Ti pudno ken ni Ponso Pilato

Adda pagsasaotayo nga Ilokano, “Kitkitaem la ngaruden, dimo pay la makita.” Wenno “adda iti sangomon, sapulem pay laeng.” Isilpo dagiti babbaket ken lallakay nga addaan iti nalawa a muging: “No uleg koma dayta, tinukkawannakan!”

Nauneg a talaga ti Sao (word) dagiti mamasirib nga apongtayo. Saanda nga ibaga a direkta ti kayatda a sawen. Piningpiningenda laeng. Umawat dagiti makaawat. Maikapis ti saan a makaawat.  Maawatan dagiti makaawat ngem saan a maawatan dagiti saan a makaawat. Adda met dagiti makatarus ngem dida kayat nga awaten gapu iti kabukbukodanda a rason.

Nabileg unay ti Sao. Adda tagiruotna. Ta uray adda iti sangom, dimo pay makita. Isu a kuna dagiti nalawa ti mugingda a babbaket ken lallakay a no uleg koma ket timmukkawen, ta kitkitaem la ngaruden ngem dimo pay makita.

Bulsek a simumulagat!

Ta ania ngamin aya ti Sao?

Sakbay a naparsua ti lubong, addan ti Sao, ket ti Sao adda idi iti Dios, ket no ania ti Dios, kasta met ti Sao. (Juan 1:1) Nagbalin a tao ti Sao ket nakipagtaeng kadatayo. Nakitami ti dayagna a napnuan iti parabur ken kinapudno. Daytoy idi ti dayag nga inawatna kas kakaisuna nga Anak ti Ama. (Juan 1:14)

Dayta ti agdadata a pudno.

Ni Jesus kinunana, “Siak ti dalan, ken ti pudno, ken ti biag; awan ti makapan iti Ama no di magna kaniak…” (Juan 14:6)

Mismo a ni Jesus ti nagkuna nga isu ti pudno. Sapulen kadi pay laeng ti pudno?

Daytoy ti pagsarmingantayo ita kadaytoy Nangina nga Aldaw. Daytoy koma ti intay imutektekan, ti intay utoben a nalaing amangan no simumulagattayo ngem ditay met makita ti pudno. Ta adda dagiti banag a mulmulagatan la ngaruden ngem di makita. Saan a mautob wenno saan a simrek ti kinasirib ti Sao kadatayo isu a saantayo a naawatan.

Kastoy met laeng ti napasamak idi naisaklang ni Jesus ken ni Ponso Pilato. Saan a nakita ni Ponso Pilato ti pudno uray no kitkitaennan wenno kasasaona ni Jesus. “Pudno? kinuna ni Pilato, “ania dayta?” (Juan 18:38)

Nupay kasta, ammo ni Pilato nga awan basol ni Jesus. Uray ni Herodes, awan nasarakanna a nagbasolan ni Jesus.

Mabasa iti ‘Maikeddeng a Matay ni Jesus’ iti Lucas 23:13-25:

(13) Pinaayaban ni Pilato dagiti panguluen a papadi, dagiti agtuturay ken dagiti tattao.

(14) Kinunana kadakuada: “Insaklangyo kaniak daytoy a tao a kas maysa a mangyaw-awan kadagiti tattao. Inusigko iti imatangyo. Ket awan nasarakak nga inaramidna kadagiti ipabpabasolyo kenkuana.

(15) Uray ni Herodes, awan nasarakanna, isut gapuna a pinaisublina kadatayo. Awan naaramid daytoy a tao a pakaigapuan ti pannakapapatayna.

(16) Ngarud, pasaplitko laeng sakonto palubosan.”

(17) Tunggal Piesta ti Paskua, kadawyan ni Pilato ti mangwayawaya iti maysa a balud.

(18) Ngem sangsangkamaysa dagiti tattao a nangipukkaw, “Papapataymo! Ni Barrabas ti kayatmi a wayawayaam!”

(19) Naibalud ni Barrabas gapu iti riribuk a naaramid iti siudad, ken gapu ta pimmatay.

(20) Gapu iti ayat ni Pilato a mangwayawaya ken Jesus, kinasaona manen dagiti tattao.

(21) Ngem impukkawda, “Pailansam iti krus! Pailansam iti krus!”

(22) Pinitlo ni Pilato ti nagkuna kadakuada, “Ania kadi ti basolna? Awan nasarakak nga inaramidna a pakaigapuan ti pannakapapatayna.  Pasaplitko laeng sakonto palubosan.”

(23) Ngem inyad-adda dagiti tattao ti nangipukkaw a mailansa  ni Jesus iti krus. Iti kasta, impangag ni Pilato ti dawatda.

(24) Inkeddengna a mapapatay ni Jesus.

(25) Winayawayaanna ti tao a kayatda, ti naibalud gapu iti panangriribuk ken pammapatay, ket inyawatna ni Jesus kadakuada tapno aramidenda ti kaykayatda.

Bulsek a simumulagat ni Pilato! Nakitana la ngaruden ti pudno ngem dina pay la sinurot. Nakitana la ngaruden nga awan ti basol ni Jesus, ngem iti diktar dagiti umili, nagimbubulsek iti pudno a pasamak. Isu a bulsek a simumulagat.

Idi panawen a pannakaisaklang ni Jesus, ken iti agdama a panawen, adu dagiti bulsek a simumulagat. Adu dagiti makaammo iti pudno ngem saanda nga ammo a suroten dayta a pudno. “Siak ti dalan, ken ti pudno, ken ti biag; awan ti makapan iti Ama no di magna kaniak…” (Juan 14:6)

No saantayo nga ammo a suroten dayta a pudno, saantayo a makapan iti sanguanan ti Dios Mannakabalin amin. Ni Jesus mismon ti nangibaga nga isu ti pudno.  No saantayo nga ammo a suroten ni Jesus, kasano a makapantayo iti sanguanan ti Dios Mannakabalin amin?

Adu ti makaammo ken Jesus. Kasta met nga adu dagiti bulsek a simumulagat; a nakitadan ti pudno ngem naginbubulsekda pay laeng.

Iti daytoy a Semana Santa, usigentayo koma a nalaing daytoy a pagsarmingan iti biag.

Am-ammotayo kadi ni Jesus? Sursurotentayo kadi ni Jesus? Sursurotentayo kadi ti pudno wenno adda  mangidikdiktar a saan, kas iti napasamak iti biang ni Pilato?#