Ti ziplock ni Uliteg Isiong

Ti ziplock ni Uliteg Isiong

NAMINSAN pay a pinasikigan ni Uliteg Isiong ti pakabuklanna iti sango ti pagattao a sarmingda. Napnek iti pakabuklanna. Adda pay laeng daydi langa a pangaw-awisna kadagiti babbalasang iti ilida a Nagpariaan iti baet ti apagsagpat nga innem a dekadana. Iti panagkunana, dakkel pay laeng ti panagkakaingas, ken panagkabagbagida ken ni Gabby Concepcion nga idolona. Kinapudnona, adu ti agkunkuna a karuprupana a talaga ti nasao nga artista.

Apagisu a rummuar iti balayda idi mapasungadan ni Uliteg Isiong da Uliteg Pinong, Uliteg Bitong ken Uliteg Aldong. Kas kenkuana, maong a pantalon nga inasmanganda iti tsekerd a polo ti suot dagitoy. Ita a malem daydi inyawis kadakuada ni Uliteg Sabas a Hawayano idi naranaanda daytoy iti plasa. Agpakan kano. Ita laeng a makaawid kalpasan ti nasurok a tallo dekadana a nagtrabaho idiay Hawaii. Inranana pay iti kasangayna ti parambak. Ken pannaka-blessing payen ti impatakderna a baro a pagtaenganda.

“Intayon!” kinuna a dagus ni Uliteg Isiong idi maasitganna dagiti kataebna.

“Ay, ket, wen, a, pari!” indusngiit ni Uliteg Pinong. Agkabkabukab pay ketdin a kasla napagustuan a baed. “Narigat a pagur-urayentayo ni Apo Hawayano!”

Sinurotda ti tambak dagiti piskeria nga agpaabagatan a mangitunda kadakuada iti haywey. Sumagawisiwda.

“Adayon ti nagteng ni Sabas,” insanamtek ni Uliteg Aldong. “Agpapadatayo la idi a maladladugan iti buyon ti Pammobo nga agal-ala iti balangeg ken leddeg nga ilakotayo!”

“Kasta la ti biag, pari!” kinuna ni Uliteg Bitong a karapisan kadakuada. Ngem kaparagsitan. Kasla isu ‘tay bersion ni Joey Ayala no rupa ti pagsasaritaan.

“Ken malagipyo?” kellaat nga adda naggilap iti muging ni Uliteg Pinong.

“Ti?”

“Ni Myla a nobia idi ni Sabas, a. Ti ammotayo idi hayskultayo, isudan ti agkatuloyan,” impaggaak ni Uliteg Pinong. “Nakasamsam-it ti linnangenda.”

“Wen, ni Myla…” bangbangir ti isem ni Uliteg Bitong, “ni Myla a tayamutam. He-he!”

Apagbingngi nga isem ti nagammimi iti rupa ni Uliteg Isiong. Kasano a malipatanda ni Myla a kaklaseda. Am-ammo la unay iti Catataan High School a nagbasaanda gapu iti kinatayamutam wenno kinatsismosana. Naangin pay. No ania la unay ti nagalseman idi ni Sabas a gayyemda.

“Musta ngata itan ni Myla?” sinaludsod ni Uliteg Aldong.

“Segun iti damagko, saanna latta a naiwagsak ‘diay kinatayamutamna,” insungbat ni Uliteg Pinong. “Kinunsintirna pay dagiti dua nga annakna a lallaki kadagiti madi nga aramidda. A nagbabawyanna ta sinangdo dagiti annakna. Ita, saannan nga ammo no yan dagiti annakna. Ngem adda damag a kamengda ti sindikato dagiti aghoholdap ditoy Tanap.”

“Naimbag ngarud ta di a nakatuloyan ni Sabas!” inkakatawada.

Nangamparada iti traysikel idi makatadogda iti haywey. Nagpaitulodda iti plasa. Napagpapatanganda idi kalman a gumatangda iti uray nanumo laeng nga isagutda iti gayyemda.

Nagsisinada tapno nadaras ti gunayda. Awan pay duapulo minuto, adddadan iti nagsulian ti plasa a pagkikitaanda. Bitbit ti tunggal maysa ti regaloda. Manipud dita, nagnada a nagpalaud. Dua a kanto ti nalabsanda sakbay a nadanonda ti balay da Uliteg Sabas.

Uray la napabullad da Uliteg Isiong idi makagtengda iti naipatuldo a pagtaengan da Uliteg Sabas. Napalawlawan ti pimmalasio a tallo kadsaaran a balay iti konkreto a pader. Nakadadaeg iti pintana a dirty yellow.

Di naaluadan dagiti agkakabaddungalan ti napakatay idi makastrekda iti solar. Nakapimpintas dagiti landscape iti bakrang ti balay ken iti ampir dagiti pader. Iti maysa a suli, naisaad ti imahen ni Birhen Santa Maria a napnapno ti agsabsabong a masetas iti sakaananna Adda pay agay-ayus a danum kadagiti babaet dagiti dadakkel a bato a naipalawlaw nga agtaud iti ngiwat ti naipasikig a burnay iti nangato a paset iti likud ti Napateg nga Ina.

Iti maysa a paset ti sirok ti balay, nairanta a garahe. Maysa nga Innova ken Land Cruiser ti nakaparking. Nagkikinnita laengen da Uliteg Isiong iti apalda.

Catering, nakuna ni Uliteg Isiong idi makitana dagiti nagtitimbukel a lamisaan a naiwaras iti nalawa a paraangan. Nakadaldalus iti panagkitana ti balbag ken puraw a motif ti pasken. Intuda ida ti maysa a mangas-asikaso kadagiti bisita iti kanigid-nga-abagatan a nagsulian ti solar.

Dinamag ni Uliteg Isiong ni Uliteg Sabas. Ngem kuna ti nagdamaganna nga addada kano pay laeng iti simbaan ta pinabuniaganda pay ti maikaduapulo nga apokona kadagiti lima nga annakda nga agassawa.

Agalas singkon idi madarimusmosan da Uliteg Isiong ti isasangpet da Uliteg Sabas. Montero ti luganda a simmangpet.

Ad-adda manen a napakatay ti grupo da Uliteg Isiong. Anian nga agpayso ti gasat a kimpet iti klasmeytda. Saan a kas kadakuada a rigat la ti adda a kaludlodanda. Ngem ti napateg ketdi, naragsakda iti pamiliada.

Idi agtalna dagiti simmabat ken ni Uliteg Sabas, ginundawayan met dayta da Uliteg Isiong. Kinablaawan ken inabrasada ti dati a kaklaseda.

“Agyamanak, kaklasmeyt, ta nakaumaykayo,” mail-iliwan met ni Uliteg Sabas a nangabrasa kada Uliteg Isiong. “Kailiwkayo la unay a makita ken kain-innistoria. Kalpasan daytoy, kayatko, agre-reunion-tayo nga agkakaadalan. Daytay ramrambak a datayo laeng!”

“Mayatak kadayta, klasmeyt,” intungtung-ed ni Uliteg Bitong. “Ta lagipentay man dagiti naglabas!”

Inyawat da Uliteg Isiong dagiti sagutda ken ni Uliteg Sabas. “Pasensiaamon ti nanumo a sagutmi, klasmeyt,” kinunada.

“Pagyamanak ketdi unay, a,” intapik kadakuada ni Uliteg Sabas.

Nagsubli a dagus da Uliteg Isiong iti lamisaanda idi agpakada kadakuada ni Uliteg Sabas tapno rugiandan ti sangkabassit a programa. Masapul nga agpasango iti naaramid nga entablado ta isu ti kangrunaan a sumarita.

“Dimo pay la inyawat dayta, pari?” intudo ni Uliteg Aldong ti paper bag nga iggem ni Uliteg Isiong. “Inyaonmo pay la ti regalom. Sangsangkamaysa latta koman nga intedmo.”

“Adda pangusarak kadaytoy,” kinuna ni Uliteg Isiong.

Nagsarita ni Uliteg Sabas iti sango dagiti dimmar-ay. Impeksana ti panagyamanna iti kaadda ti tunggal maysa. Imbatadna pay a ditoydan nga agnaed nga agassawa. Saandan nga agsubli idiay Hawaii uray adda payen bukodda a balay sadiay. Paggianan kanon daydiay ti maikadua nga anakda a naiserrekna iti trabaho sadiay.

Nalabon dagiti taraon a naidasar da Uliteg Isiong. Immuna a naipan iti lamisaanda ti sangabukel nga istetsayd nga arak. A sinaruno a dagus ti letson a pulotan.

Nalasin ni Uliteg Isiong dagiti adda iti makanawanda a lamisaan. Dagitay lider ti barangay a kaduada ni Rudy Abito a konsehal ti ilida. Am-ammo unay ni Konsehal Rudy iti kinalaingna a politiko. Napadayawanen ti probinsia. Kaykayat pay dagiti umili ta ammona ti makikadua. Saan a narigat nga as-asitgan. Ken kaklaseda met laeng idi iti hayskul.

Inasitgan ida ni Konsehal Rudy. “Mustakayo, klasmeyt?” Sinaggaysana nga inalamano da Uliteg Isiong. “Natarakikayo latta, a!”

“Sika ket ti naimbag, konsehal,” ingarakgak ni Uliteg Pinong. “Taltalekmo pay ta nagbalinka a lider ti ilitayo. Idinto a dakami, narigat pay a mangabakkami a konsehal ti barangaymi.”

“He-he! Adda la dayta iti diskarte iti biag, pari!” kunam no ania a napagustuan ni Konsehal Rudy. “Kitaenyo, saan a siak ti addaan idi. Ngem gapu iti husto a diskarte… pannakikadua… naalak ti rikna dagiti kailiantayo!”

“Isu nga apalandaka man, konsehal,” intungtung-ed ni Uliteg Aldong apaman a naitangguapna ti sukatna. “Manipud nagkonsehalka, nagpardas ti panaglupos ti biagmo.”

“Diskarte, kunak manen, ha-ha-ha!” inkatawa ni Konsehal Rudy. “Ne, ala, panawankayo pay klasmeyt ta mapanak makisarsarita kadagiti dadduma.”

Insurot laengen da Uliteg Isiong ti panagkitada iti likudan ni Konsehal Rudy.

Apagisu a maibus ti linaon ti botelia da Uliteg Isiong idi maidasar ti innapuy ken agduduma a potahe. Adda igado, adobo, dinakdakan, kaliente, tinuno a tilapia, pinakbet, letson kawali ken luto a damoda laeng a makita ken maramanan.

Apaman a mabassitanda ti maysa a potahe, addanto manen maidasar.

Nagkakamakam ti tig-abda idi malpasda. Adu ti sobrada iti lamisaan.

Nagangtan dagiti silaw idi agsaknapen ti sipnget. Aglalo a ngimmayed ti aglawlaw iti kaadu ti bombilia a naimuntar iti aglawlaw ti pagtaengan da Uliteg Sabas.

In-inut ti pannakaakas dagiti bisita idi rumabiin. Narasawen ti tunggal lamisaan a yan dagiti lallaki. Kasano, kasla di maibus dagiti imported nga arak. Narasaw metten ti grupo da Uliteg Isiong.

“Hagawidhayon…” imbeddal ni Uliteg Bitong. “Hawan ho huan ti malugananhayo.”

“Hurka biit, hlasmeyt,” imbeddal met ni Uliteg Isiong. Inruarna ti paper bag nga impasirokna iti lamisaanda. Adda inyaonna.

“Ne, ne, ne, hafay hayta hiplak, hanud?’ imbullad kenkuana ni Uliteg Pinong.

“Haghagari, fari. Hayang met hagita hagana no fanawanhay hattan… hik!”

Ngem sakbay a naipisok ni Uliteg Isiong dagiti sobrada iti ziplock a ginatangna itay iti plasa, nagsayaat la ketdin ti pannakakitada ken ni Konsehal Rudy. Nagpardas daytoy a nangipisok iti sling bag-na dagiti sobrada a letson ken igado!

Nagkikinnita da Uliteg Isiong. Uray nakainomda, kasla binain la unay ti riknada ti nakitada.

“Hinhayon!” inyawis a dagus ni Uliteg Isiong ket immuna payen a nagna. Limed nga imbattalna lattan ti ziplock a naukapna itayen. Kasla nasibugan iti nalamiis a danum iti pannakakitana iti inaramid ni Konsehal Rudy.#