Timmagbat, insuko ti barangay captain

BANTAY, Ilocos Sur – Insuko ni Quimmarayan Barangay Captain Alex Tabag iti polis ti kabagianna a timmagbat iti kalugaranda idi rabii ti Nobiembre 3.

Segun iti report, kalkalpas da Balbino Briones, Jr. y Fagela, 43, mannalon, a naggiinom iti paraangan ti balayda, ket madamada nga agpatpatang ken ni Evangeline nga asawana, idi mapapati a simrek iti inaladan ni Efren Valencia y Tabag, 34, mannalon, a nakaiggem iti bolo sana tinagbat ti biktima.

Nagtaray ni Briones ngem kinamat ni Valencia sana tinagbat manen agingga a nadalupo ti biktima iti daga.

Naitaray ti biktima iti Metro Vigan Cooperative Hospital ngem awanen ti biagna a naisangpet.

Mapapati a nakarurod ti suspek idi saan a nakalugan iti traysikel ti biktima idi aggawid manipud iti inatenderanna a minatay iti napalabas nga aldaw.#