sinursuran-banner-sqSinursuranNi Jobert M. Pacnis

Ti Sarita Para Ubbing

Kolum : Sinursuran
Ni Jobert M. Pacnis
(Maudi a paset)

Kastoy man ti linaonna:
Iti dayta a bigbigat
Nasapa a bimmangonak
Ta ken tatang kumuyogak
‘Ti papananna a siudad.

‘Di kalman nga inrengrengko
Daytoy nga isusurotko
Panagreportna ‘diay D.O.
Ta ‘su ket agsabstityutto.

Wen, ni tatangko ket maestro
Ngem awanan pay trabaho
Bakante awan pay kano
Kunana: “Anus, Balongko.”

Dina koma idi kayat
Narigat no aglanganak
Iskul a pagbasbasaak
Baka honor roll matnagak.

Ngem kinayatna met laeng
Ta kunak: “Ni mammi Aileen
Napan nagpapagut ngipen
Ta dadael kan’ unayen.”

Tapno nadaras ti biahe
‘Tay van ti naglugananmi
Ragsak ken ayatko, permi!
Makuna a diakton paudi.

Abay drayber ti tugawmi
Tapno diak kan’ kakaasi
A maip-ipit ‘diay udi
Baka siak daytay agriri.

‘Di agtartarayen lugan
Binuyak dag’ti malabsan
Ayna, makaay-ayo man
Balbalay nagdadakkeldan.
Naglawa met namulaan
‘Ti agduduma a makan
Kangrunaan mais, pagay
A kasapulan la unay.

Ngem iti adayo, anian
Bantay, turod ket kalbodan
Kasano ti masakbayan
No perdi nakaparsuaan?

Kunada ‘diay pagadalan
Kaykayo ti katulongan
No dagitoy ket awandan
Didigra ti malak-aman.

“Daytan ti Rangtay Magapit,”
Ni tatang inna inkalbit.
“Perpekto a naaramid,
Hyperbola a natangig.”

Kinuna manen ni tatang:
“Daytat’ Karayan Cagayan
Maysa a kadakkelan
A karayan ti pagilian.”

Nagsardengkam’ iti kanto
Bimmaba ti pasahero
Pagammuan, addan aglako
Tinupig, mani ken puto.

Inggatangannak ni tatang
Tapno diak kan’ mabisinan
Ta biahemi adayo pay
Makatuok ti aguray.

Iti haywey ti Alcala
Imkiskam’ iti uray la
Ta bigla a nagpatengnga
Maysa a nuang ‘ti kalsada.

‘Imbag ta nakapagpreno
Ti drayber a ni Mang Ambo,
“Agyamankam’ kenka, Apo,”
Ti naitanamitimko.

Kinitanak met ni tatang
“Dika kad’ met la nasaktan?”
Inamadna; madanagan
Sa ‘pannak inap-aprosan.

Nupay agtigtigergerak,
“Okeyak, tatang,” kinunak.
Ngem dagus a nagkalmaak
Idin ta arakupennak.

Idi makadanonkami
Nagadu ketdin a traysi
“Papananyo kadi, pari?”
Saludsod a naingirsi.

Kunan’ tatang: “Pari, D.O.”
“’Tayon ta itulodkayo,”
Sungbat a nakaam-amo.
Nagsakaykam’ ken tatangko.

Idi agpleten ni tatang
Nagdakkel met ti singirnan
Ti drayber a garamugam
“Capacity,” kunkunanan.

Din a nakipinnapilit
Ni tatangko a nasingpet
Ad-adunto kan’ agsangpet
A kasukat ti nakusit.

Ti ragsakmi napalalo
Agsabstityut ni tatangko
Innem a bulan ‘diay sentro
Kunana: “Nakitam, Jethro?”

Pinayapayan ni tatang
Kutsero nga agur-uray
Kunana: “’Diay man pansitan,
Iti kaimasan, a, ‘Tang?”

Anian a nakamaymayat
Kalesa a nagluganak
Ket naipalagip kaniak
Nuang ni lilong a liblibiak.

‘Di mapankamin terminal
Mariknak metten ti al-al
Ta ti pudot kasta unay
Ta awan kayo aglawlaw.

‘Ton sumangpetak’diay balay
Sangoekto mula ni tatang
A kayo ‘ti arubayan
Sibugak tapno di matay.

Idi agandaren lugan
Makaturogak met lattan
Ket iti saklot ni tatang
Inturogko’t kasta unay.

Pikpik ti nangriing kaniak
“Ditoyen,” kuna ti amak.
Kimpetak sakam’ dimsaag
‘Yaman ta ‘wan napasamak.

Idi makagtengkam’ balay
Dagus simmabat ni nanang
Ragsakna ti kasta unay
Ket inar-arakupnak pay.

Iti ketdi panunotko
Awisekto man ni lilo
Ta ‘ti nuangna a naamo
Ket agpaisakayakto.

Inyalat daytoy a sarindaniw ti maikadua a gunggona.
Ala, padasem met, ka-Sinursuran, ti sumurat iti sarindaniw tapno umadu pay ti kastoy a literatura a para kadagiti ubbing. —30