Timekeeper, namindua a napilidan, natay

SAN ESTEBAN, Ilocos Sur – Nagmalas metten daytoy a biktima ta namindua a napilidan iti asideg ti gate ti National Grid Corporation of the Philippines iti Barangay San Pablo ditoy nga ili idi rabii ti Mayo 4 a puon ti ipupusayna.

Iti report manipud iti polis ditoy, pimmusay ni Angelito Eric de Leon Rustia, 34, timekeeper ti J2J Builders ken temporario nga agtrabtrabaho iti NGCP ken taga-Taytay, Rizal, iti ospital a nakaitarayanna gapu kadagiti grabe a sugatna iti ulo ken nadumaduma a paset ti bagina.

Iti inisial nga inbestigasion, bimmallasiw ti biktima iti kalsada iti asideg ti main gate ti NGCP ngem mapapati a nasapgid ti Rusi motorcycle a minaneho ni Ave Bautista, 36, stonecraft worker ken residente iti Barangay Cappa-cappa ditoy nga ili sa simmaruno ti pannakapilidna babaen ti sabali pay a Rusi a minaneho ni Jonathan Purugganan Lemiste, 30, residente iti Barangay Suso, Sta. Maria.

Mapapati a naikras met dagiti suspek a puon ti nakasugatanda.

Kuna dagiti inbestigador a nakainom dagiti suspek ken awan ti aruatda a helmet idi mapasamak ti aksidente.

Mapapati a nainbolbar pay dagiti dua iti maysa a riribuk a napasamak sadiay Barangay Villa Quirino, ditoy nga ili.#