Ti Paskua Iti Panunot Ken Puso Ti Ubing (Maudi a paset)

Komentario ni Ma. Theresa B. Santos

 

Ti pannakadasig ti realidad ken ti personification ti maysa a kangrunaan nga akem ni Santa Claus.

Ti ibaballasiw ti biag ti ubing nga agturong iti manakman a tukad ti biag. Napateg unay a banag iti biag ti ubing ti panamati ken ni Santa Claus ket apaman a dumteng ti pannakausig ti kinapudno wenno realidad isu met dayta ti senial ti isasagpat iti manakman a tukad.

Palubosan ngarud latta dagiti ubbing nga agtignay ken agbiagda iti lubong ti kinaubing a maiduma iti lubong dagiti manakman.

Saantayo met ketdi a tubngaren ti kapanunotan ti presidente ta impalawagna laeng ti kinapudno. Ken maysa, baro ti presidente. Saanna pay laeng a nagemgeman ti rikna ti maysa a nagannak a mangidardarirag iti kinatao ni Santa Claus. Awanan pay kenkuana kadayta a rikna, dina pay napadasan. Saanna ngarud a maibaga ti rikna ti maysa a nagannak ta dina pay napadasan.

Iti daytoy a punto, makunami, ti eksperiensa ti kalalaingan  a mannursuro!

Isu a nasisita nga ilawlawa ti pannakaawat ken panirigan kadagiti kakastoy a saritaan  ta naisabali ti pagtigtignayan dagiti ubbing a lubong no ikumpara iti manakman.

Napateg unay ti akem ni Santa Claus kadagiti ubbing. Saanna laeng a pabilgen ti panagraem ken panagdayaw kadagiti nagannak kenkuana no di pay ket ad-adda nga ayatenda dagiti dadakkelda  ta isuda ti napudpudno a Santa Claus a taudan iti ayat ken pammateg. Dagiti nagannak ti mangited kadakuada iti aginaldo itoy a paskua. Asinoman nga ubing a mamati ken Santa Claus, mamatida met kadagiti nagannak kadakuada. Mamatida met iti kinaimportansia ti ayat ken pammateg.

Pabilgen ni Santa Claus ti relasion ti anak ken dagiti nagannak. No ti ubing ket adda panamatina ken ni Santa Claus, mangibitin daytoy iti medias iti tawa wenno sadino la ditan a paset ti balay. Mangaramid iti surat a pagkiddawanna iti arungaingna ita a paskua. Natural laeng kadagiti nagannak kenkuana a saanda  a paayen daytoy  nga anak agsipud  ta ay-ayaten ken ipatpategda  la  unay. Mangitedda iti aginaldo. Itedda dayta nga ayat ken pammateg.

Itoy a proseso, saan laeng nga insuro dagiti nagannak no ania ti kaipapanan ti ayat ken pammateg no di pay impatawiddan ti naimbag a sursuro ken aramid  kadaytoy nga anak; dumtengto met kadakuada daytoy a gundaway no agbalinda nga ama wenno ina.

Bassit laeng ti utek ngem naglawa ti taudan ti kinasirib. Kinasirib a saanen a nasken nga  ilawlawag ta sirib a mismon ti mangited iti interpretasion no ania ken no apay.

Isu daytoy ti punto a kayatmi nga ilawlawag ken ipaawat itoy nga interbio ken ni Presidente Benigno Simeon Aquino III. Pudno man a maysa laeng a personification ni Santa Claus.

Ngem saan met nga awanen nga adda pay naun-uneg a kaipapanan ti Santa Claus iti relasion ti ubing ken dagiti dadakkelna. Adda latta ni Santa Claus iti puso ken nakem ti ubing agsipud ta adda met dayta iti puso ken nakem dagiti nagannak. Ti ayat ken pammateg ti nangbalkot kadaytoy a relasion ti anak ken nagannak.

Makunami a saan ngarud a nasken nga ilawlawag ti kinaasino ken kinaania ni Santa Claus ta ti akmenna nga interpretasion ket di magatadan a banag. Apay nga ilawlawag pay laeng ti  kinaasino ni Santa Claus no maysa a kinasirib daytoy?

Wen, saanen a nasken nga ilawlawag ti kinaasino ken kinaannia ni Santa Claus ta dumtengto met laeng ti panawen a maawatan ti ubing. Daytoy a kinaasino ken kinaaniana ket isunto met laeng ti inna ipasagepsep kadagiti agbalin  nga annakna. Tapno agnanayon ken dinto maumag ti sirkolo ti biag a nabalkot iti ayat ken pammateg .

Masirib ti ubing a mamati iti Santa Claus. Masirib ti ubing a mamati kadagiti nagannak kenkuana. Masirib ti ubing a naipasidong iti ayat ken pammateg. Masirib ti  ubing nga ammona ti agayat ken mangipateg.

Wen, sibibiag ni Santa Claus. Agnanayon a sibibiag iti puso ti ubing. Agnanayon a sibibiag  iti puso ken nakem dagiti managayat ken manangipateg a nagannak kadagiti annakda. Ta ti mensahe a sinappuyot itoy a panawen, ket saan laeng a naikutan no di pay ket imparanud.

Dayta a panangiranud ket buklenna ti nair-irut pay nga anag ken kaipapanan ti talingenngen. Nga isu koma ti kapkapnekan a turongen ti amin.

Nagpaiduma daytoy a panawen – panawen ti paskua. Maluktan koma amin nga isip ken nakem ket makipagmaymaysa iti napudno a panggep ken kaipapanan.

Ken, wen, pudno la unay ti kinuna ni Presidente Benigno Simeon Aquino III: “Perhaps the idea of caring for everybody does not exist only during the Christmas Season but more so is a facet of everyday life that has to be looking out rather than looking purely at ones’ own self-interest.”

Saan laeng koma nga iti panawen ti paskua nga iparikna ken ipakita ti nasged nga ayat ken pammateg iti amin no di ket iti amin nga aldaw, oras, kanito ken gundaway…

NAIMBAG A PASKUA KEN NABUNGA A BARO A TAWENYO AMIN!#