Ti Paskua ken ni Manong Dex

Sarita ni Jobert M. Pacnis

(Maudi a paset)

Kas nasaon, dua tawen kalpasan a nagdenna da Manong Dex ken Manang Iliang idi maaddaanda iti anak a lalaki. A kalpasan laeng ti makatawen, napasarunuan manen.

“Nagitaka gayam, bro,” insutil dagiti padana a drayber.

Ta kasano, idi, kunada nga awan laingenna ta saan met laengen nga agsikog ni baketna. Ngannganina natibab ni Manong Ronnie idi ibaga daytoy nga ‘ibbong.’ Naimbag laeng ta naigawid ida dagiti kakaduada.

Desidido idi a mangrubirob iti rupa ni Manong Ronnie!

Iti idadateng dagiti ubbing, ad-addan a balay-trabaho laeng ti lubong ni Manong Dex. No mabalin, awan sayangenna a kanito tapno laeng makategged para kadagiti agiinana. Pagbalinenna pay koma nga aldaw ti rabii no mabalin.

Iti panagbuniag dagiti ubbing ni Manong Dex, inkagumaanna a nagbalin a nakallalagip. Nagpaaramid iti balloon, namsek iti Christmas lights ken dekorasion ti Paskua ti nanumo a pagtaenganda ta inranana a kadayta a kanito ti panagbuniag ti anakda—ta ken ni Manong Dex, kapapatgan a sagut kenkuana ti anakda a nagtaud iti Dios. Nagorder pay iti cake ken nadumaduma a taraon nga idi isu ti nagbuniag ken nagkasangay, segun kadagiti nagannak kenkuana, dina pulos napadasan.

Kasta man metten ti inaramidna iti maikadua a bungada. Paskua ti panangpabuniagna. Inayabanna dagiti pagayamna nga agbalin a nakananama a ninong ken ninang. Kayatna a sawen, dagitay manakman, dagitay mabalin a modelo kadagiti annakna. Saan a dagiti sanger a kas kenkuana idi. Ta ania koma ti karbengan dagitoy nga agbalin a ninong ken ninang.

Ti ngamin nakakalkaldaang a mapaspasamak iti agdama, gapu ta barkadan, alaenen a manganak iti buniag uray am-ammon a bartekero, babaero, durugista ken no ania la ditan a bisio ti adda kenkuana. Narigat ngamin ti mabagaan a dimo pay ammo dagiti papagayammo.

Awanen ti makiddaw ni Manong Dex kadagiti simmaruno nga aldaw. Nadungngo kenkuana ni Manang Iliang, natarawit ken maikkat iti bambannog dagiti bungada (nga ay-aywanan da Uliteg Itong ken Ikit Charing) no kasta a kumarayo dagitoy.

“Lakay,” inriing ni Manang Iliang ken ni Manong Dex iti maysa a rabii.

“Apay, baket?” inamadna.

“Kellaat metten a nagbara dagitoy ubbing,” kinuna ti asawana.

“Aggurigorda?” Tallo idi ti inaunaan idinto nga agdua ti adienna.

“Wen…”

“Ala, agrubuattay’ ngaruden, baket, ta itarayta ida idiay ospital.”

Agkakagarbo dagiti nalabsanda a pagtaengan iti ipapanda iti ospital. Kasta metten ti sanguanan ti balay-ti-ili. Makalawas pay, Paskua ngaminen.

Iti maysa a kanto, kellaat lattan a nakasabatda iti agdiwerdiwer a motorsiklo. Naladawen idi ilisi ni Manong Dex ti manibela ti traysikelda. Dimmungpar ti motorsiklo iti saydkar ti luganna.

Idi makapuot ni Manong Dex, addan a nakaidda iti maysa a kuarto ti ospital. Addada sugatna a gapuanan dagiti nabtak a sarming a naitira kenkuana. Naawan ti puotna iti pannakaitama ti ulona iti sarming iti sango ti manibela ti traysikelna. Naimbag ta saan a nakutog wenno nadaraan ti utekna.

Sinapul a dagus ni Manong Dex dagiti agiinana. Nakabantay kenkuana idin ni Ikit Charing.

Naipasiudaddan ta napakaruanda, anakko,” arig di simngaw a timek ni Ikit Charing.

Kasla nagrissuod ti lubong ken ni Manong Dex. Kinayatna man a suroten dagiti agiinana, saan a pinalubosan ti doktorna.

Iti kuartona, awan sabali nga inaramid ni Manong Dex no di ti nagkarkararag. Urayna la isangit no dadduma. Kanayon a tawaganna dagiti katuganganna nga agbambantay kadagiti agiinana. Ngem tallo nga aldawen, bin-ig latta a negatibo dagiti maaw-awatna a damag. Maysa-ken-dua ti tiansada a makalasat.

Iti maikapat nga aldaw, rimmuaren ni Manong Dex iti ospital. Nagdiretsuanna ti nagkararag iti simbaanda nga Aglipayano. Kalpasanna, nagrubuat a dagus tapno mapanna kitaen dagiti agiinana idiay siudad ti Tuguegarao.

Agsasallupang dagiti malabsanna a makipaskua. Iti uneg ti van, ayug-Pamaskua met ti maipatpatayab. Ngem kasla di marikna ni Manong Dex ti anag ti kararagsakan ken kagagarbuan nga aldaw iti biag ni Kristiano. Dagiti lattan agiinana ti adda iti panunotna. No mabalin, tumayaben tapno makagteng a dagus.

Saanda pay laeng a nakariing, barok,” insaibbek ti katugangan a babai ni Manong Dex idi makita daytoy.

“Ania ti kuna dagiti doktor, ‘nang?” inamadna.

“Under observation-da kano a tallo,” aganug-ogen ti baket.

Napan sinirip ni Manong Dex dagiti agiinana iti ICU. Kasla matmaturog laeng dagitoy nga agaabay iti katre. Saanna a nasarkedan ti riknana. Nagarubos ti nabuslon a luana.

Kalpasanna, sinapulna ti chapel ti ospital. Dita, impamaysana manen ti nakisarsarita iti Namarsua.

Manangngaasi a Dios, saanmo koma pay nga al-alaen dagiti agiinak. Itedmo ketdi koma a sagut kaniak itoy a panagkasangay ti ipatpategmo nga Anak… Kaasiannakami…”

Limmag-an bassit ti rikna ni Manong Dex iti panagsublina iti kuarto a yan dagiti katuganganna. Saanna nga ammo ngem kasla mayin-indayon ti riknana bayat ti pannagnana iti pasilio ti ospital. Sumalsalpot iti kaungganna ti nalamuyot a musika nga ipugpug-aw dagiti naimuntar nga ispiker kadagiti bobeda.

Ang Pasko ay sumapit/

Tayo ay mangagsi-awit/

Ng magagandang himig/

Dahil sa ang Diyos ay

pag-ibig…

Iti pay laeng iseserrek ni Manong Dex iti kuarto, sinabaten ti katuganganna a babai.

Napakebba la ketdi ngarud.

Apay, ‘nang?” nagbanarbar ti boses ni Manong Dex.

Naggapu ditoy ti doktor…”

“Ket?”

Okey kanon dagiti agiina…” uray la insangit ti baket.

Napatangad a napatanamitim ni Manong Dex.

Tayo’y mangagsi-awit/

Habang ang mundo’y tahimik/

Ang araw ay sumapit/

Ng sanggol na dulot ng langit…

KUNADA: Paskua ti kararambakan iti biag ni Kristiano. Ngem saan nga umanamong ni Manong Dex. Kenkuana, Paskua ti kararagsakan ken kapapatgan iti biag ni Kristiano. Kenkuana, Paskua ti rangtay iti yaasideg iti Namarsua.

Ngarud, iti ania man nga oras, sikakapettayo iti Dios. Saan nga ammo no kaano a dumteng ti pakasuotan. Ngem agpayso ti kunada, saan nga ited ti Namarsua dagitoy a pakasuotan no dina namnamaen ti maseknan.#