sinursuran-banner-sqSinursuranNi Jobert M. Pacnis

Ti Panagilibro

Sinursuran: Kolum ni Jobert M. Pacnis
(Maikadua a paset)

Nupay kasta, nagtultuloy ti panagsuratko. Sarita, daniw, salaysay ken nobela (nga agdama ita a maiserserye ditoy TNM). Ad-adda ketdi a daniw para ubbing ti sursuratek iti agdama. Gapu siguro ta asideg kaniak dagiti ubbing ket kayatko ti makatulong kadakuada iti panagadalda iti nariinganda a lengguahe.

Iti diak ninamnama, dimteng ti panawen a pannakariing manen ti arapaap a mailibro ti gapuananna. Naikannawag ti pannakaimaldit dagiti dandaniw ken sarita dagiti mannurat nga Ilokano iti wagas a tagnawa. Bayadannan panidna.

Inagawaak a kinita dagiti naipablaaken a sinuratko ta dagitoy koma met ti kayatko a pailibro. Ngem anian ta isu met daydi pannakadalapus iti sagubanit ket saan a nabaelanen ti bulsa ti maisaranay. Rimmuar ti Kastoy nga Imbunubonmi Dagiti Balikas (Antolohia dagiti Daniw iti Iluko) idi 2010 ken Nabalitokan a Tawid (Antolohia Dagiti Napili a Sarita Dagiti Ilokano) idi 2011 a saan a nairaman dagiti insagsaganak a sinuratko.

Tinagisayangko la unay dagidi a gundaway a mailibro koma metten dagiti gapuanak, iti wagas a a saanak a magastuan unay.

(Ngem kinaagpaysona, addan dua a daniwko iti Filipino a nairaman iti In Time Passing, There Are Things (100 Home Life Poets) idi 1999 iti panangimaldit ti Home Life babaen ken ni Sir Leoncio P. Deriada, editor ti daniw, ken hall of famer iti Palanca. Ketdi, sabali laeng ti pagus ti rikna a makailibro iti Ilokano a sinurat.)

Ala, saan pay siguro a panawen tapno agtagilanga ti arapaapko a makailibro, kinunkunak manen iti nakemko.

Surat ketdi latta, inyan-andingayko iti bagik. Addanto latta panawen.

Ket agpayso, idi 2012, maysa manen a tagnawa ti naisayangkat. Gapu iti programa nga MTB-MLE ti Edukasion, agkasapulan ngarud kadagiti materiales para kadagiti adda iti Grado Uno agingga iti Grado Tres.

Napanunot ti grupomi iti Cagayan ti pannakairuar ti maysa a libro a buklen dagiti dandaniw a para ubbing. Gapu ta awan pundo ti asosasion, napagnunumuan a tagnawa daytoy. Ket rimmuar ti Bullalayaw a nairaman ti maysa kadagiti daniwko. Iti sumuno a tawen, rinugian metten ti Bannawag ti nagipablaak iti daniw a para ubbing.

Saan a mailadawan ti ragsak a nariknak. Ad-addan idi dayta met laeng a tawen (2012), nakaur-or ti GUMIL Cagayan iti tulong manipud kadagiti managayat iti Literatura Ilokana ket plinano daytoy ti pannakaisarusaren (ta nabayag idin a plano) dagiti gapuanan dagiti Cagayano a mannurat iti maysa a libro a sagut kadagiti sumarsaruno a kaputotan. Rimmuar ti Segden (Antolohia dagiti sarita dagiti Mannurat iti Cagayan) a karaman manen ti saritak.

Awan ti nagasto itoy a gannuat no di ti panawen laeng a nagenkod kadagiti naisubmitar a sarita. Kas maysa kadagiti editor, naipatulod kaniak dagiti dadduma a sarita. Naimakinilia ken nai-xerox laeng dagitoy iti magasin a nakaipablaakanda.

Simmaruno a rimmuar, iti wagas a tagnawa met laeng, ti Alimpatok (Antolohia Dagiti Erotiko a Daniw nga Ilokano). Pito a daniwko ti nairaman. Ti naisaranay, naisubli a kas libro.

Ket itay kallabes a kombension dagiti mannurat nga Ilokano, tallo pay a libro ti nakairamanan dagiti sinuratko. Umuna ditoyen ti Daniw69: Romansa Dagiti Balikas (nasurattayon ditoy kolumtayo ti maipanggep itoy) nga inedit ni Johmar R. Alvarez, a kaunaan la unay a porma ti daniw iti Kurditan Samtoy. Ay, ket no awan pay ti kopiam itoy a libro, ka-Sinursuran, kontakennak laeng. Ania ti ammom no sikanto ti maysa kadagiti makayalat iti papremio iti umuna a pasalip ti Daniw69? Wen, a, ta planomi nga autor ti agpasalipto iti kastoy a kita ti daniw kas mangtaginayon itoy baro a partuat/kabukbukodantayo a porma ti daniw. Maikadua ti Dagiti Premiado a Sarita 1997-2014. Koleksion daytoy dagiti sarita a nangabak iti AMMA Foundation Literary Awards manipud 1997 agingga iti 2014. Kas maysa kadagiti nangabak (Maikanem a Gunggona idi 2001), naikkanak iti kopia kas komplementario. Kasta met iti maikatlo, ti Dandaniw Ilokano (Mga Tulang Ilokano, 1621-2014) nga inedit ken inyulog iti Filipino ni Prof. Junley L. Lazaga.

Agsasarunon a pannakailibro dagiti gapuanan. Ita, adda manen naiwaragawag a mabukbukel a dua a libro (daniw ken sarita) iti wagas a tagnawa. Bareng mairamanak manen ditoy.

Bareng, kunak, ta kadagitoy, adda isagsaganak a libro dagiti dandaniwko. Wen, bukodko a libro. Sabali laeng ti sabali pay a libro dagiti daniw a para ubbing a kaduak ti maysa pay nga autor.

Sapay la koma ta agmata dagitoy a panggep ita a tawen. Pagyamanan ta addan dagiti independent a printing press nga agawat iti 100 a minimum a kopia ti maimaldit a libro. Dakkel la unay daytoy a banag iti pannakailibro pay dagiti dadduma a sinurat ti/iti Ilokano.

Bay-amon ti sangkasao dagiti dadduma nga awan ti madildilamutan iti panagilibro. Ta saan a dayta ti napateg. Ketdi, ti pannakataginayon dagiti sinurat. Ti adda maibati kadagiti sumarsaruno a kaputotan.

Ta no ganansia ti kitkitaem iti panagilibro, dimonto maragpat a pulos dayta. Ania laengen dayta P20 – P50 a kitaem iti maysa a libro?

Saan koma ngarud a dayta ti kitaen ni mannurat. Ta iti pay laeng damo, ammonan a saanna a pagbaknangan ti kinamannuratna. Ngem ketdi, agsurat, agipaipablaak, agilibro tapno maakemna ti pagrebbenganna kas behikulo ti kinaimbag ken pagsayaatan.

Ala, agilibrotayo ketdi uray ta adda met tagnawa! Uray ta adda metten dagiti babassit a printing press nga agawat iti bassit a kopia ti maimaldit.

Biagentayo ketdi ti panagilibro tapno ad-adda pay a tuman-ay ti Literatura Ilokana. No awan gastosen, mabalin ti agpatulong kadagiti am-ammo. Wen, ta adu latta dagiti nakasagana a tumulong iti nasayaat a gannuat.

Padaanam ngarud, ka-Sinursuran, ti libro.#