Footer

Ti Sakasaka a Tumataray (Umuna iti dua a Paset)

ADDA  panawen a makulkol ti panunot.  Bunga daytoy ti nagsasamparat a panagpampanunot iti nagduduma a kaginnubal iti inaldaw: trabaho, pagtaengan, personal, aglawlaw, nakaisigudan ken dadduma pay. Isu a kasapulan ti pannakaurnos. Wenno unwind no di man revitalized.

Ti panagsapul kadagiti nadumaduma a kaipapanan ti biag ket maysa nga addang a panangurnos iti nakulkol a panunot. Iti kanito a masarakan aniaman a kaipapanan ti biag,   mitsa ti talged, baro a namnama  ken pagsanggiran tapno manen umaddang. Bumangon no naidugmam. Sukdipan  manen ti arapaap.

Adda panawen a pannakakulkol ti panunot. Isu a kasapulan ti panagsapul kadagiti mangurnos. Saan a makatulong ti panagkumeg iti suli, masarakan dagiti kaipapanan ti biag a mangurnos iti nakulkol a panunot iti sadinoman, lalo iti ruar ti taeng wenno iti ruar ti tangkal.

Iti naminsan a panagubbaw ti panunotko, nagpagnapagnaak tapno agsapulak iti kaipapanan ti biag a mangurnos iti nakulkol a panunotko no di man mangkarga manen iti ubbaw a linaon ti mugingko. Ta  patiek, adda dagiti mapidut a taraon iti panunot kadagiti ummong ken iti uray langalang.

Naturongko ti athletic bowl.  Madama ti rehional a torneo dagiti agad-adal nga ubbing iti elementaria ken hayskul. Iti panagbuyak kadagiti nagduduma a salisal ti ay-ayam, in-inut a naurnos ti nakulkol a panunotko. In-inut a nakargaan ti ubbaw a panunotko. Timpuar ti isemko ken rimmaniag dagiti matak ta sumidap manen ti mugingko ken umipas ti imahinasionko.

Natibong ti palakpak ken dir-i tunggal maiwaragawag dagiti mangabak iti tunggal salisal. Ngem katibongan amin ti palakpak ken dir-i idi maiwaragawag ti lumba ti tinnarayan para iti elementaria.

“Insiang! Insiang! Insiang!” ikkis dagiti agbuybuya a kaadduanna pay ti timmakder.

Asino daytoy nga Insiang? nakunak iti panunotko. Nagpaliiwak.

Nagsagana dagiti ubbing nga aglulumba. Idi naguni ti putok, kasla imbiat a pana ti maysa a nakuttong nga ubing a babai. Mas lalon ti iriag dagiti agbuybuya ken mangiyik-ikkis iti nagan nga Insiang.

Lima a metro ngata wenno nasursurok pay ti nangitarayan ni Insiang kadagiti kasalisalna. Kasla marba ti linong ti athletic bowl iti ragsak ken dir-i dagiti agbuybuya para kadaytoy  ubing a player iti track and field.

Simrek ti kuriosidad iti mugingko. Dimtengen dayta panagwerret wenno panagandar ti imahinasion  ken panagpaliiw.

“Talaga nga awan ti mangatiw kenkuana?” impinal ti  kannigidko.

“Sprint queen?” innayon ti adda iti sanguanak.

“Napartak a tumaray a, ta awan sapatosna!”  Kuna met ti adda iti likudak.

Iti panangmirak, pudno a sakasaka ti ubing nga agturong iti lamisaan dagiti opiales iti torneo. Napaisemak.

Saanko la ketdi a mapalusposan daytoy a gundaway. Nasken nga asitgak ti ubing. Nasken a kasaritak. Sinapulko ti coach-titserna.

           (Maigibusto)