Ti Religious Tourism ken ti Kabalikid ti Turismo

Salaysay ni Christine Marie R. Verzosa

 

Tunggal itatadog ti baro a tawen, maysa a kalatakan a pakaituonan ti imatang ti sangkapagilian ti Feast of the Black Nazarene ti Quiapo, Manila iti Enero 9. Iti isasangbay ti kaaldawanti selebrasion ket linaon daytoyen dagiti print ken broadcast media ken online news a mangiwarwaragawag iti blow-by-blow update iti mapaspasamak.

Saan laengen nga iti Quiapo ti pakapasamakan daytoy no di ket adda metten adapted version kadagiti sabsabali a lugar nga adda ikutna nga  imahe ti Nangisit a Nazareno. Saan laengen a dagiti deboto iti pagilian, uray dagiti agnanaed iti ballasiw-taaw, ti mangayat a mangsaksi ken makaimatang iti kinaidumduma ti prusision wenno translacion a mapasamak.

Isu a napanunot ti Manila City Hall Tourism Office a pagbalinen laengen nga international pilgrimage affair ti translacion. Iti nagan ti turismo, tapno lalo pay a makaawis immatang ti internasional a pasken, nasken ngarud ti panagimbitar, panagawis iti makipartisipar wenno mangsaksi iti mapaspasamak a pagteng.\

“That is the proposal of the Manila Tourism that this will be an international pilgrimage affair or occasion. I think they will invite foreigners and balikbayans to come and participate also,” daytoy ti palawag ni Msgr. Clemente Ignacio, rector ti Quiapo Church, iti maysa nga interbio kenkuana. Ngem maitutop kadi a daytoy ti mapasamak? Ania ti pagsayaatan ken disbentahe daytoy maidardarirag nga international pilgrimage affair?

No taldiapan dagiti nagduduma a pilgrimage, saan nga iyawis dagiti agrebbeng itoy; nupay kasta, adda dagiti travel agencies nga agawis iti pasken. No isipen a nalaing, agduma ti motibo dagiti travel agencies ken dagiti agrebbeng iti pasken. Iti turismo, agawis kadagiti makipartisipar ken mangimatang iti mapaspasamak, kabaliktadna kadagiti agrebbeng ta saanda nga agawis – kabukbukodan a preperensia ti asinoman a makipaset itoy, kas maysa a panata wenno napintek a kiddaw kas maysa a deboto. No intay usigen a nalaing ti pakaitarusan ti religious tourism, buklenna dagiti sumaganad nga aspekto ti travel industry: pilgrimages, missionary travel, fellowship vacations, faith-based cruising, retreats, monastery visits, faith-based camps, religious tourist attractions, crusades, conventions, rallies ken dadduma pay.

Nalawag ngarud a saan a maibilang a maysa kadagiti rupa ti religious tourism ti translacion ti Feast of the Black Nazarene.

Saan nga inayonan ti rector ti simbaan ti Quiapo, Manila ti singasing ti Manila City Hall Tourism Office a pagbalinen nga international affair ti translacion, kas paset a programa ti turismo ta maiduma iti konteksto ti kaipapananna no maibilang a kas pangallukoy iti turista ti selebrasion.

Kastoy man ti kanayonan a palawag ni Msgr. Ignacio maipapan itoy: “I told them that this is not tourism but rather a religious event so they would invite people who are also Catholics, who are praying in other countries, who want to participate. When we say pilgrimage it’s really a religious event.”

Kadagiti dadduma a nangiyebkas iti kapanunotanda, kunada a saan a maitutop a pangatrakar kadagiti turista ti pasken.   Maysa a religious event ti Feast of the Black Nazarene ti Quiapo, saan ket a kas maysa a tourism event. Mailaksid kano ti pudpudno a kaimudinganna no mairaman a kas pangatrakar wenno pangawis kadagiti turista, a kas kadagiti dadduma nga religious event idi un-unana a panawen a linaokan itan ti turismo, a sinagpawan ti komersio ken negosio—siempre, ti turismo, kasallabayna ti komersio ken negosio.

(Adda tuloyna)