Ti Saudisation ken dagiti Pinoy

Salaysay ni Jobert M. Pacnis

(Maudi a paset)

 

Iti pay report, mapan kano a 2,000 a mannursuro ita idiay Saudi ti masisiim ta adun kadagitoy ti illegal ti panagtalinaedda sadiay. Kadagitoy a mannursuro, adu ti kailiantayo kadakuada.

Ngarud, iti biangtayo a kas maysa kadagiti kaaduan a mangmangged iti ballasiw-taaw, dakes a damag daytoy ta maikkatantay’ manen iti oportunidad iti panagsapul iti “narabraber a pagaraban” kadagiti sabsabali a pagilian para iti naranga a masakbayan ti pamiliatayo.

Di ad-addanton no ag-full implementation dayta a programa ti gobierno ti Saudi? Kasanon no saanton a pulos nga agawat (uray legal) kadagiti ganggannaet a trabahadorna?

Ti nakas-ang pay ditoy, no tumuladto metten dagiti sabsabali a pagilian. Di pay ket awanton ti papanan dagiti kailiantayo nga agragut a makaabrod para iti pagsayaatan ti pamiliada?

Kasanon?

No adalentayo daytoy a mabalin a mapasamak, umad-adunto la ketdi ti agrigat a kailiantayo. Dayta, a, ket no di maisapulan ti gobiernotayo ti solusion ti nakalayat a parikut.

Ngarud, ita koma pay laeng, ipamaysan ti gobierno ti panagparnuay kadagiti panggedan tapno saan metten a masapul a makigasanggasat pay dagiti umilina iti ballasiw-taaw. Ken kitaenna koma met ti pannakaited ti umisu a katukad ti pagbambannogan dagiti mangmangged. Ta uray pay no agpayso nga adda trabaho a maitedna no di met umanay a pangbiag iti pamilia, agragutto latta dagiti umili nga agabrod.

Ngem kas nasaon, kasanon no awanen ti pagilian nga agawat pay kadagiti sabali ti pulina nga agtrabaho iti pagilianda?

Itoy a pagteng, saan nga adayo a di makapanunot dagiti maseknan nga umili a makapanunot iti dakes tapno mabiagna laeng ti pamiliana. Ta asino, aya, ti makaitured nga agrigat dagiti ipatpategna iti biag?

No ngarud kabaelan ti Saudi nga ipatungpal ti nasao a linteg, kabaelan met siguro ti gobiernotayo. Anian a nagsayaat no kasta ti mapasamak. Awanen ti masayyasayya a pamilia gapu iti panagiinnaddayo dagiti kamengna. Matarabayen a naimbag dagiti annak ket saandan a maiwawa iti killo a dana.

Subliantayo dagiti kailiantayo nga agrigrigat ita iti  pagilian ti Jeddah. Nangteden ti Ari ti umdas a panawen tapno maipagna dagiti kailiantayo dagiti papelesda tapno mapalubosandan nga agawid. No dida ikaskaso daytoy, matiliwdanton ket maibaludda sadiay. Tiliwenton ida ti gobierno itoy umay a Hulio no dida pay laeng maipagna dagiti dokumentoda para iti naannayas a panagawidda. Saan laeng a basta matiliw ken maibaludda. Mamultada pay!

No langit idi kadagiti kailiantayo dayta a disso a dinappatanda, saan itan. Iti tunggal aldaw nga aglabas, kalbario kadakuada gapu iti rigatda nga agdidippiit iti nakail-ilet a disso.

Ita a masursurat daytoy, agtultuloy met ti pannakipatang ti gobiernotayo iti gobierno ti Saudi Arabia tapno mapadaras ti pannakapagawid dagiti kadaraantayo. Ar-aramidenna metten ti plano no kasano a mayawid a daras dagiti kailiantayo. Kiniddaw ti gobiernotayo a maikabassit koma dagiti mabayadan iti pannakaproseso dagiti dokumento tapno saan met unay a marigatan dagiti kailiantayo. Ta, wen, saan nga asi-asi ti mabusbos iti pannakaproseso dagitoy a pappapel.

Kas nasaon, agserbi koma ngarud daytoy a kalbit kadagiti agpangpanggep nga agabrod.  Iti met gobierno, panawenen tapno ipamaysana ti mangusar iti kangrunaan a “gamengna” — dagiti umili.

Ikararagtayo koma ngarud a kasta. Ken awan mapasamak a dakes kadagiti kadaraantayo nga agur-uray iti pannakapagawiddan. Sapay la koma met ta adda trabaho a sangpetanda iti panagsublida. Ta no awan, saan nga adayo a mapanunot dagiti kailiantayo ti mangpadas manen ti gasatda iti sabali a pagilian.#