: Ti Sakasaka a Tumataray (Maudi iti dua a Paset) | Tawid News Magazine - Weekly Ilocos News 📰

Ti Sakasaka a Tumataray (Maudi iti dua a Paset)

“Amin a sinalipannna, gold medal!” sipapannakkel ti  agkabannuag a lalaki a coach a nangibaga.  Pinayapayanna ti  ubing nga umasideg kadakami ta  imbagak a mannuratak.

Nainayad ti pannagna ti ubing nga umasideg. Naraniag dagiti matana iti apagbingi nga isemna. Kullapit ti bagina ken kinesset ti init ti kudilna. Lastiko ti pinangpunggosna iti buokna nga aguy-uyaoy iti bukotna.

“Congratulations, Insiang,  nalaingka a tumaray!” inkablaawko.

“Tenkio, ma’am,” mababain a simmungbat.

“Apay a dika nagsapatos?” kinunak ngem nagbabawiak a dagus ta amangan no mabainan. Nagdumog ti ubing.

“Igid ti baybay ti lugarda. Praktisna ti agkamat ken agkemmeg kadagiti tarukoy. Nairuam a saan nga agsapatos,” inyisem ti coach.

“Awan kadi ti sapatosmo?”

Immisem laeng a nakipinnerreng iti apagapaman sa manen nagdumog. Impalikudna pay dagiti imana. Iti panangipudosko, kasla mababain. Kimmautak iti walletko. Dimmutdotak iti bukel a lima gasut.

“Nayon a premiom,” iniggamak ti kannawan a dakulapna ket impapetpetko ti kuarta.

“Thank you very much, ma’am!” immisem a nakipinnerreng.

‘Igatangmo iti sapatosmo, a?” Nagtung-ed  a timmaliaw ken immisem a mangmatmatmat iti kuarta.

“Consistent honor pupil sipud idi grade one. Second honors,” binagi ti coach. Nagpakada idi adda iti nangawag kenkuana.

“Saanka kadi a makarikna iti bain gapu ta sika  laeng ti saan a nakasapatos?” inamadko. Simro manen ti nakulit a mugingko.  Inaprosak ti ulona tapno maisingedko ti riknak kenkuana.

“Mababainak ngarud a makilumba ta siak laeng ti awan sapatosna, ma’am. Awan igatang da tatang ken nanangko.”

Kunakto pay!

“Ngem no makakitaak kadagiti awanan saka, kunak iti bagik a nagasgasatak nga adayo ngem isuda. Siak, sapatos laeng ti awan kaniak. Isuda ket saka!” kinunana ket kinudkodna pay ti ulona sa nagkatawa iti apagapaman.

Napangangaak iti imbagana!

“Wen, nagasgasatka nga adayo ngem dagiti awanan saka,” dayta laeng ti naarikapko nga isawang. Napidutkon ti sapsapulek!

ITI PANNAKAPIDUT iti taraon ti panunot,ad-adda pay a rumangrang  ti segged ti panagbiag. Agserbi ti lawagna a pagadawan iti kired ken baro a namnama.

Kas iti ubing. Nagasat nga ubing. Pudno a nagasgasat ngem kadagiti awanan saka. Sapatos laeng ti awan kenkuana.

No maminsan, adda dagiti depekto ken kinaawan wenno kinakurang iti maysa a tao ket agsapul iti banag a saanna met a masapulan. No dadduma pay,  saanna a maikkan iti importansia ti adda iti sanguananna wenno dagiti banag nga  ik-ikutanna gapu iti panagsapulna iti ad-adu wenno iti panagsapulna iti sabali a namnamaenna a makaited iti pannakapnek kenkuana. Saan a makuntento iti adda kenkuana isu nga agsapul iti sabali. Saanna  nga aramaten ti adda kenkuana ta nalabit dina ammo a balitok met daytoy.  Kadaksan iti amin, saanna ngata nga ammo a napateg amin a  banag nga adda kenkuana  no maaramat  daytoy iti umno ken nainsiriban. #