Tiendaan publiko ti Candon nakapastrek iti P3.8-M iti entrada

CANDON CITY – Agdagup iti P3,766,020 ti napastrek ti siudad iti entrada idi 2010 manipud kadagiti aglaklako iti nateng, ikan, karne, prutas ken dadduma pay a mailako iti tiendaan publiko ditoy, segun ken ni Fe Toquero, market administrator ditoy.

Kinunana a nangatngato daytoy iti nasurok P300,000 no maikumpara idi 2009 nga immabot laeng iti P3.5 a milion,.

Ti bulan ti Mayo ti kadakkelan ti nasingiran nga immabot iti P338,000 a sinaruno ti bulan ti Desiembre, segun ken ni Toquero.

Kinuna ni Toquero a saan a karaman ditoy dagiti addaan iti puesto ken stalls iti public market ken dadduma pay nga establisimiento kas dagiti aglaklako ti lupot, aksesoria ken dadduma pay.

Mangnamnama ni  Toquero a magaw-atda ti P4 a milion ti ticket collection iti daytoy a tawen.#