TI NEW BILIBID PRISON

Salaysay ni Eden A. Alviar

(Umuna iti dua a paset)

NAGBALIN a sentro ti atension ti publiko ti New Bilibid Prison (NBP) iti agdama a panawen gapu kadagiti nagsasaruno a pagteng a nagpataud ti kontrobersia.

Nabara ti testimonia dagiti nagtestigo a prominente a balud iti hearing ti Committee on Justice iti House of Representatives maipapan ti illegal drug trade. Napasamak pay ti “riot” a nakatayan ni Tony Co, kombiktado a kidnaper ken maysa kadagiti maitudtudo a drug lord. Nasugatan pay iti riot dagiti maatap a drug lord a da Jaybee Sebastian, Peter Co, Vicente Sy ken sigud a Police Chief Inspector Clarence Dongail.

Nangrugi a nagbalin a kontrobersial ti NBP idi Disiembre 2014, idi indauloan ni Justice Secretary Leila de Lima, dagiti operatiba ti National Bureau of Investigation ken National Capital Region Police Office ken Philippine Drug Enforcement Agency iti sorpresa nga “Oplan Galugad” iti Maximum Security Compound ti NBP. Nakadiskobreda kadagiti methamphetamine hydrochloride (shabu), drug paraphernalia, sex dolls, stripper bar ken jacuzzi kadagiti air-conditioned a quarters wenno kubol dagiti kombiktado a drug dealers.

Kadagiti simmarsaruno a panagsukimat, nakakompiskar dagiti operatiba kadagiti kontrabando kas kadagiti paltog, natadem nga armas, cellular phones, flat-screen televisions, laptop computers, Wi-Fi gadgets, nangingina a relo, sauna machines ken nasurok a maysa a million a kuarta manipud kadagiti nalatak a balud. Iti kubol ti balud a ni Peter Co, nasarakan ti nalimed a dalan kadagiti nagduduma a disso iti uneg Bilibid. Nasamsam pay dagiti listaan dagiti nagan, gatad ti kuarta ken petsa. Iti met kubol ti drug lord ken robbery gang leader a ni Herbert Colanggo, natakuatanda iti moderno a music studio a nagaramidanna ti music video.

Namin-adun a daras a nangisayangkat ti panagsukimat iti uneg ti DOJ manipud 2014 aginggana iti 2016. Adu dagiti naikkat ken nasukatan nga opisial ken guardia iti NBP gapu kadagiti irregularidad. Nayakar dagiti 19 a nalatak a balud sadiay NBI Detention Center. Naduprak dagiti kubol, ken napainget ti panagsukimat ken panagsamsam kadagiti maipawil a maiserrek iti pagbaludan. Ngem nagtultuloy ti illegal drug trade iti NBP.

Nalataken ti NBP kas pagbaludan. Ngem ania ti pakabuklan daytoy a pagbaludan ken akemna iti namaris a pakasaritaan ti pagilian?

Ti NBP sadiay Muntinlupa City, Metro Manila ket isu ti kangrunaan nga institusion iti Pilipunas a pakaipanan dagiti balud a sinentensiaanen ti korte kadagiti krimen a nakaidarumanda. Imatonan daytoy ti Bureau of Corrections iti Department of Justice. Agbambantay met dagiti kameng ti PNP Special Action Force kabayatan ti panagsanay dagiti guardia ti BuCor.

Nalukatan ti NBP idi 1940. Idi un-unana, addaan daytoy iti kalawa a 551 nga ektaria. Idi Septiembre 5, 1991, nangiyetnag ni Pres. Corazon Aquino ti Presidential Proclamation No. 792, para ti pannakapagbalin ti 104 nga ektaria a paset ti NBP Reservation kas Katarungan Village, housing project para kadagiti empleado ti DOJ.

Naisaad pay ti main office ti BuCor iti las-ud ti NBP Reservation. Ti NBP complex ket addaan kadagiti kampo wenno compound a pagyanan dagiti balud mayataday kadagiti sentensiada. Addaan pay iti gymnasium, sports facilities, kapilia ti Katoliko ken dadduduma pay a pammati. Addaan pay kadagiti eskuela ti elementaria, sekundaria, vocational ken outreach course ti kolehio. Adda pay tiendaan dagiti nagduduma a kasapulan dagiti balud.

(Adda tuloyna)