Footer

Ti Pannakaiyanak Ti Mesias

Ni Ma. Theresa B. Santos

(Maudi iti dua a paset)

Ni Ari Melchor, naparmekna ti kinatangig. Wenno kinangato a timid. Kinangato. Kinatangsit. Wenno ania  la ditan a sabali pay a pakaitarusanna.

Ti insenso, nabanglo. Iparangarangna ti naisangsangayan nga ayamuom a pakaay-aywan. Adda iti tao dayta nga insenso a pakaay-aywan. Insenso a saan a makita no di ket naitalimameng iti puso.

No kasano nga iruar dayta nga insenso, adda met laeng iti tao.

Apay a dayta ti insagut ni Ari Melchor?

Iparangna ti nabanglo ken makaay-ayo a nagan.

Saan laeng a dagiti Kristriano ti manangisagut iti insenso, kaadduanna a major religions ken uray dagiti babassit a sekta ti pammati ket agpuorda met iti insenso—iparangna ngamin dayta ti kinaadda ti nabanglo a kinaasino a naitalimameng iti tunggal tao.

Adda kadi kadatayo dayta nga insenso? Ania dagiti aramidentayo? Sindian tapno maangot ti kinabanglona, saan kadi? Kasano ti panangsindi?

Ibbatan dagiti aramid, ugali ken kababalin a saan a makaay-ayo; sindiantayo ti insenso iti kinataotayo.

Ni Ari Baltazar. Nangisagut iti mirra. A mangiladawan iti ayat. Ti mulinaw nga ayat. Napno iti ayat ti pusona. Ngarud, awan kenkuana ti gura. Awan kagurgurana. Awan manggurgura kenkuana. Naparmekna ti gura.

Iti ngamin panagintaer ti gura iti tao a maiyadayo iti Dios. Ikamang laeng iti Mannakabalin ti kinapait a malak-am iti biag  ket dumteng ti panagbalbaliw.

Dagitoy dagiti reprentasion wenno kaipapanan dagiti sagut dagiti  tallo nga ari a rumbeng met nga isagut ti tao ken Jesus.

Insenso. Balitok. Mirra. Iladawanda met dagiti tallo a tagipatgen (values). Daytoy koma ti kangrunaan a sagut ti tao iti Namarsua, ti kinaagnanayon koma a kinaaddana iti sidongna, iti ikubna.

Natarnaw ti balitok. Awanan mulit. Nadalus, awanan batek iti nainlasagan a lubong. Saan a naderrep. Agbalin a balitok ti tao kalpasan a natenneb.

Napait a kas iti mirra. No napait no kuna, kayatna a sawen, nadalluyon a biag. Napnuan panagibtur, napnuan iti pannubok ken pannakapaay. Ta saan a komportable ti biag, adu ti pakaipasungalngalan a pakatenneban. Dayta ti imparang a mismo ni Jesus iti yaayna ditoy lubong. Saan a komportable, ta mismo nga isuna ket naeksperiensana dayta a kinapait babaen ti pannakailansana iti krus.

Nabanglo ti insenso. No nabanglo ti maysa a tao, kayatna a sawen, awan ti kagurana, awan manggurgura kenkuana. Ngarud, naparmekna ti gura. Ditoy pay a naadaw ti figure of speech a “nabanglo ti nagan,” a kayatna a sawen, nalatak, popular ken gayyem ti amin. Ngarud, no daytoy ti naikalupkop iti kinataom, awan ngarud ti manggurgura kenka, awan ti kagurguram, naparmekmo ti gura.

No isagutmo dagitoy tallo a tagipatgen (values) iti Namarsua, makuna a nakapudnoka.

Iti agdama a panawen, saanen a dagiti tallo nga ari ti agisagut no di ket datayon a tattao. Isaguttayo dagiti talugading nga insagut dagiti tallo nga ari. Dagiti tallo nga ari ti pagsarmingan wenno pagtuladan iti rumbeng nga isubad iti grasia nga inted ti Namarsua.

Ta no maparmek ti tao ti kinatangig (pride), agsiray kenkuana ti kinasirib. Agsipud ta nasirib, maysa met ngarud nga ari iti pagarian ti biag.

No maparmek ti tao ti gura, adda ngarud kenkuana ti ayat. No adda kenkuana ti ayat, awan ngarud kenkuana ti kinadakes. No maaramid ti tao daytoy, maysa met nga ari iti pagarian ti biag.

No maparmek ti tao ti kinaderrep, nadalus ti bagina a di maparsiakan iti duog a basol nga inrugi da Angkay Adan ken Angket Eba.

Nagasat dagiti makabatok iti kaipapanan ti kinapudno.

Saan laeng nga iti paskua ti panagsisinnagut no di ket aramiden koma nga inaldaw. Pagsarmingan dagiti tallo nga ari a mangipalagip kadatayo ti kinangato a timid, kinaderrep ken gura.

Ita, itoy nga intay manen panangselebrar iti pannakaiyanak ni Jesus, saan koma a ti material a banag ti pakaiturongan ti imatangtayo no di ket iti pudno a kaipapanan itoy tapno maaddaantayo iti natibker a kinatao a di kabaelan a dupiren ti aniaman a bagyo wenno allawig wenno pait.

NAIMBAG A PASKUAYO KEN NABUNGA A BARO A TAWENYO AMIN!#