Ti Pagbubutngan nga Uleg iti Bantay Tara-Tara

Sinurat ni Jose Edwin S. Sajonia
Kas insalaysay ni Mrs. Natividad Ramirez-Somejo
(Tuloyna)

Iti maikapat nga aldaw manipud ipapan panaganup da Tata Antero iti Bantay Tara-Tara, inyawid dagiti kakaduana nga awan ti puotna. Apagbiit a nagsiwarak ti damag. Tumuyutoy dagiti kabagian ken kaarruba a napan nangkita iti kasasaad ni Tata Antero. Ti karne ti naanupanda nga ugsa ken alingo ti impakanda kadagiti bimmisita iti lakay.

Segun iti panangisalaysay dagiti kakadua ni Tata Antero ken ni Nana Idad, dandanin agmatuon idi makatapawda iti Bantay Tara-Tara. Agarup uppat a kilometro ti pinagnada. Napuskol dagiti dadakkel a pinuon ken nasamek ti samon, lanut ken bikal iti puseg ti kabakiran.

Nagtutulag dagiti mangnganup iti pagpaksolan ti tunggal maysa ken pagpasebbanganda iti anupenda nga ayup. Tumtumpaw kano dagiti anasaas iti bakir a pagilasinan ni Tata Antero a nalabon ti maanupan.

Sinuerteda iti immuna a tallo nga aldawda iti bantay. Dua a bay-akan nga alingo ken maysa a a bumaro nga ugsa ti natsambaanda.

Iti maikapat nga aldaw, maysa kano a saraan nga ugsa a dimmugsak iti nasamek a katurodan ti kinainnullaw ni Tata Antero.

Saanen a nalawag ti simmaruno a napasamak. Kinuna dagiti kakadua ni Tata Antero a nakangegda iti kanalbuong iti nagpaksolan ti lakay. Madamdama, limteng ti pukkaw daytoy.

Dinagdagus dagiti kakadua ni Tata Antero ti immarayat. Nadatnganda ti lakay a naukritan iti sangadangan ti agdardara a gurongna. Idi usisaenda ti lakay, dinarup kano ti dakkel nga uleg! Daytoy kano ti nangkurib iti gurongna. Kinuna pay ti lakay a pinaltoganna ti uleg ngem dina kapkapnekan no natiruanna.

Madamdama, naglusdoy ti lakay ket naawanen iti puot. Dinagdagus metten dagiti kakaduana nga inyawid.

Ngem saan a naitaray ni Tata Antero iti ospital gapu iti kinaadayo ti lugarda iti ili ken kinarigat ti dalan. Nagpabirok ketdi da Nana Idad iti mangngagas ken mangtalado ken ni Tata Antero.

Imbaga kano ti mangngagas a kinagat ti uleg ti lakay. Impakapetna ti kapigsaan a sumangna ngem saan a nagriing ti lakay.

Kinuna ti mangngagas nga adda pay namnama a masalbarna ti lakay. Tinandokna ni Tata Antero. Nagkir-in ni Tata Antero kalpasan ti sumagmamano nga oras.

Inyunay-unay ti mangngagas a di pastreken da Nana Idad ti asinoman a bumisita iti asawana no nakaaruat iti alahas. Adda kano naibugas a balitok iti ngipen ti mangngagas ket masukal ti panaglaing ni Tata Antero no dida tungpalen ti pammilinna.

Ngem maysa kano a kabagian ti lakay a balikbayan ti nailaw-an nga immasideg a naarkosan iti alahas ti bagina. Di ammo no daytoy ti nakagapu iti ipapatay ni Tata Antero.

Idi awanen ti lakay, pimmanaw da Nana Idad ken dagiti lima nga annakda iti Ilokos ket napanda nagdappat idiay Barangay Smart, Gonzaga, Cagayan.

Ngem agingga ita ket dakkel a misterio no ania ti pudno a napasamak idi napan naganup da Tata Antero iti Bantay Tara-Tara. Agpayso kadi a kinagat ti dakkel nga uleg a puon ti pannakapukaw ti puotna iti sumagmamano nga aldaw? Saan ngata a sinangdo ti dakkel nga ugsa a nakainnulawna iti daydi a malem a puon ti nakadunoran ti gurongna? Saan met a nakaited iti makapnek a sungbat dagiti kakaduana agsipud ta awan met ti nakakita kadakuada iti masasao a beklat a nangdarup ken ni Tata Antero ken nangngabngab iti gurongna.

Ngem aniaman ti pudno a napasamak, inkuyog ni Tata Antero iti tanemna dagiti di maikkan iti naan-anay a sungbat no ania ti pudno a nakatayanna. Ngem iti ipapatayna, ad-addan nga awan ti mangnganup a makaitured nga aganup iti ugsa wenno alingo iti Bantay Tara-Tara. Dakkel ti amakda nga amangan no maipadada ken ni Tata Antero no masalawda ti datdatlag nga uleg.#