Footer

Tinapay manipud iti langit

SIMMANGBAY ti nasapa a Paskua kadagiti agilinlinteg ken gobernador ken mamayor ta kalpasan ti nagsina a miting a naangay iti Palasio, mapapati a naibunong dagiti bassit a bag a naglaon iti kuarta  nga agdagup manipud iti P200,000 agingga iti P500,000 kadagiti diputado ken gobernador ken manipud iti P20,000 agingga iti P500,000 kadagiti city ken municipal mayors, depende iti kadakkel ti ili wenno siudad.

Lumlumtuad nga adda kinaagpaysona nga adda naiwaras a kuarta idi impalgak ni Gov. ti Pampanga Ed Panlilio nga adda inawatna a bag a naglaon iti P500,000.

“Saanko nga ilimed ta diak kayat ti agulbod,” kinuna ni Panlilio idinto nga inwagaywayna pay ti kuarta iti sanguanan dagiti agiwarwarnak.

Kinuna ni Panlilio nga inawatna ti kuarta agsipud ta iti panagkitana, saan a pasuksok ta awan met ti kondision a nadawat kenkuana idi maited kenkuana ti kuarta.

Kinunana pay nga iti pannakaammona, naggapu ti kuarta iti Malakaniang,  kuarta ti publiko ti nayawat kenkuana  ket inawatna tapno gastuenna para kadagiti proyektona iti barangay iti probinsiana.

Ita, kinumpirmaran ti dua a gobernador, nupay dida kayat ti painaganan, nga immawatda met iti kuarta. Manamnama nga iti masungad nga al-aldaw, ad-adu pay dagiti rummuar a mangibatad nga uray isuda met nawarasanda iti kuarta.

Saantayo a mababalaw ni Fr. Panlilio iti panangawatna iti kuarta. Agdadamo ni Fr. Panlilio iti politika, agasinuso a kunada, adu pay ti nasken nga adalenna iti  sumrekan ken ruaran ti politika. Saan pay laeng a makasaep iti ginelgel a baraniw.

Iti sabali a bangir, ipetpetteng dagiti dida kayat ti mainaganan nga immawat a naited lattan ti kuarta kadakuada, awan ti kondision wenno instruksion no sadino ti pakaaramatan ti kuarta wenno apay a naikkanda.

Maysa nga insulto kadagiti tattao daytoy a panangikalintegan dagitoy nga agtuturay.

Uray nababa ti adalna a tao, ammona a no adda maitanggaya a kuarta a kasta ti kadakkelna, adda la ketdi kasupapakna uray no saan a maibalikas. Saan a mangted ti maysa a tao iti kasta a kantidad no awan ti pabor a dawatennanto iti masakbayan. Umanayen nga itedna ti kuarta nga awan ti kondision a dawatenna ket addan iti mangawat a mangamiris no apay a naikkan iti kuarta.

Mabalin a saan nga akuen dagiti immawat ngem maysa laeng ti turongen dayta: nalamuyot a panagpasuksok iti sanguanan ti makabibineg a kinaulimek ti Malakaniang.

Saanen a kasapulan nga ibatadtayo no para iti ania ti kuarta. Pagsisilpuen laeng dagiti immawat dagiti naudi a paspasamak iti pagilian ket maibuksilanda la ketdi ti nakairantaan dayta a kuarta nga iyar-arigda iti tinapay manipud iti manangaasi a langit.#