Timbangan ng Bayan, maipasdek iti tiendaan publiko ti Cabugao

CABUGAO, Ilocos Sur – Maysa a resolusion ti naidatag iti sangguniang bayan ditoy nga ili para iti pannakaipasdek ti pagkiluan a pangtimbangan dagiti kustomer iti gatangenda a produkto no husto met la ti dagsenda.

Kanaig daytoy, naited ken ni Mayor Edgar S. Cobangbang, Jr. ti bileg a makipinnirma iti memorandum of agreement iti Department of Trade of Industry para iti pannakaipasdek ti Timbangan ng Bayan ditoy.

Naaprobaran ti nasao a resolusion babaen ti panangiyendorso ti committee on rules ken ti committee on trade and industry.

Maipasdek ti nasao a pagtimbangan tapno adda pagikiluan dagiti aggatgatang ditoy, nangruna iti tiendaan publiko, tapno maammuanda no husto met la ti dagsen dagiti gatangenda a tagilako, kas iti karne ti baboy, manok, baka ken lames ken dadduma pay a kangrunaan a kasapulan iti pagtaengan.#