Tomato Paste Plant, Pormal a nailukat

SANTA, Ilocos Sur – Pormal met laengen a naglukat ti Ilocos Sur Tomato Paste Plant itoy nga ili idi Abril 7 kalpasan a naisangpet aminen dagiti paset ti makinaria a naipasimpa sadiay Italia ken nairugin ti produksion ti tomato paste iti nasao a planta.

Segun ken ni Plant Operations Manager Engr. Madeline Arce, makaaramidda iti 300 metriko tonelada a tomato paste iti inaldaw babaen ti panangiprosesoda iti 10-12 a tonelada a presko a kamatis  nga aramatenda ti makinaria nga addaan kapasidad a 5,000-6,000 a metriko tonelada.

Impakaammo pay ni Arce nga aganay 280 nga ektaria ti napamulaanda iti kamatis a pakaburasan ti iprosesoda iti planta. Kitkitaenda ti posibilidad nga umabot iti 800-1,000 nga ektaria ti mulaanda iti sumaruno a tomato season.

“Napintas met a panguartaan dagiti mannalon daytoy panagmula iti kamatis ta no napintas la ketdi ti pannakataripatoda,  umabot iti P70,000 ti maganarda iti tunggal ektaria a mulaanda,” kinuna ni Arce.

Impasingked pay ti operations manager a mabayadan a daras dagiti kamatis nga ilako dagiti mannalon iti planta.

Kinuna met ni Gov. Luis “Chavit” Singson a sabalin ti pannakaipataray ti planta agsipud ta ti NS International, maysa a pribado nga Italian Firm ti mangtarawidwid iti daytoy.

“Ti NS International ti makaammo iti amin a kasapulan ti planta agraman ti produksion ken pannakaipatarayna. Agbingayto met ti probinsia ken ti NS international iti maganar, 55% iti gobierno probinsial ken 45% iti NS International,” inlawlawag ti gobernador.

No apay nga ita laeng a mailukat manen ti planta, kinuna ni Singson a gapu ta pinilina a nasayaat ti pangiyawatanna a kompania tapno dagiti met laeng mannalon ti mabenepisiaran.

“Adu ti immuna-una a mayat a mangupa iti planta ngem diak kinayat ta amangan no laklakaenda dagiti produkto dagiti mannalontayo,” kinuna ti gobernador.

Iti sabali a bangir, dinawat ni Vice Gov. Deogracias Victor Savellano kadagiti mannalon a suportaranda ti planta babaen ti panagmula ken panangipanda iti kamatis iti planta.

“Dakkel ti oportunidad iti panagmula iti kamatis. Ngarud saantayon nga ipalubos nga iti pay sabali a probinsia a maproseso dagitoy no di ket ditoyen a mismo probinsiatayo,” kinuna ti bise gobernador.#