TIKANLU Festival, naangay

TAGUDIN, Ilocos Sur. -Nupay simple, naragsak ti  pannakarambak ti Maika-7 a Tinubong, Kankanen ken Lubi-lubi (TIKANLU) Festival a naangay ditoy nga ili idi Mayo 2-6, 2011.

“Panangilala iti Biag… Panangsaluad iti Aglawlaw” ti tema daytoy parambak ita a tawen kas paset ti panagpiesta daytoy nga ili nga idadauluan ni Mayor Roque Versoza, Jr.

Kangrunaan a nabisita idi Mayo 3 da Department of Tourism Regional Director David Valera ken ni sigud a Gobernador Grace Padaca ti Isabela.

Naidasar iti daytoy nga aldaw dagiti ginasut a tinubong, lubi-lubi, tupig, patupat, puto, ti agdagsen iti nasurok dua gasut a kilo nga imbagkal ken dadduma pay a klase a kankanen ni Ilokano a libre a nagsasanguan dagiti rinibu a bisita ken umili ti Tagudin.

Nayarngi ti logo ti ASAP Tagudin iti disenio dagiti kankanen.#