Ti Naunton

Kolum: Tawid ti Kaputotan

Ni Errol L. Abrew

 

KALGAW.  Nasaray-ob unay iti dayta a malem, ala unan a pasado.  Mapasir ti alibungubong kadagiti kalsada iti siudad.  Maysa nga ubing a lalaki, agtawen iti apagsagpat a sangapulo ti siiinayad a simrek iti masungadna a restoran.  Sinabat ti panglakayen a guardia iti ruangan.‘Niat masapulmo, barok? Kua, sir, manganak koma iti halo-halo, inruar ti ubing ti paniona. Nadarugsoyen iti ling-et ti rupa ken bagina. ‘La ket mapankan a, idiay counter.  Pumilika ti orderem. Sagmamano ngata dagiti halo-halo, sir? Ammom kadi ti agbasa, barok?  Adda presiona tunggal maysa a nakapaskil ngatuen ti counter.  Itudom lattan, a, barok. Makabasaak met, sir.  Laeng, nalipatak la ketdin datay anteohosko idiay hotelmi.  Please, di la mabalin a tulongannak, sir? Okey, ‘mayka ngaruden, barok. Sinaludsod ti serbidora: Ania kadi ti orderenna? Dinagullit ti guardia, Ania kanot’ orderem, barok? A, e, kua sir, sagmamano kadi daydiay? Daydiay? Wen, sir. Big daydiay, barok.  Triple scoop ti ice creamna, trenta pisos.  Daydiay ngay adda idiay abayna, sir? Daydiay? Saan, sir, ‘diay maysa. Daydiay? Wen, sir, wen, sir. Medium, double scoop, twenty-two pesos fifty centavos, barok. Kinaut ti ubing ti bolsana.  Binilangna dagiti kuartana. Daydiay ngay intudom tattay, sir? Binatogan ti guardia ti neon sign sana intudo, Daytoy? Saan, sir, ‘diay maysa. Daytoy? Wen, sir. Small, single scoop, fifteen pesos twenty-five centavos. Nagkinnita ti guardia ken serbidora.  Nagsenias ti guardia a panawanna biit ti ubing ta adda sumbrek a kustomer. Sinublat ti ubing ti serbidora. Dayta ngay, mam? Kabassitan nga scoop daytoy.  Baso, saan a malukong ti pakaikabilanna.  Ten pisos seventy-five centavos. Sakbay a makapagsao ti ubing, pinasarunuan ti serbidora. Boy, aglisika pay man la bassit ta sumublat dagitay dadduma a nakalinia.  Medio maluksaw ken masemsem ti ayug ti serbidora.  Pormal ti rupana.

Ngem siaalibtak met ti ubing a nangipus. Please, alaek ngarud daydiay kabassitan nga scoop, mam, inyawat ti ubing ti nabukel a duapulo a pisos. Adda kadi pakuyog a nalamiis a danum ti halo-halo, mam? Apay, tattaka la kadi nga umay mangan ditoy?  Nagkikinnita dagiti adda iti linia. Intangwa ti ubing ti rupana a nangallawat iti suplina.Wen wenno saan laeng ti sungbatna daydiay, mam, natanang ken naaannad ti panagsao ti ubing.  Ukapen koma ti serbidora ti ngiwatna ngem naunaan ti ubing.  Kanayon nga isursuro da daddyk ken mommyk, the customer is always right, mam.  Inaldawkami a mangmangan kadagiti restoran.  Balikbayankami.  Ilokano dagiti dadakkelmi.  Taga-Cabakami.  Kagudua ti lubong ti napasiarmin.  Damomi ti umay ditoy, mam. Timmallikuden ti ubing a napan nagtugaw.  Kasla tinukkawan iti karasaen ti serbidora.  Di nakauni, di nakakuti.  Madamdama bassit, imparabaw ti maysa a serbidor ti halo-halo, nalamiis a danum ken napkin.  Sinaruno ti kutsarita ken resibo. Dakayonto met la kadi ti mangdalus daytoy a lamisaan, sir, ‘ton malpasak a mangan? Op kors, adingko. Ta apay kadi? Pinasarunuanna ketdi, Manokayo kadi nga empleado ditoy, sir? Naklaat ti serbidor ket insungbatna, Tallokam’ laeng tatta. Siak, ni Manong Kadeo ken ti adda idiay counter, ni Sarah.  Off-day dagitay dua a kakaduak.  Dinagullitna, Ta apay kadi? Immisem laeng ti ubing.  Ingngatona nga inukrad ti dakulapna.  Dinumogannan a kiniwar ti halo-halo.  Nagki-kinnita ti guardia ken dagiti dua a kakaduana.  Nagkaykaysa a kusilap ti imbakalda a naiturong idiay ayan ti nakadumog nga ubing. Intanguap ti ubing ti baso a naglaon iti nalamiis a danum.  Pinunasanna ti ngiwatna.  Inarikapna ti bolsana.  Timmakder.  Tinurongna ti counter. Thank you, mam, siisem nga insungona iti babai.  Inalamanona.  Thank you, sir, kunana idi masabatna ti lalaki a serbidor.  Ket sakbay a rimmuar, thank you, sir, kinunana manen iti guardia.  Sana inalamano met.  Ngursiit-aso ti insupli ti guardia. Inasitganda ti lamisaan a nanganan ti ubing.  Nakaparabaw dagiti sensilio: siam a sagpipiso, maysa a salapi ken maysa a benteng.  Supli ti duapulo a pisos a kuartana itay.  Ken maysa a napkin.  Adda naisurat iti bolpen: Tips for the three of you.  Thank you. Nagkikinnita a di nakauni dagiti tallo a naggigiddan a limmabbaga.  Tinaliawda ti ruangan.  Nakaadayon ti ubing.  Nakaranting dagiti askaw ni Kenneth.  Kadagiti naisem a matana, nagalintatao ti alimunmon nga imbatina idiay restoran.  Napasagawisiw.#

(*Maysa a genre iti makunkuna a short short fiction or sudden fiction, ababa nga ababa a sarita ti Tawid ti Kaputotan.  Sarita nga aglaon iti di nasursurok ngem sangaribu a balikas, maitutop ita a panawen ti Twitter ken Facebook.)#