Tobacco Festival, tampok iti Candon City fiesta

CANDON CITY – Rinibu a tattao a pakairamanan dagiti turista ti naglilinia iti igid ti kalsada ditoy siudad tapno imatanganda ti  Tobacco Festival Streetdancing kas kangrunaan a tampok iti panangrambak iti piesta ti Candon City itoy a tawen.

Sangpulo ket tallo a contingent a naggapu iti nadumaduma a barangay ti siudad ti nakipartisipar iti nasao nga streetdancing competition.

Nagdudupudop met dagiti tattao iti igid ti baybay a nakaangayan ti Beach Festival a nakaitampokan ti sand castle making contest, beach volleyball, banca race ken ti pasalip ti Beach Bodies 2012 a naisayangkat iti rabiina.

Karaman pay bayat ti piesta dagiti dadduma nga aktibidad kas iti Panagdubla Contest, Agri Day a nakapilian dagiti “pinaka” iti agrikultura, Miss Virginia Tobacco, Miss Candon, trade fair, Ikkis ti Candon celebration, photo contest ken dadduma pay.

Daytoy ti maika-114 a tawen ti Ikkis ti Candon ken maika-11 nga anibersario iti Candon Cityhood.

Naideklara ti Marso 28 a kas non-working holiday iti siudad.#