Top 1 most wanted person iti probinsia, naaresto

CABUGAO, Ilocos Sur – Ad-adda a dimmegdeg ti kaso daytoy maibilang a top 1 most wanted person iti probinsia gapu ta nakakumpiska dagiti polis iti paltog ken balbala iti uneg ti pagtaenganna idi apanda arestaren idi agsapa ti Hulio 24.
Saan laeng a warrant of arrest ti iggem dagiti nagtitipon nga elemento ti kapolisan iti mapanda arestaren ni Sonny Boy Quibilan y Vivit, 32, naasawaan, ken residente iti Barangay Bonifacio, ditoy nga ili no di pay search warrant nga inyisio ni Judge Nida B. Alejandro ti Regional Trial Court, Branch 24, Cabugao, Ilocos Sur para iti pannakasukisok ti balayna gapu iti impormasion nga adda iduldulinna nga armas.

Idi agarup 5:00 ti bigat ti Hulio 24, nangiwayat dagiti nagtitipon nga elemento ti kapolisan iti operasion para iti pannakatiliw kalpasan nga imbilin ni Judge Alejandro ti pannakaarestona mainaig dagiti sangsanguenna a kaso iti korte ditoy.

Akusado ni Quibilan iti two counts of murder nga addaan Criminal Case No. 3012-K ken 3013-K iti nasao a korte.

Malaksid dayta, nagpositibo ti search operation nga inwayat dagiti polis agsipud ta nakakumpiskada iti maysa a caliber 45 pistol a nagmarka iti Armscor nga awanan iti serial number ken 20 a bala iti balay ni Quibilan.

Kanaig daytoy, naipaima ni Quibilan iti police station ditoy kalpasan a nayendorso iti kaso a panaglabsingna iti RA 10591 iti opisina ti provincial prosecutor, Vigan City. Nai-docket ti kaso babaen ti NPS NO. I-03-INQ-156-00150 babaen ti inquest proceeding.

Ibilang ti kapolisan ni Quibilan a top 1 most wanted person iti sibubukel a probinsia gapu kadagiti sangsanguenna a kasona a murder.#