Tienda, napabettakan iti bomba

STO. DOMINGO, Ilocos Sur – Maysa a tienda sadiay Barangay Padu Grande ditoy nga ili ti napabettakan iti bomba idi parbangon ti Septiembre 9.

Awan ti naireport a nadunor iti nasao a panagpabettak nupay naburak dagiti awan naggianna a botelia iti ruar ken adda nadadael a paset ti tienda a kukua ni Elen Javinar y Tabuso, 40, naasawaan, ken residente iti nasao a barangay.

Iti inisial a panagimbestiga dagiti polis, sakbay ti insidente, dua a lalaki a nakalugan iti motorsiklo ti nagmenor iti sango ti tienda sada nagdardaras nga immadayo a sinaruno ti eksplosion iti asideg ti tienda.

Iti panangproseso ti SOCO team ken personnel ti Explosive Ordnance Division iti crime scene, nakarekobreda iti fragmentation metallic shrapnel, ken safety lever.

Kinuna ti SOCO a maysa a M2K Fragmentation Hand Grenade ti naipabettak iti asideg ti tienda.

Saan pay nga ammo no apay a nabatuan iti granada ti nasao a tienda.#