Footer

Tilapia fingerlings, naibulos kadagiti karayan iti 5 nga ili

SAN EMILIO, Ilocos Sur – Kas paset ti programa ti gobierno probinsial a mangpaadu iti lames iti amin a bagi ti danum ditoy probinsia ken mangipaay iti umdas a food production, naibulos dagiti tilapia fingerlings kadagiti karayan iti lima nga ili iti maikadua a distrito idi Enero 13.

Mismo a ni Gov. Deogracias Victor Savellano ti nagiwaras ken nagibulos kadagiti tilapia fingerlings kadagiti karayan ti San Emilio, Lidlidda, Banayoyo, Santiago ken San Esteban kas paset ti programa nga Ilocos Sur Development of Aquamarine (ISDA) ti gobierno probinsial a mangbiag manen kadagiti lames dagiti amin a karayan ken waig ditoy probinsia.

Ti pannakaibulos dagiti lames kadagiti nadakamat nga ili ti rugi ti uppat a lawas a panagibunong iti tilapia fingerlings kadagiti amin nga ili iti Ilocos Sur.

Kinuna ni Savellano nga objective ti nasao a programa ti population enhancement dagiti lames kadagiti karayan, waig ken water impounding dagiti amin nga ili iti probinsia.

Segun ken ni San Emilio Mayor Lorenzo Bragado, babaen daytoy a programa, masupusopan ti pagkurangan ti lames iti ilida.Aminado ti mayor a nakirangen ti lames kadagiti karayan ti ilida gapu ta awanen ti makapasurong nga ipon nga isu koma ti dumakkel a lames gapu ta makalapdan iti igid ti baybay.

Kinuna met ni Lidlidda Mayor Jesus Sagay a napintas a pagtaudan iti protina ti lames isu a makatulong daytoy iti nutrition program kadagiti barbarangay kas kadagiti immunan a programa ti gobernador a panagiwaras iti kalding, manok ken agduduma a bukbukel.

Kiniddaw ni Savellano ti panangputar dagiti mayor ken barangay captains iti ordinansa a mangsaluad iti daytoy a programa agsipud ta “para daytoy iti masakbayan”.

Kinuna pay ti gobernador a tunggal barangay a nawarasan iti tilapia fingerlings, adda madesignaran a fish warden a sanayen ti provincial agriculture office a mangsaluad kadagiti bagi ti danum iti masakupanda.#