Titulo, naiwaras

VIGAN CITY – Agdagup iti 260 dagiti titulo iti daga nga inyawat ti Department of Environment and Natural Resources kadagiti nagaplikar iti free residential and agricultural patent ditoy probinsia itay nabiit.

Naiwaras dagiti titulo babaen iti maysa a programa nga inatenderan dagiti opisial ti probinsia, Bureau of Lands, Regional Office, dagiti bobokal a pakaibilangan da Bokal Robert Tudayan, Bokal Constante Oandasan, Bokal Edgar Yabes, dagiti opisial ken empleado ti DENR, CENRO ken PENRO kas paset ti panangselebrar iti Environment Month.

Kinuna ni Tudayan a no addan titulo ti dagana, nataltalged ti rikna ti akinkukua.

Innayonna a mabalin nga isalda ti akinkukua ti dagana a natituluan iti babaen ti agricultural free patent ngem saanna a maiyalis iti sabali a tao iti las-ud ti lima a tawen. Kasta met a dagiti natituluan iti babaen ti residential patent ket mabalinda nga iyutang wenno ilako ti daga uray maysa nga aldaw laeng kalpasan ti pannakaiyisio ti titulona.#