Ti politika iti panagsapul iti panggedan

Kolum ni Jobert M. Pacnis

(Tuloyna)

 

Gapu ta adu ti aplikante, saan a naikkan iti gundaway tapno makastrek iti alma mater-na kadayta a pannaki-assess-na. Ngem naawatanna. Yantangay nagrupogrupo (cluster) ti assessment, nangnamnama a makastrekto met laeng uray payen no kadagiti pampubliko a pagadalan iti dua nga ili iti kabangibangda (ka-cluster ti ilina). Saanen a nagsubli iti pribado a nagisuruanna ta baka ketdi no kellaat nga adda mabakante ket alaenda. Na-rigatton ti agpakada.

Iti panagur-urayna, adda awag nga agpayso. Ngem ag-substitute laeng iti makabulan iti kabangibang nga ili (a dida ka-cluster). Awan ngaminen ti maalada iti asideg a kualipikado isu a nangkitada iti sumaruno a cluster. Ket isu ti natuparda.

Dua koma gayam a bulan ti panag-substitute-na ta nag-maternity leave ti sukatanna. Ngem yanna a pagdaksan, adda gayamen nakauna kenkuana iti makabulan nga inselsel ti prinsipal iti nasao a pagadalan. Naimbag ta nasiimanda idiay ngato a di naki-assessed ti naiselsel ket pinaikkatda. Sayang, nakunana iti nakemna. Dua bulan koma. Adu daytan a pangbiag iti pamilia.

Ngem ania ngarud, nakunana. Ket dita a napaneknekanna ti kaadda ti politika iti iseserrek iti trabaho. Ta no awan, di nagsapul koma ti pagadalan iti pinag-substitute-da a naki-assessed? Ammo dagiti prinsipal dayta a pagalagadan. Kayatna a sawen ngarud, mabalin a kabagianda dayta kayatda nga iselsel.

Napardas a naglabas ti makabulan. Agosto pay laeng, awan manen ti pagisuruanna. Disiembre idi maalimadamadna a maikkanen iti item ti maysa a PSB (provincial school board) iti alma mater-na. No kasta, agkasapulanda ngarud iti maisukat iti puesto daytoy.

Nangnamnama nga isu ti awaganda ta iti rooster (listaan dagiti naki-assessed iti sibubukel a probinsia) nga iggemna, isu laengen ti kaasitgan a kualipikado. Inayon pay ti kina-alma mater-na ti nasao a pagadalan.

Ngem anian a pannakalpay dagiti abagana idi madamagna laengen nga addan naala a sabali a PSB. Ti nakas-ang ditoy, saan a naki-assessed ti innalada.

Nagsakit ti nakemna. Ngem binay-anna lattan. Manen, napolitika!

Ket iti maysa nga aldaw, itoy a panagsagsaganana para iti maikatlo a pannaki-assess-na itoy a bulan ti Abril, napan iti maysa a public attorney ta adda ipagnana a pappapel. Naranaan ditoy ti maysa a konsehal ti ili. Kabarioanna pay ketdi daytoy.

Ditoy, nagdamdamag ti konsehal kenkuana no pagisuruannan. Imbagana a tambay iti agdama ta duan a tawen a makiki-assessed ngem awan met pay ti bakante. Naibagana la ket ngarud ti kapadasanna a nasullatan iti namnamaenna a puesto.

Iniseman ti kalugaranna a konsehal. “Ayna, barok,” kinuna daytoy kenkuana. “Apay a dika nagun-uni? Makastrekka, aya, no dika agpatulong kadagiti politiko.”

Impalawagna a namnamaenna a masurot ti resulta ti assessment tapno makastrek iti panggedan. Manen, iniseman ti kalugaranna.

“No panggepmo met laeng ti sumrek iti gobierno,” kinuna ti konsehal, “masapulmo latta ti mangyendorso kenka. Di ketdin, atorni?” inkitana iti abogado.

“Wen, a,” ti ababa a sungbat ti abogado.

“Ala, umaykanto idiay ‘yan ni bise ta kaduaenka. Agpayendorsoka kenkuana. Saan a makakedked ti prinsipal dita (ti alma mater-na) ta adun ti naited ti munisipio. Riniwriwen. Pinagpapintasda iti pagadalan.”

Saan a nakauni. Agpayso gayam dayta a pannagna ti iseserrek iti trabaho, nakunana iti isipna. Tapno saan a mapabainan ti opisial, nagtung-ed lattan iti nasao daytoy. Numona ta adun ti kliente ti abogado a nagsangpet.

Ngem idi makaruaren, impettengna iti utekna: diakto umararaw iti sakaananyo. Addanto latta naikari a para kaniak. Diak kayat ti makautang iti naimbag a nakem! Eleksion man ngaminen ket.

WEN, pudno a mapaspasamak daytoy. Nabileg latta ti politika iti panagsapul, iseserrek iti panggedan. Ket matda latta dagiti awan kapetna nga agur-uray no kaano a maikkanda iti panawen a mangipakat kadagiti inadalda.

Daytoy koma ti maikkat a maminpinsan iti sistema ti gobierno.  Nakaal-alas! Ngem agdadata met a kinapudno!#