Ti pamilia

Salaysay ni Imelda Rivero-Castro
(Umuna a paset)
PAMILIA. ITI lakasa iti biagtayo, maysa kadagiti kaimportantean ket tay pamiliatayo.

Ania ti pamilia? Isu ti basic unit ti kagimongan. Babaen ti pamilia masukog ti kinataotayo. Mabalin nga agbalintayo nga asideg kadagiti adal ti Dios, wenno adayotayo kadagitoy gapu iti pamiliatayo.

Ti pamilia ti pakaadalantayo kadagiti galad ken kababalin a mamagbalin kadatayo a natudio nga anak ti Dios. Mabalin met a ti pamilia ti mangsursuro kadatayo tapno ti laeng bagitayo ti ayatentayo, tapno ti gura ket isu ti mangituray iti biagtayo.

Segun iti maysa a nasukisoktayo, ti pay pamilia ti kapapatgan ken kapipigsaan a pangsaranget kadaytoy problema ti panagabuso iti agas.

Ti ngamin pamilia ti mangitag-ay iti maysa a tao. Wenno isu met laeng ti mangisuro kenkuana tapno mailublob iti pitak.

Kitaentayo man daytay maysa a pamilia nga adda napataudna nga anak nga agab-abuso iti agas. Dagiti nagannak adda problemada. Dandani inaldaw nga agapada. Dimmakkel dagiti annak a kastoy ti kinagulo ti balay ken pamiliada.

Nakarit ti ama. Kakaasi ti ina a bugbogenna wenno bugbugkawanna. Tatta agkabannuagen dagiti annak. Saanen a kayat ti inaudi ti agawid. Apay? Mariribukan iti mapaspasamak iti pamiliada.

Nakasarak kadagiti gagayyemna nga agus-usar iti maiparparit nga agas. Ket tapno malipatanna ti situasion iti balayda, pinadasna metten. Ditoy a nangrugi ti pannakailumlomna iti droga.

Tatta adda met pamilianan. Ket ti inar-aramid ti amana, ar-aramidenna metten.

Kuna pay tay nasukisoktayo a kasapulan ti pannakabangon ti self-esteem ti maysa nga ubing wenno anak babaen iti pamiliana.

Daytoy tay makunkuna a kumpiansa wenno tay napigsa a pammatim a sika ket adda met abilidadmo, a sika ket naimportante a kameng ti pamilia ken kagimongan.

Iti kano pananglalais iti maysa nga anak aglalo no adda iti sanguanan ti dadduma pay a kameng ti pamilia wenno sabali a tattao ket dadaelenna daytoy a self-esteem. No madadael mangrugi ti anak a mangdadael iti bagina.

Awanen ti kaes-eskan ti bagina. Ket ti panagusar iti maiparparit nga agas ti pangdadaelna iti bagi ken biagna. Iti panag-mature ti panunotna, maamirisna a saanna koma a sinerrek ti panagabuso iti agas, ngem no dadduma naladawen ti amin.

Isu a makitatayo no kasano kaimportante ti panangaywantayo kadagiti annak iti panagdakkelda, kangrunaan iti umuna nga innem a tawen. Kadagitoy a tawenna a masursuro dagiti galad ken kababalin, naalas man wenno nasayaat.

Kasapulan met a datayo a nagannak, ikagumaantayo nga awan koma ti paboritotayo nga anak. Wenno ikagumaantayo nga awan ti idasdasigtayo.

No kanayontayo nga ikumpara ni inauna ken ni maikadua, wenno ni maikatlo ken ni buridek, ay ket delikadon a. Kadaytoy nga aramidentayo, imulatayo ti bukel ti kinarebelde, panagimon iti kaunggan ti kinataoda. Papatayentayo pay ti self-identity dagiti annaktayo.

Agnanayonton a birbirokenda ti kinasiasinoda. Uray man no baket ken lakaydanton, kaskasdinto pay laeng a birbirokenda ti kinataoda.

Saandak a kaykayat iti balay. Awan pay dumngeg iti problemak. Dagitoy dagiti areng-eng dagiti annak a saan a maik-ikkan iti atension no ikumpara kadagiti kakabsatna.

Ket gapu ta isuna daytay saan a maay-ayat, agbirok iti ruar ti pamiliana ti mangayat kenkuana, ti makaanus a mangdengngeg iti kapanunotanna. Saanen nga importante no ania man ti kinatao dagitoy.

Gapu ngarud iti saan a nasayaat a pamilia, masursuro dagiti ubbing ti agrebelde, agusar iti maiparparit nga agas. Ken agsuicide, wenno pumatay.

Kangrunaan ngarud ti pannakapatibker ti pamilia. Kasano? Awanen ti sabali a pangpatibker no saan a ti sursuro ti Namarsua.

Kunada ngarud, the family that prays together stays together. Ti pamilia a naruam nga agad-adal iti Sao ti Dios, ket ibibiagna daytoy, tumibker ket ammona no kasano ti panangtaripato, panangpadakkelna kadagiti annak.

Ania ti ayat ti Dios? Daytoy ti kuna ni San Pablo kadagiti taga-Corinto. “Ti ayat naanus ken naasi. Saan a naimon, wenno napasindayag. Wenno natangsit.

“Saan a naalas ti kababalinna, wenno naimut, wenno nalaka nga agpungtot. Awan im-impenna a sakit ti nakem.

(Adda tuloyna)