Tirador nanggandat iti biag ti loan officer ti kooperatiba ti bangko?

CABUGAO, Ilocos Sur – Saan laengen a drug personalities, pati payen di agus-usar iti droga ket salaponenen a patayen dagiti armado a tattao a masuspetsa manggungundaway iti all-out war ni Presidente Rodrigo Duterte kontra droga?

Daytoy ti saludsod dagiti agamaken nga umili kalpasan a pinasingkedan ti kapolisan ti Sto. Domingo a saan a drug personality iti hurisdiksionda ti maysa a loan officer a pinaltogan dagiti armado a tattao sadiay Sitio Balaywak, Barangay Pug-os, Cabugao, Ilocos Sur idi agarup 6:30 ti malem ti Septiembre 22.

Napaltogan ni Jomar Anco y Guillen, 50, naasawaan, loan officer ti Sto. Domingo Development Cooperative, Sinait Branch, ken residente iti No. 6 Gomburza Street, Poblacion, Sto. Domingo bayat nga agdaldaliasat iti national highway a sakup ti nadakamat a barangay a nakalugan iti motorsiklona a SYM.

Nagsagrap ni Anco iti sugat iti akinngato a paset ti makannawan a likudna ket naitaray nga immuna iti Suero Hospital, Cabugao, Ilocos Sur sa naiyalis iti Metro Vigan Cooperative Hospital, Bantay, Ilocos Sur.

Naglibas dagiti suspek iti saan nga ammo a direksion kalpasan ti pammaltog.

Ngem segun iti biktima, awan ti kinaririna iti man kaopisinaanna wenno dagiti klienteda.

Iti met pannakikoordinar dagiti polis-Cabugao iti polis-Sto. Domingo, pinasingkedan ti hepe ti polis ditoy a saan a drug personality ni Anco iti lugarda.

Nakaala ti mangngagas iti dua a pellet manipud iti sugat ti biktima ngem awan ti nasarakanda a naiputok a cartridge case kasta met ti naaramat a paltog iti crime scene.

Di pay ammo ti kinasiasino dagiti pimmaltog ken ni Anco kasta met ti motibo ti pannakagandat ti biagna.

Agtultuloy ti panagimbestiga dagiti polis mainaig iti nasao a pammaltog. (Tawid News Team)