sinursuran-banner-sqSinursuranNi Jobert M. Pacnis

Ti sarita para ubbing (Umuna a paset)

KALKALPAS la unay ti Nailian a Kombension ti GUMIL Filipinas (Gunglo dagiti Mannurat nga Ilokano iti Filipinas ken iti ballasiw-taaw), ka-Sinursuran. Maika-46 a tawennan. Naangay daytoy iti Cabicungan Inn, C5, Claveria, Cagayan itay Abril 18-20.

Saanak nga adda ita ditoy a mangidaydayaw iti napasamak a kombension gapu ta naurnos, awan pakapilawanna ken napnek ti amin a timmabuno. Dagiti delegado ti makaammo nga agkuna kadayta ta naalas man a kitaen nga agtaud iti host a GUMIL chapter ti feedback.

Addaak man ita, ka-Sinursuran, tapno ibinglayko bassit ti lektiur nga impadigok kadagiti dimmar-ay. Ta dayta la ngarud ti maysa pay nga akem ni mannurat.

Diak man ninamnama daytoy nga akem iti maysa a Nailian a Kombension. Ta kasla kaano la daydi kinamannurotko kadagiti id-idoluek iti tay-ak ti panagsuratan tapno tumabuno iti tinawen a kombensionda. Diak pulos naisip nga umuliak iti entablado ti kombension tapno aglektiur.

Adda panagngudeng ti rikna idi naipakaammo kaniak daytoy. Maikariak kadin nga aglektiur iti entablado ti GF?

Kayam dayta, adu a panangpatibker iti rikna. Ket napuotak laengen ti bagik a nangawat iti topiko maipanggep iti Literatura a Para Ubbing. Kaduak ditoy da Ma’am Aileen Rambaud (nangtratar iti sarita a para ubbing), Reynaldo E. Andres (ortograpia) ken Sir Johmar R. Alvarez (daniw a para ubbing). Sarita a para ubbing met laeng kaniak.

Pagsayaatanna, naisina ti grupo dagiti estudiante ken mannursuro a makuna nga agdadamo iti tay-ak ti panagsuratan. Isuda dagiti nagbalin nga audience-mi. Idinto nga iti dayta met laeng nga oras, natratar ti panagsurat iti nobela iti ummong dagiti bangolan wenno addan naganna iti panagsuratan.

Napanunot daytoy ti GUMIL Cagayan (iti panangidaulo ni Sir Freddie Pa. Masuli) ken GF (iti liderato ni Apo Arthur PN. Urata, Sr.) tapno matutokan dagiti agdadamo (malaksid iti maysa pay a programa ti GF a Pasnaan) a nagatendar. Iti ngamin kallabes, adda dagiti feedback nga awan maad-adal dagiti delegado ta nangato kan’ unay ti level dagiti maisursuro. Kasano ngaruden dagiti agdadamo la unay a dumar-ay nga agtarigagay met nga agbalin a mannurat?

Ngem madi met a ti lattan basic ti kanayon a maisursuro iti kombension tapno makuntento laeng dagiti agdadamo. Masapul la unay ti panagdur-as ti Literatura. Ngarud, masapul a ngumato a ngumato ti agpang dagiti mailektiur.

Isu a napagsina dagiti delegado idi orasen ti lektiur a panagsuratan iti literatura a para ubbing.

Ket sapay la koma itoy nga iburayko ita, makaibati iti ared-ed ti adal kadagiti di nakadar-ay iti nasao a kombension nga agtarigagay met koma nga agatendar ngem laplapdan laeng dagiti naiwaras a damdamag nga awan masursuro ta inniliw met laeng ti mapaspasamak ken nangato unay nga agpang ti maisursuro.

Adtoyen:

ITI pannakaipatpatungpal ita ti programa ti Departamento ti Edukasion maipanggep iti MTB-MLE, nakita ti panagkasapulan dagiti mannursuro kadagiti aramaten iti panagisuroda aglalo iti sarita a para ubbing a naisurat iti pagsasao a nakayanakanda—ti Ilokano. Daytoy a banag, nalaka laeng supusopan dagiti mannurat nga Ilokano. Nabaknang ti Literatura Ilokana, dayta ti panirigak. Aglaplapusanan kadagiti material a mabalin nga usaren dagiti mannursuro.

Ngem ti yanna a pagdaksan, awan pay kadagitoy a sarita a para ubbing ti malagipko a nailibro (nupay iti daniw a para ubbing ket nausatanen ti pannakailibroda). Ngem malagipko ketdi a kadagiti tawen a naglabas, iti biang ti kangrunaan a magasin ni mannurat nga Ilokano– ti Bannawag— saan a nagbaybay-a. Idi addaak iti elementaria, adda daydi benneg ni Dr. Onofrecia Ibarra a sarita a para ubbing. Addada pay dagiti saludsod iti udi ti sarita a masapul a sungbatan tapno makita met laeng no adda naibatina kadagiti readers aglalo kadagiti ubbing. Iti kabayag met daytoy a benneg, a nagawan, sa met laeng nagsubli, adu la ketdi ti naurnong ni Dr. Ibarra a mabalin a maited a material (aglalo no ilibrona dagitoy) kadagiti mannursuro.

No malagip, insubli ti Bannawag kadagiti panidna dagiti sarita a para ubbing sumagmamanon a tawen ti naglabas. Ti yanna nga adat, sinurat dagitoy dagiti ganggannaet a naipatarus laeng iti lengguahetayo. Saantayo a bukod nga estoria, saantayo a bukod a mannurat dagiti nagsurat. No kasta ngarud, saan a bukod a buya iti aglawlaw dagiti ubbing iti lugartayo dagiti mabasada kadagitoy nga estoria. Ngem dina met kayat a sawen a saan a dakkel a katulongan kadakuada. Ti maagsaw nga adal no nabasada wenno naibasa kadakuada dagitoy a sarita, saan la ketdi a magatadan.

(Adda tuloyna)