Tinakaw ti menor de edad, narekobre dagiti polis

STA. LUCIA, Ilocos Sur – Alahas, relo ken bangbanglo dagiti narekobre dagiti polis a nakalemmeng iti maysa a kamarin a mapapati a karaman kadagiti tinakaw ti maysa a menor de edad iti pagtaengan ti maysa a residente iti Barangay Angarin idi aldaw ti Agosto 23.

Natuntonan dagiti polis dagiti natakaw iti nakailemmenganda kalpasan nga impudno ni Marcial Lois, 13 (parbo a nagan ta menor de edad) nga inlemmengna dagitoy iti nagpanawan a kamarin a masarakan met laeng iti barangayda.

Inannugot pay ti menor de edad nga inlako ken nagastonan ti naglakuanna kadagiti dadduma a tinakawna

Segun pay iti menor de edad, kapaminduanan a sinerrek ken tinakawan ti balay ni Aristo Bala y Suni nga inulina idi aldaw ti Agosto 23.

Nasukalan ni Benjamin Bayudang, caretaker iti balay ni Bala, a nakalukat ti main door ti balay idi agarup 11:00 ti nadakamat nga aldaw ket idi naginspek iti uneg ti balay, nakitana a puersa a naluktan dagiti ridaw dagiti tallo a kuarto.

Agdagup iti sumurok kumurang P5,000.00 ti pateg dagiti alahas ken dadduma pay a sanikua.

Segun iti polis, iti bobeda iti ngatuen ti main door ti balay ti simrekan ken rimmuaran ti suspek.

Nabigbig ti suspek babaen ti tulong dagiti barangay officials.

Idi napagsaludsodan ti suspek, inakona nga isu ti akinresponsible iti panagtakaw iti balay ni Bala.

Kabayatanna, ikonkonsidera ti polis-Sinait a posible nga inside job ti napasamak a panagtakaw iti balay ni Thelma Groth y Salcedo, balo, sadiay Barangay Cabangtalan.

Idi sardam ti Agosto 25, nasukalan ni Rene Tulay, 48, naasawaan, caretaker, ken residente iti Barangay Cabangtalan, Sinait, a nakalukat ti akinlaud a tawa ti kuarto ni Groth, ken nadistrungkar ti window grill.

Pinakaammuan ni Tulay dagiti padana a katulong ket iti panagsukimatda iti uneg ti kuarto, naduktalanda a naporsar a naluktan ti built-in cabinet idinto a naiwara ti brown wallet iti suelo.

Mapapati a naglaon ti wallet iti P8,040.00.

Saan a nagargaraw ti sabali pay a kantidad ken lisensiado a shotgun a naikabil iti dayta met laeng a kabinet.

Awan ti dadael ti sliding window, segun iti panagimbestiga dagiti polis.

Maysa a Perlita Ilac y Salcedo, 56, balo, ken residente iti Barangay Cabangtalan, Sinait ti nangireport iti panagtakaw idi agarup 8:00 ti bigat ti Agosto 25.

Walo dagiti katulong ken siam nga aso ti bantay iti balay idi mapasamak ti panagtakaw.#