Ti Paskua Iti Panunot Ken Puso Ti Ubing

Komentario ni Ma. Theresa B. Santos

 

PASKUA manen. Dimteng manen ti panawen ti panagkaykaysa para iti maymaysa a panggep, maymaysa a tignay, maymaysa a rikna,  maymaysa a pannakigamulo ken makipaggamulo iti ibibileg ti nagan ni ayat, pammateg, kappia ken talna. Kangrunaan ti amin, ti pannakigamulo iti panagrukbos ti ayat iti sangkataoan.

Pannakarikna iti awan kapadana a ragsak. Ti bileg ni ayat a maparnuay ket iladawanna ti kapkapnekan nga ar-arapaapen a turongen ti humanidad. Ta ayat ti kangrunaan ti amin. Ti ayat nga ubbog ti kinaasino no apay a ti tao ket timmao wenno naiparsua. Ket iti panagsaknap kadaytoy, agtalinaed iti isu amin ti kappia. Agari. Agsaknap. Dayta metten ti pannakarikna iti talna wenno talinaay. Ti tartarigagayan ti amin.

Ti tarigagay ti amin. Ti tarigagay ti ubing…

Itay laeng nabiit, natignaykami iti maysa nga interbio, nga isu ti tuodan daytoy a komentario ken panirigan.

Itay napan a bulan, Nobiembre 4, napasamak ti interbio ti Youtube Southeast Asia World Views series ken ni Presidente Benigno Simeon Aquino III. Sumagmamano pay laeng a personahe ti ininterbio ti Youtube ket pakaidayawan ti amin a Filipino ti pannakainterbio ti presidentetayo.

Inyebkas ni Presidente Aquino  ti karirikna, panirigan ken komentariona kadagiti agdama nga isyo ti kagimongan. Ni Google Executive Ross LaJeunesse ti nagbalin a moderator ken nagpili no asino ti agsaludsod iti presidente.

Maysamaysa ti nagsaludsod kadagiti napapateg nga isyo a sangsanguen ti kagimongan. Ngem adda simmiasi a saludsod – naggapu manipud iti maysa nga ubing a lalaki. Saan a maipanggep iti inaldaw-aldaw a pakaseknan wenno isyo iti kagimongan a nasken a sanguen ti saludsod ti ubing  no di ket maipapan ken ni Santa Claus! Sinaludsod ti ubing no mamati kadi ni Presidente Benigno Simeon Aquino III ken ni Santa Claus ken no sino a talaga, aya, ni Santa Claus?

Ti saludsod ket saan a gagangay a panagimtuod iti maysa a presidente maipanggep kadagiti isyo a pakaseknan ti kagimongan. Saan a maiyataday ta adda level dagiti kapanunotan ken saludsod nga ikkan iti importansia. Ngem ubing la ti ubing. Adda bukodda a lubong a maiduma iti lubong dagiti nataengan.

Ngem sigurado nga immukuok kadagiti puspuso ti saludsod ti ubing.

Saan nga awanen dagiti ubbing, ti kinapategda iti kagimongan. Isu ti nakitami a rason no apay a napili ti ubing nga agimtuod; a kas mangibagi kadagiti ubbing. Saan a mangipaay iti nasalimuot nga aglawlaw no di ket panangited kadakuada iti eksperiensa iti pannakipaset iti kagimongan – uray iti tungtongan ti kagimongan. Eksperiensa a pakamulianda a kas natudio ken mapagwadan nga umili no di man mararaem a dadaulo iti masakbayan. Panangited iti biangda ti nawaywaya a panagtignay babaen ti panangiyebkas iti linaon ti panunotda.

Husto ken maitutop la unay ti pangngeddeng ti Youtube Southeast Asia kadaytoy a pananginayonna iti ubing  nga agimtuod ken ni Presidente Aquino..

Mamati kadi ti presidente iti Santa Claus?

Ti sungbat ni nakaisem a Presidente Benigno Simeon Aquino III: “Do I believe in Santa Claus?  Santa Claus is perhaps the personification of … (the) best in people, the idea of generosity. More than anything, we really have to shift, to those of us still left (from) the criticize-anything-and-everything phase to transforming ourselves into how we can assist our neighbor, our sister, our brother or whoever, somebody we don’t even know…”

Ti sungbat ti presidente ket agdadata a kinapudno wenno realidad.  Maysa laeng a personification ti kinaimbag ni Santa Claus, saan laeng nga iti sao no di pay babaen ti aramid a namunganay iti ayat ken panangipateg.

Iti naganus a panunot ti ubing, dayta nga ayat ken panangipateg ket nariknada nga immuna kadagiti nagannak kadakuada. Isuda ti nakasursuruanda iti ayat ken panangipateg. Mamati la unay ti ubing ken ni Santa Claus a kas personification ti ayat ken panangiteg. Isu a patienda ni Santa Claus. Mamatida kadagiti dakkelda.

Iti naganus a panunot ti ubing, saan pay laeng a silulukat kadagiti banag a saan pay a napapanawen a malukatan ta dumtengto met laeng dayta a gundaway iti asinoman ket situtudio nga aglukat dayta iti panunot ken nakem. Dumtengto dayta a gundaway. Maawatannanto dayta a banag apaman a dumteng. Ket isunto met dayta ti imulana iti naganus a panunot ti agbalin nga anakna.

(Adda tuloyna)