Ti Nalimed a Lalaki iti Biag ni Misis. Lilibeth Artates

Sarita ni Salvador A. Espejo
Umuna a paset
AGAR-ARAMID ni Rick Mijares, ace investigator ti Majestic Investigation Services, iti reportna idi nagkiriring ti intercom. Ni Dolie, ti sekretariana.

“Sir,” adda klientetayo,” kinuna ni Dolie.

“Description?” kinuna ni Rick idinto a nangdutdot iti sigarilio sa nanindi. Dayta ti gagangay a saludsodna iti sekretariana no kasta nga adda baro a klienteda. Nalaing ngamin ni Dolie a mangkilatis iti kliente, banag a mangtulong kenkuana a mangikeddeng iti wagas ti pannakilangenna no sumreken ti kliente iti opisinana.

“Butiog. Natayag. Pamudawen. Mga 50-53 ti tawenna. Adda dangdang-as ti panagtigtignayna. Siento porsiento a siguraduek a nangato ti saadna iti gobierno wenno iti maysa a pribado a kompania. Isu ti tipo a no nangisit, kunana, nangisit lattan. Pastrekek kadin? Panagkitak, saanen a makatutor a makapatangmo. Ken, alistuam a lawinan, boss, ta panagkitak ket nalasag a kliente daytoy!”

“Ok, pastrekem,” kinuna ni Rick.

Nagliad ni Rick iti tugawna ket inurayna ti panaglukat ti ridaw. Madamdama, naikuadro ti kliente ket inkuyogna ti nangina a bangbanglo.

Iti apagdarikmat a panangpalabas ni Rick iti pakabuklan ti sangailina, immayon a saan a nagbiddut ni Dolie iti panangiladawanna iti kliente. Nabatad iti panagtigtignay ti lalaki ti ik-ikutanna a bileg ken turay.

Timmakder ni Rick sana indiaya ti imana. “Agtugawka, sir,” kinunana. “Ania kadi ti maipaay ti Majestic Investigation Services kenka?”

“Siak ni David Artates, presidente iti Jay and Jack Manufacturing Corporation,” inyam-ammo ti lalaki ti bagina.

Nagtung-ed ni Rick. Nangnangegnan dayta a kompania. Agparpartuat kadagiti ramit a maikabit iti computer ken selpon. Maibilang a maysa kadagiti 500 a kadakkelan a kompania iti pagilian.

“Saannakon nga agpalikawkaw, Mr. Mijares,” kinuna ti sangaili. “Kayatko a mangiwayatka iti nalimed a panagimbestiga iti misisko. Dakkel ti suspetsak nga agay-ay-ayam iti apuy. Kayatko a maammuan iti kabiitan a panawen no adda lalakina.”

“Saankayo a nagbiddut iti inayanyo,” kinuna ni Rick. “Ekspertokami iti dayta a banag. Namnamaenyo pay a nalimed ti iwayatmi a panagimbestiga. Isuna laeng ta nangina ti singirmi.”

“Saan a problema ti bayad iti serbisiom,” inyallawat ni David Artates. “Kayatko nga adda madagdagus a resulta ti panagimbestigam.”

“Namnamaenyo, iti uneg ti makalawas, addanton resulta ti panagimbestigami, Mr. Artates,” kinuna ni Rick.

“Nasayaat,” insungbat ni David Artates. “Rugiam itan nga aldaw.”

“No mabalin, kayatmi nga ammuen ti sumagmamano a banag iti biagmo, Mr. Artates. Routine daytoy iti panagimbestigami.”

“Agsaludsodka latta, Mr. Mijares.”

Inruar ni Rick ti kuadernona sa nagsaludsod. Naammuanna nga agtawen iti 50 ni Artates. Agnaed iti Fairview, Quezon Hill, Baguio City. Adda bugbugtong nga anakna iti immuna nga asawana a natay iti aksidente, ni Andy, agtawen iti 25, adda iti maudi a tukad iti Fine Arts iti maysa a kolehio iti Siudad ti Saleng.

Naammuan ni Rick a nalamiis ti langenlangen dagiti agama. Abogasia ti kayat ni David Artates a kurso ni Andy ngem panagpinta ti pagduyosan ti anakna. Daytoy ti puon ti saanda a panagkinnaawatan dagiti dua.

Uppat pay la a tawen a nagdenna da Artates ken ti asawana a ni dati a Lilibeth Castro. Inauna laeng ni Lilibeth iti makatawen ken ni Andy. Awan pay ti anakda.

“Adda inkuyogmo a ladawan ni misis?” inamad ni Rick.

Dinutdot ni Artates ti retrato manipud iti portpoliona sana inyawat ken ni Rick. Minatmatan ni Rick ti babai nga umis-isem kenkuana. Kaarngi ni Misis Artates ni Rossana Roces.

“Kaano pay a nagsuspetsakayo nga adda sabali a lalaki iti biag ti asawayo?” inamad ni Rick.

“Dandani makatawen itan. Masansan ngaminen a rumrummuar iti balay, saan a kas idi katiptiponmi nga adda laeng iti balay nga agkuditkudit. Adu dagiti pinabaliwanna iti balay, nangruna iti pannakaarkosna. Maysa ngamin a fashion designer. Idi damo, diak intaltalek. Nasayaat met nga agpalpaliwa sagpaminsan, nakunkunak iti bagik agsipud iti kinaawan ti bunga ti panagdennami. Ngem iti kallabes nga uppat a bulan, masansan metten a rummuar ti asawak iti balay ket naladawen a malem wenno sardam payen no sumangpet. No pagsaludsodak, ibagana a naidaw-as iti yan dagiti gagayyemna. Ngem mabilbilang iti ramay dagiti nasinged a papagayamna agsipud ta taga-Ilokos. Ngem uray man sumarungkar kadakuada, saan koma a kasta kasansan ken arig agpalned iti oras iti sibayda.”

“Awanen ti sabali a pamkuatanyo nga agsuspetsa?”

“Natakuatak a dakkel a kantidad ti inruarna iti bangko iti napalabas a nagsasaganad a tallo a bulan. Pangip-ipapananna iti kuarta no saan a ti lalakina?”

“Relaks lang, Mr. Artates,” kinuna ni Rick. “We guarantee, maammuam a dagus no pudno ti suspetsam.”

“Iti kabiitan a panawen,” kinuna ni Artates. “Adda bonusmo no adda resulta ti panagimbestigam iti uneg ti tallo nga aldaw.”

“Ok, iti uneg ti tallo nga aldaw, addanton resultana, Mr. Artates,” kinuna ni Rick.

“Saankon nga ipalagip a confidential daytoy, Mr. Mijares.”

“Agtalekka kadakami.”

Linuktan ni Artates ti portpoliona. Inruarna ti libritona iti bangko, kinur-itanna sana pinirmaan. Inyawatna ti tseke ken ni Rick.

“Inisial laeng dayta, Mr. Mijares. Sumaruno ti bukel a bayadna kalpasan ti panangidatagmo kaniak ti reportmo.”

“Di lumbes ti tallo aldaw, tawagankanto, Mr. Artates,” impatalged ni Rick.

Timmakder ni Artates, nakilamano sa pimmanawen.

Tinaldiapan ni Rick ti gatad nga inkur-it ti klientena. Napasul-oy. Lima ribu a pisos!

Nagliad ni Rick iti tugawna kalpasan a pinidutna ti retrato ni Misis Castro-Artates. Nabayag a miningminganna ti umis-isem a babai a kalanglanga ni Rossana Roces. Simngaw ti disintunado a sagawisiw ni Rick. Mayo ken Disiembre! Saan a nakakaskasdaaw no kumannigid ni Misis, inkallatek ti isipna.
(Adda tuloyna)