador A. Espejo
Maikawalo a paset

Bayat ti panagdaliasat ti kotse ni Rick iti C5 nga agturong iti pagtaengan ni David Artates, aglalaok dagiti agampayag iti panunotna. Kasla dina patien ti impalgak ni David Artates nga adda sabali a lalaki iti biag ni misisna.

Daytoy ti rigat ti makaasawa iti ubing ken nalapsat ken di namunganay iti ayat, naisanamtekna.

Immuneg ti kuretret iti muging ni Rick idinto nga inamirisna daytoy baro a situasion. Mamati itan a nagbalin a naannad ni Misis Artates agsipud ta posible a nadlawannan nga adda suspetsa ni David Artates nga adda ilimlimedna nga ar-aramiden. Ngem saan ngata a naamiris ni Misis Artates nga awan ti palimed a di maibulgar iti masakbayan? Aniaman a bulok, uray ikalim iti kaunegan nga abut, agalingasawto latta ti buyokna.

Pagammuan, nagkiriring ti selpon ni Jojo.

“Karuruar ni Misis Artates iti pagtaenganda,” kinuna ni Jojo. Naglugan iti nangisit a kotsena. Urayenka wenno surotek ti luganna?”

“Surotem, dimo sinaan, uray ania ti mapasamak. Pakaammuannak iti lokasionmo tunggal lima a minutos. Pattapattam a turongenna?”

“Sabali ti rotana ita. Pampanurnorenmi ti Soller Avenue. Natrapik ditoy ket tallo laeng a kotse ti baetmi. Diak unay as-asitgan tapno di makadlaw.”

“Wen, mentenerem ti distansiam kenkuana. Padasek ti kumamakam.”

Nagpakannigid ni Rick ket simmalput iti Libertad Street. Ngem nakaro ti trapiko nupay alas dies pay laeng ti bigat. Nagsakuntip ni Rick idi nagsilaw ti nalabaga idi bumallasiw koman iti rotunda. Namrayanna nga impallailang ti sintonado a sagawisiwna tapno maiyaw-awanna ti pannakatektekna.

Nagkiriring ti selponna. Ni Jojo.

“Adtoyak sikigan ti Mabel’s Gift Shop iti abagatanen ti Farmer’s Mall. Simrek ni Misis Artates iti uneg. Lima minutosnan iti uneg. Mapanko palabsan a kitaen.”

“Ok. Amangan no nalibasanka manen.”

Madamdama, timmawag manen ni Jojo.

“Adda kapatpatangna iti selpon idinto a sangkataliawna ti ruar. Panagkunak ket adda tagtagiurayna.”

“Agsublika iti kotsem ta idiay ti pagwanawanam. Tallo laeng a kanto ti kaadayok iti yanyo. Siakto ti sumublat a mangsurot ken ni Misis Artates.”

Nagbaliw ti kolor ti silaw ti trapiko ket iniddep ni Rick ti selponna sana indisso iti tugaw iti abayna. Nagsikko iti Soller Avenue.

Madamdama, nataldiapanna iti makannigidna ti Mabel’s Gift Shop. Apagapaman a tinung-edan ni Jojo nga adda iti uneg ti kotsena a naiparada iti ballasiw ti kalsada sumagmamano a metro iti amianan ti shop. Imparada ni Rick ti luganna iti labes ti Rose Novelty Shop iti abagatanen ti Mabel’s Gift Shop.

Ngem di pay nakadissaag ni Rick iti kotsena idi nataldiapanna ni Jojo a makarkarattot a rimmuar iti kotsena sa bimmallasiw iti kalsada. Idi tumaliaw iti sanguanan ti Mabel’s Gift Shop, nasaripatpatanna ti likudan ni Misis Artates a napardas a nakilaok kadagiti tattao sa nagsikko iti makannigid.

Agsubli koman ni Rick iti kotsena tapno tulonganna ni Jojo a mangsurot ken ni Misis Artates idi mataldiapanna ti lalaki a sipapardas a rimmuar manipud iti Mabel’s Gift Shop sana dinalapus ni Jojo. Saan a nakontrol ni Jojo ti bagina ket naiparusisi. Binatak ti lalaki a pinatakder.

Nagkuretret ti muging ni Rick. Nalagipna daydi panangdalapus met kenkuana ti maysa a lalaki idi surotenna koma ni Misis Artates kalpasan ti panaggatangna iti maysa a pagtagilakuan. Ita, addan nabukel a suspetsa nga immappayaw iti panunotna. Rinanta ti lalaki a dinalapus ni Jojo!

Kellaat a nangeddeng ni Rick. Dagus a limmugan iti kotsena sana sinurot ti lalaki a mangun-unor itan iti bangketa nga agpaabagatan.

Nagkiriring ti selponna. Ni Jojo.

“Bossing, diakon nagam-udan ni Misis Artates. Ngem nakitak a limmugan iti taksi.”

“Bay-amon. Ibueltam ta luganmo ta surotenta diay lalaki a nangdalapus kenka.”

“Ok, bossing,” kinuna ni Jojo nupay madlaw iti bosesna nga adda pannakasdaawna.

Iti sumuno a nagkurusan, bimmallasiw ti lalaki. Nagtalangkiaw nga immuna sakbay a limmugan iti maris-dapo a kotse a naiparking iti sango ti maysa a pagpalamiisan. Tinalunton ti kotse ti Morato Street.

Bayat ti panangsurot ni Rick iti kotse, agam-ampayag dagiti saludsod iti mugingna. Asino ti lalaki? Isu la ketdi ti tinawagan ni Misis Artates bayat ti kaaddana iti Mabel’s Gift Shop. Suspetsana a tinandanan ni Misis Artates nga agsiput iti likudanna, no adda mangsursurot kenkuana.

Nagsikko ti lugan iti kanawan sa simrek iti Harrison Street. Nainayad ti panagpataray ti lalaki, kasla mapnek iti agdama a taray ti lubong.

Madamdama, nagmenor ti lugan sa nagpaigid ken nagsardeng iti sango ti bassit nga opisina. Dimsaag ti lalaki sa agsagsagawisiw a simrek iti opisina. Napatak ti karatula iti ngatuen ti ridaw: Guevarra Detective Agency.

Nakitem ti bibig ni Rick a nanglabas iti lugan. Ammona itan no apay a kasla nasanay ni Misis Artates a mangiyaw-awan iti asinoman a mangsursurot kenkuana. Sinuruan la ketdi ti ditektib.

Insardeng ni Rick ti luganna iti sango ti pagkapean ket inurayna ni Jojo. Inseniasna ti yuunegda iti pagkapean.
“Su met la a nasiglat a mangiyaw-awan ni Misis Artates,” kinuna ni Jojo kalpasan a naipalgak ni Rick ti nasukalanna. “Adda met gayam tinangdananna a para siputna.”

“Ti bentahetayo ket dida ammo a bistadon ti tinangdananna a private detective. Inton sumaruno nga iruruar ni Misis Artates, uppattayonton a mangsurot kenkuana. Ipasiguradok met a madispatsa ti private detective tapno mapukaw a bangentayo a mangsurot ken ni Misis Artates.!

(Adda tuloyna)