sinursuran-banner-sqSinursuranNi Jobert M. Pacnis

Ti pait ken sam-it ti panagsao iti kinapudno

ADDA kadi bayadan no mangala iti travel pass? Manipud iti Brgy. Zitanga, alaen la koma ‘diay agas iti Mercury, Junction Libertad, Abulug, Cagayan. Adda resibo nga iggem ti maseknan. Gapu ta ibagada a masapul ti travel pass, malaksid iti dayta Home Quarantine Pass (HQP), ‘su a nangala iti barangay ti maseknan. Ket nagbayad, piman, iti P120.

Atoy pay, no mangalaka iti home quarantine pass ket awan maipakitam a balido nga ID, masapul kadi nga agbayadka iti P120 met laeng para iti certification tapno ikkandaka iti HQP?

Saludsod laeng daytoy, kailian. Agyamanak kadagiti otoridad a sumungbat.

Panawen ita ti krisis, kaniak laeng a biang, saan koma metten a mabayadan. Nagrigat la ngaruden ti situasion ti tunggal maysa.

Linaon ti di naedit a post-na iti dayta nga aldaw. Masdaaw man ngamin ta apay a mapabayadan ti travel pass idinto a naikannawag met iti media a libre koma daytoy a maala. Aglalo dayta HQP.

Apagbiit laeng, kas ninamnamana, nagbalinen a napudot a bibingka ti post-na. Naikomento a libre koma dagiti pass a nadakamat.

Simmaruno ti pannaka-screen shot ti post-na ket nausar dagitoy iti sabali pay a post. Ad-addan a pimmudot ti isyu. Simmagpaw dagiti saanna nga ammo ti puon ti amin. Nagpannurayda iti naiskrinsiat laeng ket saandan a nakita pay dagiti immun-una a komento.

Dita a natira ti kinataona. Baka kano mamerperdi laeng. Awan kredibilidadna a nag-post. Maysa kano a PUI! Person of Unverified Information!

Nasaktan man kadagita a panangbiradada kenkuana. Ngem saan a timmayok ti riknana. Nagtalinaed ketdi a napakumbaba kadagiti komentona. Inad-adalna dagiti rumbeng a serkanna tapno di a lalo a rumaba a rumaba ti saritaan.

Iti social media, ammonan nga adu dagiti rumbeng a liklikan. Ammonan nga adu dagiti kasla durog laeng tapno agiinnala dagiti maseknan.

Ket dayta ti linikliklikanna.

Agingga nga addadan nagmensahe kenkuana iti messenger. Saanna a gayyem ida iti FB. Adda met dagiti dati nga adalanna a nangipeksa iti suportada kenkuana. Husto kano laeng ti impostena. Tapno maammuan dagiti maseknan a saan a matmaturog dagiti umili.

Naibalakad a yumanna daytoy iti opisina ti gobernador tapno adda pagnakman dagiti maseknan nga opisial.

A dagus met nga inaramidna.

Apagbiit, addan mensahe ti opisina ti gobernador. Dinamagda no asino ti nagpabayad. Ken ikoordineytda kano daytoy iti DILG wenno Department of Interior and Local Government.

Naspak, nakunana iti nakemna. No agkuti ti DILG, ta nainget ti bilin ni Sek. Aduardo Año, saan ngata nga adda masuspindi wenno maikkat nga opisial ti barangay?

Ti pannakaatake ti kinataona, ninamnamana daytan. Isu a nagparparbeng laeng. Agingga nga addan komento, uray pay kadagiti sabali a post, a napadasanda kano met ti nagbaybayad iti travel pass iti barangay a madakdakamat. Many times, kunada pay. Ta masansan kano ngamin ti biaheda kas negosiante. Ngem okey la kano kadakuada ta isu pay a pagkape dagiti agbambantay iti tsekpoint. Ken sukat ti bannogda nga agar-aramid iti card pass.

Immadu nga immadu dagiti komento. Agsasanggaladan ta masadut sa dagiti dadduma nga ag-back read a makuna.

Nga is-isemanna laeng. Dita a tiningtingitingna ti kinatao dagiti tunggal agkomento. No dadduma, kitaenna ti profile-da ta kaaduan kadakuada ti dina am-ammo.

Iti laeng nagmalem, nagkayamkamen a kasla uram ti post-na. Adda payen nangibaga a nagtured la kanon a nagiposte.

Ammona ti kayat a sawen dayta. Saanna man la a pinanunot ti pamiliana a mabalin nga agpeggad gapu iti inaramidna? Idi pay sakbay nga impilkatna iti wall-na ti isyu, napanunotnan ti mabalin nga ibunga ti aramidenna.

Ngem saan latta a bimdeng. Di maaklon ti konsensiana nga agimbubulsek ken agintutuleng lattan. Akemna dayta, saan laeng a kas mannurat ken adipen ti tisa. Kangrunaanna, kas umili— umili nga addaan kalintegan a mangipeksa iti kapanunotan ken mangilaban iti namnamaenna a kinapudno.

Ti dina ninamnama, ti panangupay kenkuana ti kapunganna. Nagdandanag daytoy iti mabalin nga ibunga ti nalpasnan nga inaramid.

Ammonan idi pay a saan la ketdi nga anamongan ti katakunaynayna ti aramidenna. Adda man ngaminen idi isyu nga imbutaktakna ket nagdandanag manen daytoy.

Iti dayta saan a pananganamong ti asawana, saanna a sinabat ti rikna daytoy. Binay-anna latta a nagmawmaw.

KABIGATANNA, addan naikomento nga screen shot iti postena. Agyamyaman ta saan kanon a mabayadan ti travel pass!

Naragsakan. Adda met laeng nagnaan ti postena.

Inaramatna met dagitoy positibo a komento tapno mabaliwan ti panagkita dagiti nang-bash wenno nangpadas a mangrippuog iti kinataona. Ngem seen mode laeng dagitoy. Awan man laeng ‘tay panagpadispensarda koma. Numona ta opisial met dagitoy iti lugarda, retirado a prinsipal ti maysa a nakasuan pay ketdi idi gapu iti kinagarawigawna, ken deadal dagiti dadduma.

Isuda ngata dagiti nakaadal a di nakasursuro?

Idi umal-aldawen, addan nag-friend request kenkuana nga opisial ti ili. Inawatna met. Idi kuan, nagdamdamagen daytoy kenkuana. Ti kapintasan a paset a kinunana isu ti pannakisaritana kano iti napalabas a rabii iti maseknan a kapitan ken ABC chairman. Mabalin kanon a mapan i-refund dagiti naibaybayad.

Alaenna kano laeng ti resibona.

Ket dita a napanunotna nga isu met laeng nga adda nag-post nga awanen ti bayad ti travel pass!

Wenno immun-una a nagkuti ti nagipulonganna?

Ngem ti dina maawatan, idi sungbatanna ti nasao nga opisial a naidanonna pay ketdin iti opisina ti gobernador ti amin, saanen a simmungbat nupay nakitana met ti mensahe. Dakkel a barikawwet iti utekna ti imbati dayta a pagteng.

Nagdaliasat bassit ti panunotna. Inawagan ti nasao nga opisial ti kapitan ta imbagana ti naammuanna a naidanon gayamen iti ngato ti pasamak? Ket masapul nga agsaganada?

Iti murdong dagiti komento iti post-na, inkannawagna metten a mabalinen nga i-refund ti naibayad dagiti nagala iti travel pass. Alaenda laeng ti resiboda. Segun iti imbaga kenkuana ti konsehal ti ili.

Ngem impasarunona a nupay kasta, saanna nga ammo no anianto ti addang nga aramiden ti opisina ti gobernador ta imbaga daytoy nga ikoordeytda iti DILG ti amin.

WEN, napasardengna ti maikaniwas nga aramid. Positibo a banag, ngem ti ginubuayna a sugat iti barukong dagiti maseknan, ammona a naut-ot daytoy. A mabalin a kalkalkalendan ti kinataona. No asino a ngimarawngaw. Ania ti motibona?

Ngem ania ngarud ket dina met maaklon ti panagimbubulsekna lattan. Aglalo ket biktima met! Idawdawatna laengen a maawatandanto met laeng. Nga aklonen dagiti maseknan ti nagkamtudanda. Ket mangabaruananda…