Footer

Ti palimed ni Bentong Sikyo

Sarita ni Eduardo Martinez, Jr.

 Maudi a paset

“Ngem agannadka, Bentong, timmayab ti dies milko kadayta a palimed,” ingngato pay ti polis ti kannawan a tammudona, sana pinagsinnublat a minatmatan dagiti dua a guardia.

“Sardam idi, adda dagiti nakaengkuentromi a carnaper. Pinnaltogan daytan nga umatipukpok. Kinnamatan. Napataymi amin ida nga uppat. Ngem iti laksid dayta a balligimi, agliblibbi ken makasangsangitakon ta timmayab metten ti iduldulinko a dies mil! Sapay no di uppat a bulan nga urnongko…” ket lalo pay a simmabang ti nabisked a pammagi ken panayagen a polis iti panagkatawana.

Nakipagkatawa met ni Bentong. Ngem saan latta a masakayan ni Roger no sadino ken ania dayta a palimed wenno pagiduldulinan ti kuarta dagiti dua.

“Agan-annadka, Bentong. Dikanto ket maitulad kaniak a timmayab ti dies milna. Mano ti iduldulinmo?”

“Tres mil, sir…”

“Nasaysayaat laengen nga ibangkom, mas safety.”

“Naynayonak nga igatangko iti bisikletak, sir…”

“Agannadka ngarud. Ket sika, Roger, nasaysayaat laengen no dinakam tultuladen…”

Adda iti igid ti Quezon Avenue, maysa kadagiti kangrunaan a kalsada ti ili a San Guillermo, ti Martina building. Okupado ti DNS Marketing ti kagudua a paset ti umuna a kadsaaran ti pasdek. Ti sikigan ti agdan ken sirok metten ti hallway ti 2nd floor ken 3rd floor ti yan ti ridaw ti DNS a supplier/distributor kadagiti nadumaduma a food supplement.

Iti sanguanan ti immaratiddog a pasdek, sangapulo a metro ngata sakbay a tumadog iti sementado a kalsada nasional ti agserbi a parkingan dagiti tenants wenno agup-apa iti building. Ita a kuaresma a kaadu ti turista nga agpasiar iti San Guillermo, kaadu met dagiti nairekord ti polisia a nadumaduma a krimen. Lalona dagiti bukas-kotse wenno ti agpittak iti sarming ti kotse sada alaen ti makitada a napateg a linaon iti uneg ti lugan.

Iti dayta nga agalasdos iti malem, pinanawan ni Bentong ti ridaw ti DNS tapno likosenna dagiti lugan. Nataldiapan ni Bentong itay a nagrikos iti likudan ti building ti roving guard. Sinaggaysana nga inusisa ti nagbabaetan dagiti lugan. Iti sulina iti amianan, nasalamaanna dagiti dua a lallaki a nakatugaw a mangkurkurikor iti tutulbekan ti nalabbaga a kotse ti maysa kadagiti tenants iti 3rd floor.

“Hoy, agtaktakawkayo…!” imbugtak ni Bentong.

Ngem imbes nga agbuteng dagiti mannibrong, kellaat ketdi a binarsakda ni Bentong iti kasla gemgem a bato sada nagtataray a nagpaamianan-a-laud a kimmamang iti kabalbalayan. Naimbag ta nalisian ni Bentong ti bato. Inasutna ti service firearmna a kalibre treintay otso ket kinamatna dagiti dua. Sakbay a simpok dagiti mannibrong iti eskinita, naaramidanda pay laeng a binarsak ni Bentong ket nanarpaak ti nagburak a botelia ti serbesa iti sikigan ni Bentong.

Iti rurod ni Bentong, pinagsarunona ti dua a putok iti ngato a kas warning shot. Iti dayta nga inaramid ni Bentong, simpoken iti eskinita dagiti mannibrong. Tumanabutob a marurod a  nagsubli ni Bentong iti puestona iti sango ti DNS.

“Dagiti man mannibrongen a nasalamaanmi iti naminsan a sardam. Inulitda manen a,” kinuna ni Pablo, ti roving guard.  “Natured dagiti sinalbag. Ngem sigurado nga agbutengda itan ta nagpaputokka, g’yem. Ammoda itan a saantayo a mabuteng a mangpaltog kadakuada.”

Immisem ni Bentong. Ketdi, improponerna a nasaysayaat no agpuesto laengen ti roving guard iti sanguanan a yan ti parkingan tapno malapdan ti pasamak a panagtakaw.

“Dayta ti kiniddaw ti bossmi iti management a mangaramidkami iti bassit a guard house idta sulina iti amianan a pagtalinaedan ti guardia ken mangnayonda pay iti maysa a roving guard iti rabii.”

Agalassingko iti malem. Nireliboanen ni Roger ni Pablo. Adda manen dagiti dua nga agsarsarita iti asideg ti ridaw ti DNS ken nakasangoda ti daya tapno maimatanganda a nalaing dagiti nakaparking a lugan, narigaten no masalisian manen ida dagiti mannibrong.

Napasimadanda ti lugan ni Senior Police Inspector Mariano Daligdig. Nagdaydayaw manen dagiti dua a guardia. Immisem laeng ken ingngato ti polis ti kanawan nga imana sa nagdardaras a simrek iti DNS.

Intuloy met dagiti dua a guardia iti inda pagsarsaritaan a seguridad ti uneg ken ruar ti Martina Building ken panagrairan dagiti mannibrong lalo kadagiti nakaparking a lugan.

Kellat a naibuang ti ridaw ti DNS ket agdardaras a rimmuar ni Daliglig.

“Adda kano nakalabanmo a mannibrong, Bentong?” sinaludsodna.

“Wen, sir! Nakitak a lukluktanda ti kotse ni Madam Sarmiento, ket sinitak ida. Ngem imbes nga agtatarayda koma, binarsakdak pay!”

“Ket ania ti inaramidmo?”

“Immasutak metten ket kinamatko ida. Binarsakdak pay laeng iti botelia ti serbesa, isu a nagwarningsiatak iti dua, sir!”

“Nagwarning shotka? Inusarmo dayta service pistolmo?” immulagat pay ti polis ti saludsodna.

“Wen, sir…”

Kellaat lattan a naggarakgak ti polis, ket kunana: “Awanen a ti iduldulinmo a kuartam…!”

Nakanganga ni Roger ta dina masakayan ti dialogo ti polis.

Ngem ni Bentong, nakanganga a nagkullayaw, ket pimmusiaw pay, sa pagammuan, nagdardaras a nagtaray lattan a nagpaamianan a di man la nagpakada. Agkatkatawa latta ti polis idinto a saan latta met a matimtimek ni Roger.

“Kunak la ngaruden nga agan-annad, ta napadasakon dayta. Awanen a ti tres milna! Lalo ket alas dos itay napasamak. Ania ti orasen? Alas singkon! Nasayaat laeng a, ta dayta laeng gatad ti napukawna, ngem idi siak, amaya, diel mil ti timmayab!” kinuna ti polis ken ni Roger a masmasdaaw pay laeng.

Madamdama pay napasungadandan ni Bentong a managgaysa dagiti addangna, nalikba dagiti abagana, agliblibbi a makasangsangit.

“Nabirokam?”

“Awan, sir… awanen ti tres milko…awanen…” insennaay ni Bentong.

“Kunak ngamin nga agan-annadka iti dayta a pagidulinan. Ngem ala, leksionmo metten dayta, a!” inggarakgak ti polis.#